Ши җинпиң: “хитай һөкүмити бир ғерич йәрниңму қолдин кетишигә йол қоймайду!”

Хитай рәиси ши җинпиң 1-авғустта бейҗиңда өткүзүлгән “армийә байрими” хатирә паалийитидә сөз қилип, хитай дөлитиниң бир ғерич йәрниңму қолдин кетишигә йол қоймайдиғанлиқини билдүргән.

Бирләшмә агентлиқниң хәвиридә ейтилишичә ши җинпиң “хәлқ сарийи” дики йиғинда сөз қилип, “биз һәрқандақ шәхс, тәшкилат яки сиясий партийәниң хитай територийәсидин бирәр парчә йәрни һәрқандақ шәкилдә бөлүвелишиға һечқачан қарап туралмаймиз” дегән. Әмма ши җинпиң сөзидә конкрет бирәр дөләт яки тәшкилатни тилға алмиған.

Ройтерс агентлиқиниң бу һәқтики хәвиридә хитайниң һазир “биз тинчлиқни қәдирләймиз, шуниңдәк таҗавузчилиққа яки кеңәймичиликкә арилашмаймиз” дәватқанлиқини нәқил кәлтүрүш билән биргә, нөвәттә хитайниң шәрқтики деңиз тәвәликидә японийә вә башқа бәш дөләт билән, җәнубтики һималая бойлирида һиндистан билән тоқунушуватқанлиқини, шуниңдәк тәйвәнни қорал күчи арқилиқ бойсундуруш һәққидә давраң селиватқанлиқини тилға алған. Йеқиндин буян болса хитай билән һиндистан арисидики чегра ихтилапи техиму җиддийләшкән иди.

Хәвәрләрдин мәлум болушичә, хитай һөкүмити “хитайниң земин пүтүнлүкиниң капалити” дәп қарап келиватқан хәлқ азадлиқ армийисиниң хамчотини һәссиләп көпәйтиватқан болуп, узундин буян хитай хәлқ азадлиқ армийәсиниң кәң хәлқ аммисиға әмәс, бәлки компартийәгә мутләқ садиқ болушни тәләп қилип кәлмәктә икән.