28-Iyun küni xoten xan'ériq baziri we ürümchide weqe yüz berdi

Muxbirimiz méhriban
2013.06.28

Xoten shehiri xan'ériq bazirida 28-iyun jüme namizidin kéyin jümedin yan'ghan yashlar bilen ularni nazaret qilip mangghan saqchilar otturisida toqunush yüz bérip köp adem yarilan'ghan.

Xitayning merkizi téléwiziye istansisi we bashqa hökümet xewerliride 28-iyun küni chüshte xotende “Térrorluq hujum qilish weqesi”yüz bergenliki, weqede yarilan'ghanlar sanining téxi éniqliniwatqanliqi xewer qilindi. Radi'omiz Uyghur bölümi xotendin igiligen uchurdin melum bolushiche, weqe 28-iyun jüme namizidin kéyin jümedin yan'ghan motsiklitliq Uyghur yashliri bilen ularni nazaret qilip mangghan saqchilar otturisida yüz bergen.

Radi'omizgha ehwalni inkas qilghuchining bildürüshiche, ötken jüme künimu saqchilar meschitni qorshiwélip, meschitke kirgüchilerni nazaret qilip, meschitke jüme namizi oqush üchün kelgen Uyghurlarning naraziliqini qozghighan iken. Radi'omiz tünügün igiligen uchurda 23-iyun küni xoten qaraqash nahiyiside toqunush yüz bérip,6-7 neper xitay qurulush ishchisining ölgenliki melum bolghan idi.

Oxshash bir künde yeni 28-iyun jüme küni chüshtin kéyin ürümchi sheherlik saqchi idarisining uchurida qoralliq saqchi qisim qorusining témidin artilip chüshken bireylenning étip tashlan'ghanliqi xewer qilindi. Ün didar, sinna blogi qatarliqlarda tarqalghan bashqa uchurlarda, 28-iyun chüshtin kéyin sa'et 4 ler etrapida ürümchi beyge meydanidiki saqchixanida saqchixanigha bénzin qachilan'ghan potulka élip kirgen ikkiylenning birining saqchilar teripidin étip tashlan'ghanliqi, pichandin kelgen birqanche yashning ürümchidiki qoralliq saqchi etritidin qoral bulighanliqi we su üsti baghchisi etrapida oq awazi anglan'ghanliqi heqqidiki uchurlar tarqaldi.

Ürümchidin radi'oyimizning ziyaritini qobul qilghan jang ependining bildürüshiche, nöwette ürümchi kochilirida toluq qorallan'ghan saqchilar köpiyip, keypiyat birdinla jiddiyleshken. Ziyaritimizni qobul qilghan yene bireylen 28-iyun küni sanji-fukang yolidiki melum pul élish ponkitida partlash yüz bérip, pul yighquchi xadim partlap ölgen. Emma, ürümchidiki saqchi da'iriliri radi'omiz xitay bölümige bu ehwalni éniq bileydighanliqini, ürümchi weziyitining tinch ikenlikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.