Кәнт секретари: аһалиләрниң диний саватини кимдин, қәйәрдә чиқириши керәкликини билмәймиз

Мухбиримиз шөһрәт һошур
2017-09-29
Елхәт
Пикир
Һәмбәһр
Принт
  • Принт
  • Һәмбәһр
  • Пикир
  • Елхәт
Уйғур елида коча, мәһәллә вә мәсчитләрни көзитиш үчүн булуң пучқақларға орнитилған көзитиш аппаратлириниң бири. 2010-Йили 2-Ийул, үрүмчи.
Уйғур елида коча, мәһәллә вә мәсчитләрни көзитиш үчүн булуң пучқақларға орнитилған көзитиш аппаратлириниң бири. 2010-Йили 2-Ийул, үрүмчи.
AFP

Хитай даирилири өзиниң нөвәттики тәшвиқат материйаллирида уйғур районидики аһалиләрниң диний әркинликкә икән икәнликини, җүмлидин диниға етиқад қилиш вә етиқад қилмаслиқ әркинлики барлиқини илгири сүрмәктә. Әмма һөҗҗәт вә иҗраатлирида әсәбийликни түгитиш нами астида, уйғурларниң әқәллий диний мәлуматларни өгиниш вә қуран вә җайнамазни сақлишиниму чәклимәктә. Ундақта даириләр, өзиниң тәшвиқат вә иҗраатидики бу зитлиқни аһалиләргә немә дәп чүшәндүрүватиду?

Корла қарайулғундики бир кәнт секретари билән өткүзгән телефон сөһбитимиз давамида, у, хитайниң диний сийасәт тоғрулуқ нөвәттики тәшвиқати билән иҗраати арисида бир зитлиқ барлиқини йошуралмиди. 

У бир тәрәптин, нөвәттики иҗраатиниң вақитлиқ бир тәдбир икәнликини тилға алса, йәнә бир тәрәптин, буниң «әбәдий әминлик» тин ибарәт узун мәзгиллик бир пиланниң иҗраатлиридин бир парчә икәнликини байан қилди.

Секретар сөзиниң ахирида, аһалиләрниң йаки уларниң пәрзәнтлириниң әқәллий диний саватини, җүмлидин бәш вақ намазниң қаидиси қатарлиқ сават характерлик мәлуматларни кимдин вә қәйәрдә өгәнсә тоғра болидиғанлиқи һәққидә өзидиму бир ениқ чүшәнчә йоқлуқини ашкарилиди.

Икки айниң алдида йопурға вә пәйзиваттин әһвал игилигән вақтимизда, у йәрдики даириләр қурани кәриминиң 2012-Йилдин бурунқи тәрҗимисини йиғиватқанлиқини ашкарилиған иди вә бу һәқтә аптоном район дәриҗилик орунларниң һөҗҗити барлиқини ейтқан иди.

Корлида нөвәттә диний материйалларниң нәдә вә қачан бесилишидин қәтийнәзәр һәммисиниңла йиғивелинғанлиқи мәлум, әмма буниң йалғуз корлидила иҗра қилиниватқан бәлгилимә икәнлики вә йаки аптоном районниң бурунқи һөҗҗитидә өзгириш болғанлиқи мәлум әмәс.

Пикирләр (0)
  • Принт
  • Һәмбәһр
  • Елхәт
Толуқ бәт