Korlidiki bir kent sékrétari: «sidam jaynamazlargha yol qoyduq, rengdarlirini yighiwalduq»

Muxbirimiz shöhret hoshur
2017-09-27
Élxet
Pikir
Hembehr
Print
  • Print
  • Hembehr
  • Pikir
  • Élxet
Uyghurlarning réstoranlirida haraq sétish mejburliniwatqan mezgilde, melum meschitte namaz ötüwatqan uyghurlar. 2015-Yili 16-Aprél, xoten.
Uyghurlarning réstoranlirida haraq sétish mejburliniwatqan mezgilde, melum meschitte namaz ötüwatqan uyghurlar. 2015-Yili 16-Aprél, xoten.
AFP

Ashkarilinishiche, korlidiki yüzligen kenttin qara yulghun yézisidiki bir kentning özidinla 250 che jaynamaz «diniy tüsi qoyuq» dégen seweb bilen yighiwélinghan. Sidam jaynamazlargha yol qoyghanliqini bayan qilghan kent sékrétari, meschit we mekkining resimi chüshürülgen rengdar jaynamazlarni yighiwalghanliqini ashkarilidi. U yene kishiler öyliride diniy tüsi qoyuq jaynamazlarni saqlisa, buninggha egiship, oyun-Tamashidin qéchish qatarliq atalmish «diniy esebiylik» alametlirining ahalilerning turmushigha singip kirish éhtimali barliqi we buning muqimliqqa ziyanliq ikenlikini ilgiri sürdi.

Ötken hepte ijtimaiy taratqularda tarqalghan korlining kangdu mehelliside échilghan özini ashkarilash yighini heqqidiki uqturushta ahaliler qolliridiki diniy kitablar bilen birlikte jaynamazlarnimu tapshurup bérishke buyrulghan. 

Biz bu yip uchigha asasen mezkur yighin échilghan kent ahaliler komitéti bilen alaqilishishke tirishtuq. Axiri téléfonimizni qobul qilghan korla sheher qara yulghun yéza ara bughra kent sékrétari, öz kentidin az dégende 250 jaynamazni yighiwalghanliqini pash qilish bilen birlikte yighiwélinghan jaynamazlar heqqide munularni bayan qildi: «ata-Bowilirimiz ishlitip kéliwatqan eneniwi, sidam jaynamazlargha yol qoyduq؛ meschit we kebining resimi bar bolghan, diniy tüsi qoyuq jaynamazlarni yighiwalduq.» 

Kent sékrétarining bayanliridin melum bolushiche, uyghur aptonom rayonida dawam qiliwatqan siyasiy weziyettiki keskinlik sewebidin kishiler awarichiliktin saqlinish meqsitide adette tapshurulushi telep qilinmighan sidam jaynamazlarnimu özlükidin tapshurup bergen. 

Özining aktip bir partiye ezasi we «milletler ittipaqliqi ülgisi» ikenlikini bayan qilghan bu kent sékrétari, rengdar jaynamazlarni yighiwélishning sewebliri üstidimu toxtaldi. Uning bayan qilishiche, jaynamaz saqlanghan öyde aldi bilen pakizliq telep qilinidu, andin jaynamazdiki kebe we meschitlerge hörmet qilinish telep qilinidu؛ buning netijiside öyde keyp-Sapa qilmasliq éhtiyaji tughulidu.

Mana bu ehwallarning kishilerni esebiylikke yétekleydighanliqini ilgiri sürgen mezkur sékrétar, eger bu jaynamazlar teltöküs yighiwélinmisa uning jemiyet muqimliqi we xitayning dölet bixeterlikige tehdit shekillendüridighan amillardin birige aylinidighanliqini ilgiri sürdi. 

Kent sékrétari sözining xulasiside, xitayning ebediy eminliki we muqimliqni ishqa ashurush üchün dölet bixeterlikige tehdit dep perez qilinghan herqandaq nersining xeter éhtimalliqi chong-Kichik bolushidin qetiynezer, özlirining uninggha sel qarimaywatqanliqi we jaynamazlarni mana meqsette yighiwélip barghanliqini bayan qildi.

Toluq bet