Xitay emeldari yü jingshéng bingtu'en islahatida muqimliq wezipisini tekitlidi

Xitayning shinxu'a agéntliqining 24-yanwardiki xewiride, xitay merkiziy siyasiy byurosining da'imiy ezasi, xitay memliketlik siyasiy kéngesh re'isi yü jingshéngning 24-yanwar küni diniy sahedikiler bilen ötküzgen chaghanni kütüwélish söhbet yighinida, mexsus Uyghur diyaridiki bingtu'enni kücheytish we islah qilish heqqide toxtilip, “Uyghur diyarining muqimliqini qoghdash bingtu'enning asasiy wezipisi” ikenlikini tekitligenliki xewer qilindi.

Shu küni “Shinjang géziti ” xewiride yene, Uyghur aptonom rayonluq partkomning kéngeytilgen yighini échilip, mezkur yighin'gha riyasetchilik qilghan partkomning sékrétari chén chüen'goning yighinda xitay re'isi shi jinping we siyasiy kéngesh re'isi yü jingshéngning bingtu'enni islah qilish, kücheytish heqqidiki nutqini emeliyleshtürüshni telep qilip, Uyghur rayonining muqimliqini qoghdashta bingtu'enning wezipisining éghirliqini tekitlep, bingtu'en'ge tayinish, bingtu'enni islah qilishni tézlitishni tekitligenliki xewer qilindi.

Uyghur diyaridiki bingtu'en ötken esirning 50-yillirida xitay armiyisining Uyghur diyarigha qoshun bashlap kelgen générali wang jinning teshebbusi bilen 50-yillarning otturiliri 60-yillarning béshida Uyghur diyaridiki süyi elwek, yéri munbet zéminlarni we chégra boylirini igilesh hésabigha qurulghan. Eyni yilliridiki bingtu'en terkibide xitay azadliq armiyisining rayon'gha kelgen eskerliri, 1949-yili meghlup bolghan gomindang hökümitining esirge chüshken esker, ofétsirliri, xitay ölkiliride basturulghan, sürgün qilin'ghan xitay puqraliri we xitay türmiliridin qoyup bérilgen jinayetchiler bar bolup, xitay hökümiti bingtu'enni “Boz yer özleshtürüp, igilik tikligen ishlepchiqirish qurulush armiyisi” dep teshwiq qiliwatqan bolsimu, emma xelq'arada bingtu'en xitay hökümitining Uyghur diyarida qanunsiz yer igilgenlikining ispati, “Xitayning musteqil kénezliki” dep teriplense, chet'ellerdiki Uyghur teshkilatliri bingtu'enni xitay tajawuzchi hökümitining Uyghur xelqini basturushta tayinidighan herbiy küchi dep tenqidlep, bingtu'enni bikar qilishni telep qilip kelmekte.