Хитай һөкүмити уйғур дияридики аһалиләрниң шәхсий учурини топлаш ишини йәниму күчәйткән

Мухбиримиз қутлан
2017.09.23

Йеқинда радийомизға кәлгән учурлардин мәлум болушичә, хитай даирилири уйғур аптоном районидики йәрлик аһалиләрниң шәхсий учурлирини топлаш, тизимлаш вә уларни компютер системисиға киргүзүш ишини йәниму күчәйткән.

Игилинишичә, үрүмчи шәһириниң һәрқайси районлуқ һөкүмәтлиригә қарашлиқ мәһәллә комитетлири тәвәликтики барлиқ кишиләргә “нопустикиләрниң учурини топлаш җәдвили” тарқатқан. Тәпсилати интайин инчикә болған бу җәдвәл үрүмчидин башқа җайлардиму тарқитилған.

Җәдвәлдики учурлардин мәлум болушичә, бу җәдвәлни тапшурувалған кишиләр өзиниң асаслиқ шәхсий учурлири, күндилик паалийәт даириси, диний етиқад әһвали, паспортиниң учурлири, илгири қайси дөләтләргә барғанлиқи, үч әвлад уруқ-туғқанлириниң тизимлики, муқимлиққа четилидиған әһваллири шундақла шәхсий машинисиниң учурлирини бир-бирләп толдуруши лазимкән.

Җәдвәлниң ян бөликидә толдурулған учурларға асасән мәһәллә комитетлири яки сақчи орунлири номур қойидиған бирмунчә катәкчиләр берилгән. Буниңда җәдвәл толдурғучиниң учурлириға асасән униң нуқтилиқ яки адәттики нопус икәнлики, ишәнчлик яки ишәнчсиз шәхслики, гуман обейктини бекитидиған 10 түрдин қайси түргә чүшидиғанлиқи бәлгә қоюш арқилиқ айрилидикән.

Йеқинда хитай мәркизий сиясий-қанун комитетиниң секретари миң җйәнҗу хитай сақчи даирилиридин юқири техникидин пайдилинип “муқимлиқ” қа капаләтлик қилишини тәләп қилған иди.

Көзәткүчиләр, бу җәдвәл хитай һөкүмитиниң районда йәрлик хәлқниң шәхсий учурлирини топлап компютерда санлиқ мәлумат амбири қуруп чиқиши вә юқири техникилиқ васитиләрдин пайдилинип җиддий вәқәләрниң алдини елишида асаслиқ учур мәнбәси болуп қелиши мумкин, дәп қаримақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.