Хитайдин кәлгән хадимлар мисирдики уйғур оқуғучиларға бесим ишләткән

Ихтиярий мухбиримиз пидаий
2016.10.19
misir-uyghur-xitay-teshwiqat.jpg Хитай тәрәптин мәхсус әвәтилгән хизмәт ишләш гурупписи мисирда елим тәһсил қиливатқан уйғурларға хизмәт ишлимәктә.
RFA

Йеқинда фейсбок қатарлиқ иҗтимаий таратқуларда мисирда илим тәһсил қиливатқан уйғурларға хитай тәрәптин мәхсус әвәтилгән хизмәт ишләш гурупписиниң паалийәтлиригә аит бир филим тарқалған.

Филимгә қариғанда, мисирдики хитай әлчиханисида ечилғанлиқи илгири сүрүлгән йиғинда хитай һөкүмити әвәткән бир уйғур хадим уйғур оқуғучиларни “барса кәлмәс йол” ға маңмаслиққа дәвәт қилған. Әмма у, бу йол һәққидә изаһат бәрмигән. Өзиниң хитайдин кәлгән хизмәт гурупписиға тәвә икәнликини билдүргән бу аял хадим йәнә оқуғучиларни хитай дөлити үчүн хизмәт қилишқа чақирған.

Униңға берилгән изаһат вә инкаслардин мәлум болушичә, мисирда оқуватқан уйғур оқуғучиларниң шу йәрдә турушлуқ рәсмийәтлириниң коча-койларда ашкара тәкшүрүлүватқанлиқи, рәсмийити толуқ болмиғанларниң аваричиликләргә учраватқанлиқи, йәнә бәзилириниң сиртларға чиқмай өйлиридә йошурунуп йүрүватқанлиқи илгири сүрүлгән.

Биз бу һәқтә учур игиләш үчүн мисирдики хитай әлчиханисиға телефон урсақ, телефон уланмиди.
Вәқәдин хәвәрдар голландийәдики обулқасим абдуезиз әпәнди бу һәқтә зияритимизни қобул қилип, өзлириниң тонушлиридин сүрүштә қилиш арқилиқ бу хәвәрләрниң растлиқини билгәнликини ейтти.

Йеқинда мисирдин явропа әллиригә келип панаһлиқ тиләватқан йәнә бир уйғур өзиниң кимликини йошурупла қалмай, бәлки бу һәқтиму мәлумат берәлмәйдиғанлиқини ейтип зияритимизни қобул қилмиди. Буниңдин мисирдики уйғурларниң әһвалиниң еғирлиқини, у йәрдә туруватқан уйғурларниң қандақ күнләрни көрүватқанлиқини пәрәз қилиш тәс болмиса керәк.
Голландийәдә яшаватқан диний зиялийлардин һүсәйин тәҗәлли әпәндиму бу һәқтә пикир баян қилип, өзиниң мисирда турған чағлирини әсләп өтти вә хитайларниң бу қилмишлириға қарита өз чүшәнчилирини радийо аңлиғучилиримиз билән ортақлашти.
Обулқасим абдуезиз әпәнди, хитай һөкүмәт хадимлириниң мисирда елип бериватқан бу хил йолсизлиқлири, хитай һөкүмитиниң уйғур диярлирида иҗра қиливатқан диний чәклимилириниң вәтән сиртиға кеңийиши дәп қарайдиғанлиқини вә мисир һөкүмитиниң, хитайниң мисирдики бу хил зораванлиқлириға сүкүт қилиштин, номус қилиши лазимлиқини билдүрди.
Чәтәлләрдә илим тәһсил қилип вәтәнгә қайталмай қалған диний өлималардин абдурахман қараҗимму бу һәқтә өзиниң ойлиғанлирини ортақлишип, мисир диний илимниң мәркәзлиридин бири, дәп тәриплинип келиватқан бир йәр болушиға бақмай, әл сиси һакимийитидин кейинки бу хил йүзлинишкә дучар болуватқанлиқидин әпсуслинидиғанлиқи билдүрди вә уйғур вәтәндашлирини һошяр болушқа чақирди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.