Yaponiye bashqurulidighan bomba qalqan sistémilirini 4 rayon'gha orunlashturushni qarar qilghan

Muxbirimiz jüme
2017.08.12

Koréye yérim arili weziyitining jiddiylishishige egiship, yaponiye da'iriliri öz mudapi'esi üchün bezi zörür tedbirlerni élishqa bashlighan.

Yaponiye mudapi'e ministirliqining jüme küni bildürüshiche, ular özining yerdin hawagha qoyup bérilidighan bashqurulidighan bomba qalqan sistémilirini xiroshima, köchi, shimané we éhimé qatarliq 4 rayon'gha orunlashturushni qarar qilghan. 

Nöwette bu sistémilar yolgha chiqip bolghan bolup, shenbe küni etigen'giche belgilen'gen orun'gha yétip baridiken. 

Yaponiye mudapi'e da'iriliri bu nöwet yötkigen PAC-3 tipliq bashqurulidighan bomba qalqan sistémisi asasen shimaliy koréye bombiliri ötüsh éhtimali bolghan yuqiriqi rayonlarni chöridep jaylashturulidiken.

Halbuki, yaponiye da'irilining öz armiyisige yaponiye hawa boshluqidin uchup ötken bombilarni étip chüshürüsh buyruqi bergen yaki bermigenliki delillenmigen. 

Shimaliy koréye da'irilining atom bombilirini qit'eler-ara uchidighan bashqurulidighan bombilargha patqudek qilip kichiklitip yasighanliqi ilgiri sürülgen. 

Bu xewerdin kéyin amérika prézidénti donald tramp shimaliy koréyeni qattiq agahlandurup, ularni yadro qoral programmisini emeldin qaldurushqa, bolmisa, ularning “Misli körülmigen derijidiki qehri-ghezepke uchraydighan” liqini bildürgen. 

Shimaliy koréyemu buninggha jawaben nöwette amérikining gu'am arilidiki herbiy bazilirigha zerbe bérishni pilan qiliwatqanliqini, gu'amgha atidighan 4 dane Hwasong-12 tipliq bashqurulidighan bombisini yaponiyening jenubiy hawa boshluqidin ötküzidighanliqini bildürgen.

Netijide 8-awghusttin buyan téximu jiddiylishishke bashlighan amérika-shimaliy koréye munasiwiti téximu yamanlishishqa qarap yüzlen'gen. 

Nöwette shimaliy koréye weziyitining qaysi yölinishke qarap yüzlinidighanliqi hazirche namelum.Emma, jüme küni amérika prézidénti donald tramp shimaliy koréyeni yene bir nöwet agahlandurup, eger gu'am ariligha bir ish bolidighan bolsa shimaliy koréyening “Éghir balada qalidighan” liqini bildürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.