Хитай өткән йили чәтәлгә қечип кәткән 800 дин артуқ қачқунни қайтуруп кәткән

Мухбиримиз әркин
2016.01.28

Хитай җамаәт хәвпсизлик министирлиқи өткән йили “чәтәлгә қечип кәткән парихор әмәлдарлардин 857 кишини қайтуруп кәлгән” ликини елан қилди. Җ х министирлиқи бу кишиләрниң америка, италийә, испанийә қатарлиқ 66 дөләт вә райондин қайтуруп келингәнликини билдүргән.

Хитайниң 2014‏-йили башлиған “түлкә овлаш” намлиқ чәтәлдики парихор әмәлдарларни тутуш һәрикити бәзи дөләтләрниң наразилиқини қозғиған. Бу дөләтләр хитай қанун хадимлириниң өз тупрақлирида рухсәтсиз мәхпий һәрикәт елип барғанлиқиға наразилиқ билдүрүп, хитай даирилирини агаһландурған.

Хитай җ х министирлиқи чаршәнбә күни елан қилған баянатида, у кишиләрни қандақ қайтуруп кәлгәнлики һәққидә һечқандақ тәпсилий учур бәрмигән. Пәқәт 366 кишиниң өзини мәлум қилғанлиқини, 500 кишиниң мәҗбурий қайтуруп келингәнликини илгири сүргән.

Әмма, мәҗбурий қайтуруп келингән у 500 кишини қайси органниң қайтуруп кәлгәнликини, буниңдин улар турушлуқ дөләтләрниң хәвири бар-йоқлуқини тилға алмиған.

“ню-йорк вақти гезити” өткән йили авғустта, хитай агентлириниң америкиға саяһәт, сода визиси билән кирип, нишандики кишиләрни тәһдит селиш, қорқутуш қатарлиқ васитиләр билән хитайға қайтип кетишкә зорлиғанлиқини илгири сүргән.

Әйни чағда обама һөкүмити хитайни агаһландуруп, әгәр бу һәрикитини дәрһал тохтатмиса, қанун хадимлириниң у хитай агентлирини қолға алидиғанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.