Xitay ötken yili chet'elge qéchip ketken 800 din artuq qachqunni qayturup ketken

Xitay jama'et xewpsizlik ministirliqi ötken yili “Chet'elge qéchip ketken parixor emeldarlardin 857 kishini qayturup kelgen” likini élan qildi. J x ministirliqi bu kishilerning amérika, italiye, ispaniye qatarliq 66 dölet we rayondin qayturup kélin'genlikini bildürgen.

Xitayning 2014‏-yili bashlighan “Tülke owlash” namliq chet'eldiki parixor emeldarlarni tutush herikiti bezi döletlerning naraziliqini qozghighan. Bu döletler xitay qanun xadimlirining öz tupraqlirida ruxsetsiz mexpiy heriket élip barghanliqigha naraziliq bildürüp, xitay da'irilirini agahlandurghan.

Xitay j x ministirliqi charshenbe küni élan qilghan bayanatida, u kishilerni qandaq qayturup kelgenliki heqqide héchqandaq tepsiliy uchur bermigen. Peqet 366 kishining özini melum qilghanliqini, 500 kishining mejburiy qayturup kélin'genlikini ilgiri sürgen.

Emma, mejburiy qayturup kélin'gen u 500 kishini qaysi organning qayturup kelgenlikini, buningdin ular turushluq döletlerning xewiri bar-yoqluqini tilgha almighan.

“Nyu-york waqti géziti” ötken yili awghustta, xitay agéntlirining amérikigha sayahet, soda wizisi bilen kirip, nishandiki kishilerni tehdit sélish, qorqutush qatarliq wasitiler bilen xitaygha qaytip kétishke zorlighanliqini ilgiri sürgen.

Eyni chaghda obama hökümiti xitayni agahlandurup, eger bu herikitini derhal toxtatmisa, qanun xadimlirining u xitay agéntlirini qolgha alidighanliqini bildürgen.