Lükchün weqesidiki hujumchi we hujumgha uchrighuchilardin bir qismining kimlik we ish-izliri ashkarilandi

Muxbirimiz shöhret hoshur
2013.07.08
pichan-lukchun-weqesi-saqchi-pidaiy.jpg Pichan nahiyisi lükchün bazirida yüz bergen toqunushtin bir körünüsh. 2013-Yili 26-iyun.
t2.qpic.cn/mblogpic

26-Iyun küni pichan lükchünde yüz bergen saqchixana qatarliq xitay dölet apparatlirigha ot qoyup hujum qilish weqeside hujum qilghan we hujumgha uchrighuchilarning köpinchisining éniq kimlikliri we ish-izliri téxichila yoshurun tutulmaqta.

Xitay da'iriliri hujumchilardin exmetniyaz sidiq bilen ibrahim élidin bashqilirining kimliklirini élan qilmidi. Muxbirimiz bu heqte yerlik da'irilerdin ehwal sürüshte qilish arqiliq, hujumchilardin yarilinip esir chüshken abdulla israpil we hujumgha uchrighuchilardin 3 neper saqchi xadimining kimliklirini éniqlap chiqti. Melum bolushiche esir abdulla israpil birqanche yildin buyan ürümchide shopurluq qiliwatqan bolup, weqedin 4 kün burun yurtigha qaytip kelgen we sepdashliri bilen birlikte weqede rol alghan.

Muxbir: bu lükchünning muqam kent ahaliler komitétimu?
Xadim: shundaq, partiye yachéykisi.

Muxbir: bu qétimqi weqede silerning kenttin ölgen-yarilan'ghanlar barmu-yoqmu?
Xadim: bar.

Muxbir: qanche neper?
Xadim: üch.

Muxbir: ular kimler?
Xadim: saqchi adil abliz, 27 yash؛ yardemchi saqchi yehya israpil, 21 yash؛ alahide saqchi jappar osman, 30 yash؛ hemmisi muqam kentidin.

Muxbir: alahide saqchi qandaq öltürülüptu?
Xadim: boghuzlap.

Muxbir: bashqilirichu?
Xadim: toxtang, sékrétargha bérey....

Muxbir: siz muqam kent partiye yachéyka sékrétari alimjanmu?
Xadim: shundaq, alimjan nur.

Muxbir: hujum qilghuchilarning arisida silining kenttin qétilghanlar barmu?
Sékrétar: biri bar.

Muxbir: kim? néme ish qilidighan bala?
Sékrétar: abdulla israpil, birqanche yildin buyan ürümchide shopurluq qiliwatqan idi؛ saqchilar bilen bérip ata-anisidin sürüshte qilsaq, 22-chésla(weqedin 4 kün burun) öyige kelgen iken. Weqede qoligha oq tégip yariliniptu, hazir doxturxanida,saqchilarning nazariti astida.

Muxbir: abdulla israpilning burun diqqitinglarni tartqan ish-heriketliri bolghanmu?
Sékrétar: saqal qoyidighan boluwalghan, saqilini chüshürgüzüwetken iduq.

Muxbir: ölgen saqchilarning ölüm murasimlirigha qatnashtingizmu? a'ililirining inkasi qandaq?
Sékrétar: qatnashtim hem a'ililirige idiyiwi xizmet ishliduq. Ulargha hökümetning bu ishni yaxshi bir terep qilidighanliqini we ularni razi qilidighanliqini bildürduq. (Ölgüchiler a'ilisi tereptin) bashqa bir mesile chiqmidi.

Xitayche tengritagh torining 3-iyul yeni charshenbe künidiki bir xewiridin ashkarilinishiche, lükchündiki weqede xitay terepte turup ölgenlerdin biri dem élishqa chiqqan oqutquchi ablimittur. U shu küni chéniqish üchün sirtqa chiqqan bolup, u hujumgha uchrawatqan bir xitaygha hésdashliq qilip qoghdashqa urun'ghanliqi üchün pida'iylarning hujumigha uchrighan we doxturxanida jan üzgen. Yene shu xewerde bayan qilinishiche, hujumgha uchrap ölgen saqchilardin biri 29 yashliq abdusalam hebibulla bolup, u xizmettiki aktipchanliqi seweblik, weqe yüz bérishtin bir kün burun, xitay kompartiyisige ezaliqqa qobul qilin'ghan. Xewerdin ashkarilinishiche, pida'iylar saqchixanigha hujum qilghan mezgilide saqchixanida 9 neper xadim nöwette turuwatqan bolup, weqede yénik yarilan'ghan saqchixana bashliqi ili changching qorqup kétip ikkinchi qewettiki ishxanisining dérizidin sekrep qéchip ketken. U nöwette pichandiki doxturxanida dawalanmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.