3 Кишини өлтүргән вухәнликниң хизмәтдашлири билән чиқишалмиғанлиқи илгири сүрүлди

Пәйшәнбә күни әтигәндә хитайниң вухән шәһиридики ваң шяң исимлик бир киши пичақлиқ һуҗум елип берип, 3 кишини өлтүргән, 4 кишини яриландурған.

Бирләшмә агентлиқиниң ейтишичә, вухән сақчи даирилири вәқә һәққидики баянатида, 40 яшлиқ ваң шяңниң хизмәтдашлири билән болған зиддийити сәвәблик бундақ бир һуҗумни елип барғанлиқини илгири сүргән.

Мәлум болушичә, ваң шяң аптомобилини һәйдәп шәһәрниң башқа бир йеригә берип, у йәрдә йолдин өткән-кәчкәнләргә һуҗум қилишқа башлиғанда сақчилар уни етип қолға чүшүргән. Бирақ, баянатта униң әһвали һәққидә ениқ бир нәрсә дейилмигән.

Бирләшмә агентлиқи өз хәвиридә, хитайда бундақ вәқәләр көпийиватқан болсиму, әмма хитайда бу вәқәләр көпинчә һалларда роһий кесәлликләрни балдур байқап, алдини алалмаслиқ вә тез тәрәққиятқа маслишалмаслиқ дегәнләргә бағлинип хәвәр қилиниду, дегән.

Чәтәлләрдики уйғур көзәткүчиләр болса, юқиридики бу вәқәни әгәр бир уйғур садир қилған болса, у кишиниң дәрһал террорлуқ билән әйиблинип, нәқ мәйданда етип өлтүрүлидиғанлиқини, пүтүн җәмәтиниң тутқун қилинип, сораққа тартилидиғанлиқини, әмма хитайлар болса “нервиси бузулған” яки “җәмийәткә өчмәнлик қилидиған” дәп түгитидиғанлиқини билдүрди вә уйғурларға “икки хил өлчәм” йолға қоюлуватқанлиқини тәнқид қилди.

Уйғур елида йүз бәргән мушу хилдики вәқәләрниң көпидә, буниң һуҗумчи билән һөкүмәт даирилири арисида келип чиққан зиддийәт сәвәблик чиққанлиқи ениқланған болсиму, әмма хитай һөкүмити уларни бирдәк террорлуқ вә диний радикаллиқ билән әйиблигән иди.