Shiwétsiyede Uyghur meschitining échilish murasimi ötküzüldi

Shiwétsiyide pa'aliyet qiliwatqan “Teklimakan islam medeniyet merkizi”, shiwétsiyediki Uyghurlarni bir yerge jem qilish, ittipaqlashturush üchün birqanche yildin béri bashqilarning meschitlirini ijarige élish arqiliq ikki héyt namazlirini oqup kelgen idi.

Teklimakan islam medeniyet merkizining tirishchanliqi we shiwétsiyediki Uyghurlarning yéqindin qollap quwetlishi bilen, shiwitsiye paytexti sitokhulmgha qarashliq risni rayonidiki merkizi yerdin 200 kwadirat métirliq orunni ijarige élip Uyghur meschitini qurup chiqti.

12 - Awghust küni shiwétsiyediki Uyghurlar Uyghur meschitige yighilip, meschitining échlishi murasimi bilen teng jume namizini birlikte oqudi.

Uyghur meschiti imami ömer mexsum jume xutbisida meschit qurushning ehmiyitini we peyghembirimizning medinige hijret qilip meschit qurush tarixini tepsiliy anglatti.

U sözide, bu meschit peqet namaz oqushla emes, belki shiwétisyediki Uyghur perzentlerning diniy we ana tilini öginishi, Uyghurlarning nikah, nezir - chiraq qatarliq murasimlarni élip bérish, her jume namizida Uyghur tilda xutibe anglash, ramizanda iptar ziyapiti bérish, her ikki hiyit namizini birlikte oqush qatarliq pa'aliyetlerni élip bérishi üchün sorun hazirlighanliqi, bu meschitning qurulushigha shiwétsiyede yashawatqan Uyghurlarning maddi we meniwi jehettin yéqindin yardemde bolghanliqi qatarliqlarni bayan qildi.

Biz meschitning qurulushi we bundin kéyin qilishqa tigishlik xizmetliri heqqide tepsiliy melumat élish üchün, teklimakan islam medeniyet merkizi mes'uli we Uyghur meschiti imami ömer mexsumni ziyaret qilduq. U, shiwétsiyede meschit qurush jeryanida Uyghur xelqining birlik, ittipaqiliq hasil qilsa her qandaq qiyinchiliqini yéngip kételeydighanliqini hés qilghanliqini anglatti.

Teklimakan islam medeniyet merkizi bash katipi abdulla kökyar Uyghur meschiti arqiliq, shiwétsiyediki Uyghurlarni birlik,ittipaqliqqa yétekleydighan, Uyghur diyardiki zülümlarni waqtida anglitidighan munber hazirlighanliqini bildurdi.