Xitay qoralliq saqchiliri ürümchide muqimliqni qoghdash qesemyad yighini ötküzdi

2017-Yili bashlinish harpisida, yeni 31-dékabir küni xitay qoralliq saqchi qisim eskerliri we jama'et xewpsizlik saqchiliri hem her qaysi sahedin teshkillen'gen muqimliqni qoghdash küchliri birliship,””ürümchide mexsus “Térrorluqqa qarshi turup, muqimliqini qoghdash qesemyad yighini”ötküzgen.

Xitay hökümet axbarat wasitilirining xewerliridin melum bolushiche, ürümchige jaylashqan qoralliq saqchi qisim bash etritining ürümchi qiblitaghdiki “Térrorluqqa qarshi turush meshiq bazisi”da ötküzülgen bu qesemyad murasimigha 2000 etrapida qoralliq saqchi qisim esker-ofitséri we 1000 din artuq jama'et xewpsizlik alahide saqchisi toluq qorallan'ghan halda qatnashqan bolup, yighin meydanigha yene bronéwik, her xil tiptiki qoralliq saqchi qisim aptomobilliri we bashqilar kirgüzülgen.

Mezkur qoralliq saqchi we amanliq saqchi eskerliri özlirining her xil maharetlirini körsetken.

Tengri tagh torining xewer qilishiche, aptonom rayon partkomining sékritari chén chüen'goning mexsus buyruq bérishi astida qesemyad murasim pa'aliyiti bashlan'ghan bolup, murasimgha chen chü'en'go, aptonom rayon re'isi shöhret zakir, siyasiy kéngesh re'isi nurlan abdumenjin we bashqa xitay rehbiri shexsler ishtirak qilghan.

Shu künki qesemyad murasimigha qatnashqan qoralliq saqchi qisim eskerliri we jama'et xewpsizlik saqchiliri yene ürümchi shehirining asasliq kochilirida we nuqtiliq jaylarda charlash élip barghan.

Mulahizichilerning qarishiche, qoralliq saqchi qisim we jama'et xewpsizlik alahide saqchilirining bu qétimqi qesem bérish murasimi shuningdek toluq qorallan'ghan halda ürümchi shehirining nuqtiliq jaylirida charlash élip bérishi,ularning 28-dékabir küni qaraqash nahiyilik partkomning hujumgha uchrash weqesidin kéyin özlirining küch-qudritini körsitish manéwiri hésablinidiken.