Xitayning gu'angju shehiride saqchilar méhmanxanilarni türklerge yataq bermeslikke buyrughan

Xitayning gu'angju shehiride saqchilar adettiki qonaq we méhmanxanilargha uqturush chüshürüp, türkiyeni öz ichige alghan 5 döletning puqralirigha yataq bermeslikni buyrughan.

Xongkong “Jenubiy xitay etigenlik géziti”ning xewer qilishiche, gu'angju saqchi da'irilirining buningdin bir qanche ay awwal bu sheherdiki adettiki qonaq we erzan bahaliq méhmanxanilargha yollighan uqturushida, türkiye, pakistan, afghanistan, iraq we süriye puqralirigha yataq bermeslik telep qilin'ghan.

Xewerde, yuqiriqi döletlerning puqralirigha yataq bérish cheklen'gen bu qonaq we méhmanxanilarning bir kéchilik yataq bahasi 20 dollar etrapidiki erzan bahaliq méhmanxanilar ikenliki qeyt qilin'ghan.

Xitay amanliq da'iriliri hazirgha qeder bixeterlikni bahane qilip, yataq bermeslikni Uyghurlargha qaritip yolgha qoyup kelgen idi.

Xitay hökümiti 2015‏-yili 12‏-ayda “Térrorluqqa qarshi turush qanuni” maqullighandin kéyin, barliq méhmanxanilargha Uyghur yoluchilar kelse, derhal saqchigha tizimgha aldurushni bir xil mejburiyetke aylandurghan. Buninggha xilapliq qilghan méhmanxanilargha éghir jerimane qoyghan.

“Jenubiy xitay etigenlik géziti” xewiride yene qeyt qilishiche, bu qonaq-méhmanxanilar sinap béqish üchün yataq zakaz qilghan bezi muxbirlargha, “Biz yataq bérelmeymiz, emma buning sewebini bilmeymiz” dep jawab bergen.