Лоп чарбағдики монәк мәсчити кәнтниң көңүл ечиш паалийәт өйигә өзгәртилмәктә

Мухбиримиз шөһрәт һошур
2017-09-06
Елхәт
Пикир
Һәмбәһр
Принт
  • Принт
  • Һәмбәһр
  • Пикир
  • Елхәт
Қағилиқ наһийисидики оттура мәктәп оқуғучилири «партийәгә әгишиш» һәққидики қизил тәшвиқат паалийитидә. 2017-Йили май.
Қағилиқ наһийисидики оттура мәктәп оқуғучилири «партийәгә әгишиш» һәққидики қизил тәшвиқат паалийитидә. 2017-Йили май.
xjyc.gov.cn

Уйғур районида өткән йилниң оттура -Ахирлири башланған «мәсчитләрни әлалаштуруш» нами астидики мәсчитләрни қисқартиш һәрикити бу йилму давам қилмақта.

Мәлум болушичә, мәзкур һәрикәт давамида бәзи мәсчитләр чеқиветилгән болса, бәзилири қулупланған, йәнә бәзилири болса, башқа хил паалийәт сорунлириға өзгәртилмәктә.

Өткән йилқи ениқлашлиримиз давамида қәшқәр тоққузақта вә хотән қарақашта көп сандики мәсчитләрниң чеқилғанлиқи ашкариланған иди. Биз бүгүн лоп наһийәсиниң чарбағ йезисидин әһвал ениқлишимиз давамида, мәсчитләрни әлалаштуруш нами астидики мәзкур һәрикәтниң техичә давамлишиватқанлиқи ашкариланди.

Мәлум болушичә, арамәһәллидики монәк мәсчит дәп атилидиған бир мәсчит, етиқадчи амминиң ирадиси вә диний һессийатиға зит һалда, көңүл ечиш соруниға өзгәртилмәктә. Мәдәнийәт паалийәт өйи дәп нам берилгән бу орунда буниңдин кейин, йиғин вә көңүл ечиш паалийәтлири өткүзүлиду. Әсәбийликкә қарши тәшвиқат долқунида тәшкилләнгән 15 кишилик деһқан сәнәт өмики, бу орунда нахша, усул вә танса өгитиду. Бу мәсчитниң нөвәттә меһраблири чеқилип болған, пәқәт безәк ишлири давамлашмақта.

Бүгүн америкада йашаватқан сийасий көзәткүчи, доктор қаһар барат әпәнди, арамәһәллидики монәк мәсчитниң көңүл ечиш соруниға айландурулуши һәққидә пикир байан қилди. Униң билдүрүшичә, бу йалғуз диний етиқадқа һөрмәтсизлик әмәс, бәлки диний етиқадни дәпсәндә қилиш.

Қаһар барат әпәнди йәнә, хитайниң мәдәнийәт инқилабий дәврдә мәмликәт миқйасида иҗра қилған диний етиқадқа қарши һуҗумни әмдиликтә уйғур районида әйни шәкил вә салмақта тәкрарлаватқанлиқини байан қилди. Хитайниң бу қилмишни аталмиш диний әсәбийликни түгитиш мәқситидә иҗра қиливатқанлиқини тилға алған қаһар барат әпәнди, инсанниң қәлбидә йилтиз тартқан етиқадни бу зораванлиқ йоли билән йоқитишниң мумкинсизликини тәкитлиди. Униң қаришичә, әслидә хитайниң бастуруш сийасити нәтиҗисидә уйғурларда кәң омумлашқан вә чоңқурлашқан диний етиқад, бу хил иҗраатларниң түрткисидә техиму чоңқур йилтизи тартиши вә мустәһкәмлиниши мумкинки, хитай күткәндәк аҗизлаш болуши мумкин әмәс.

Пикирләр (0)
  • Принт
  • Һәмбәһр
  • Елхәт
Толуқ бәт