Aqtu nahiyisi xitay ölkiliridin yuqiri ma'ash bilen 178 neper xitay oqutquchi qobul qilidiken

Muxbirimiz qutlan
2017.05.22

Yuqiri ma'ash we alahide teminat bilen Uyghur diyarigha teklip qilin'ghan minglighan xitay yashlirining qeshqer, xoten we qizilsudiki atalmish “Qosh tilliq” mekteplerge ishqa orunlashturulushi diqqet qozghimaqta.

Közetküchiler, bu hal Uyghur oqutquchilar qoshunini Uyghur élining ma'arip sahesidin asta-asta siqip chiqirip, da'irilerning milliy ma'aripni xitaylashturush pilanini yenimu tézleshtüridu, dep qarimaqta.

Aqtu nahiyelik da'iriler 5-ayning 21-küni jiddiy uqturush chiqirip, jyangshi, shendung, lyawning, sichüen qatarliq ölkilerdin 178 neper oqutquchi qobul qilidighanliqini bildürgen.

Uqturushta mundaq déyilgen: “Döletning az sanliq millet rayonlirida ‛qosh tilliq ma'arip‚ ni kücheytish siyasitige aktipliq bilen awaz qoshush, aptonom rayonning ma'arip arqiliq xelqqe menpe'et yetküzüshtin ibaret ‛birinchi nomurluq qurulushi‚ ni izchillashturush, pütün küch bilen ‛döletning ortaq tili‚ ni omumlashturush we nahiyemizning oqutquchi yétishmeslik mesilisini hel qilish üchün ichki ölkilerdin oqutquchi qobul qilish uqturushi chiqirildi.”

Uqturushta körsitilishiche, xitay ölkiliridin aqtu nahiyesige qobul qilin'ghan xitay oqutquchilargha 6800 yüendin 7000 ming yüen'giche ayliq ma'ash we birdek heqsiz turalghu teminlinidiken.

Ularning 72 nepiri yesli oqutquchiliqigha, 64 nepiri bashlan'ghuch mektep oqutquchiliqigha, 24 nepiri toluqsiz ottura mektep oqutquchiliqigha, 18 nepiri toluq ottura mektep oqutquchiliqigha orunlashturulidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.