Yü jéngshing, uyghur rayonining idéologiye saheside tazilash élip bérishni tekitligen

Muxbirimiz erkin
2017-09-13
Élxet
Pikir
Hembehr
Print
  • Print
  • Hembehr
  • Pikir
  • Élxet

Xitay merkizi komitéti siyasiy byurosining daimiy ezasi, xitay siyasiy kéngishining reisi yü jingshing béyjingda ötküzülgen uyghurlargha alaqidar bir yighinda körsetme bérip, uyghur aptonom rayonining tarix, medeniyet, millet, din qatarliq idéologiye saheliride tazilash élip bérishni tekitligen.

Shinxua agéntliqining xewiride ashkarilishiche, u, «shinjangning tarix, medeniyet, millet, din qatarliq jehetliridiki xata idiyelerning tesirini tazilap, uzun waqitlardin béri mewjut bolup kelgen köp qatlamliq mesililerni tüp yiltizidin hel qilish kérek» dégen.

Yü jingshing bu sözlerni charshenbe küni ötküzülgen «shinjangdiki bir qanche tarixiy mesililer tetqiqati söhbet yighini»da qilghan bolup, bu yighingha kompartiye merkizi komitétidiki bezi muhim hoquqdarlarning ishtirak qilishi diqqet qozghidi.

Uninggha merkizi komitét «shinjang xizmitini maslashturush rehberlik guruppisi»ning muawin bashliqi jang chünshyen, merkizi komitét ishxanisining bashliqi su jenshu, merkizi birliksep bölümining bashliqi sün chünlen, j x ministiri gu shingkün, siyasiy kéngeshning muawin reisi du chinglin, xitay dölet kabinétining bash katipi yang jing qatarliq emeldarlar qatnashqan. Yü jingshing kompartiyening «shinjang mesilisidiki tüp nuqtiinezirini sherhlep, uyghur rayonidiki tarix, medeniyet, millet we din mesililerge jungxua milliti ortaq gewdiside turup muamile qilishni, uyghur aptonom rayonining idéologiye sahesidiki bolupmu tarix sahesidiki bezi emeliy mesililerni mushu nuqtiinezerde turup hel qilishni tekitligen.

Yighinda sün chünlen söz qilip, bu yighin «shinjangdiki birqanche tarixiy mesilige bolghan nuqtiinezerni téximu aydinglashturup, shinjangning idéologiye sahesidiki xizmitini yaxshi ishleshni muhim asas bilen teminlidi,» dégen. Biraq xitay axbarati, charshenbe künidiki yighinda «shinjangdiki zadi qaysi birqanche tarixiy mesile» ning muzakire qilinghanliqini tilgha almighan.

Yü jingshing yuqiriqi sözlerni xitay hökümitining xelqarada uyghurlarni basturup, ularning diniy erkinlikni boghush, siyasiy terbiyilesh merkezlirige uyghurlarni yighiwélish, ana til maaripini cheklep, musulman uyghurlargha xitay medeniyitini mejburi singdürüshke urunush bilen tenqidliniwatqan mezgilde qilghan.

Toluq bet