Хитай әмәлдари йү җиңшең биңтуән ислаһатида муқимлиқ вәзиписини тәкитлиди

Мухбиримиз меһрибан
2017.01.24

Хитайниң шинхуа агентлиқиниң 24-январдики хәвиридә, хитай мәркизий сиясий бюросиниң даимий әзаси, хитай мәмликәтлик сиясий кеңәш рәиси йү җиңшеңниң 24-январ күни диний саһәдикиләр билән өткүзгән чағанни күтүвелиш сөһбәт йиғинида, мәхсус уйғур дияридики биңтуәнни күчәйтиш вә ислаһ қилиш һәққидә тохтилип, “уйғур дияриниң муқимлиқини қоғдаш биңтуәнниң асасий вәзиписи” икәнликини тәкитлигәнлики хәвәр қилинди.

Шу күни “шинҗаң гезити ” хәвиридә йәнә, уйғур аптоном районлуқ парткомниң кеңәйтилгән йиғини ечилип, мәзкур йиғинға риясәтчилик қилған парткомниң секретари чен чүәнгониң йиғинда хитай рәиси ши җинпиң вә сиясий кеңәш рәиси йү җиңшеңниң биңтуәнни ислаһ қилиш, күчәйтиш һәққидики нутқини әмәлийләштүрүшни тәләп қилип, уйғур райониниң муқимлиқини қоғдашта биңтуәнниң вәзиписиниң еғирлиқини тәкитләп, биңтуәнгә тайиниш, биңтуәнни ислаһ қилишни тезлитишни тәкитлигәнлики хәвәр қилинди.

Уйғур дияридики биңтуән өткән әсирниң 50-йиллирида хитай армийисиниң уйғур дияриға қошун башлап кәлгән генерали ваң җинниң тәшәббуси билән 50-йилларниң оттурилири 60-йилларниң бешида уйғур дияридики сүйи әлвәк, йери мунбәт земинларни вә чегра бойлирини игиләш һесабиға қурулған. Әйни йиллиридики биңтуән тәркибидә хитай азадлиқ армийисиниң районға кәлгән әскәрлири, 1949-йили мәғлуп болған гоминдаң һөкүмитиниң әсиргә чүшкән әскәр, офетсирлири, хитай өлкилиридә бастурулған, сүргүн қилинған хитай пуқралири вә хитай түрмилиридин қоюп берилгән җинайәтчиләр бар болуп, хитай һөкүмити биңтуәнни “боз йәр өзләштүрүп, игилик тиклигән ишләпчиқириш қурулуш армийиси” дәп тәшвиқ қиливатқан болсиму, әмма хәлқарада биңтуән хитай һөкүмитиниң уйғур диярида қанунсиз йәр игилгәнликиниң испати, “хитайниң мустәқил кенәзлики” дәп тәрипләнсә, чәтәлләрдики уйғур тәшкилатлири биңтуәнни хитай таҗавузчи һөкүмитиниң уйғур хәлқини бастурушта тайинидиған һәрбий күчи дәп тәнқидләп, биңтуәнни бикар қилишни тәләп қилип кәлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.