Türkiye tashqi ishlar ministirliqi xitay elchisini chaqirip agahlandurdi

Ixtiyariy muxbirimiz erkin tarim
2015.06.30
toppa-yaghliq-saqal-ramzan.jpg Xitay da'irilirining Uyghurlargha qaratqan türlük bésimi we diniy étiqad cheklimiliri Uyghurlarni chüshkünleshtürmekte. 2009-Yili 17-iyul, ürümchi.
AFP

Türkiye tashqi ishlar ministirliqi xitayning enqerede turushluq bash elchisini ministirliqqa chaqirip agahlandurdi.

Ramizan éyi kirgendin kéyin Uyghur diyaridin kelgen xewerler türk axbarat wasitiliride tarqitilghandin kéyin, türk hökümitini we türkiye jama'etchilikini qattiq bi'aram qildi. Bügün yeni 6-ayning 30-küni türkiye tashqi ishlar ministirliqi élan qilghan bayanatta, xitay xelq jumhuriyitining Uyghur aptonom rayonidiki Uyghurlarning roza tutushining we bashqa diniy ibadetlirining cheklen'genliki toghrisidiki xewerlerning türk jama'etchilikini qattiq bi'aram qilghanliqi tekitlen'gen.

Türkiye dölitining xitayning zémin pütünlükige, muqimliqigha, parawanliqigha ehmiyet béridighanliqi tekitlen'gen bayanatta, Uyghurlarning weziyitige bolghan ensirishi xitay elchisige yetküzülgen.

Xitayning Uyghurlarning roza tutushini cheklishige, bir heptidin béri türkiyediki herqaysi ammiwi teshkilatlar, bezi siyasetchiler, dangliq sen'etchiler, putbolchilar we diniy ölimalar naraziliq bildürmekte. Bu naraziliqlarni körgen türkiye hökümiti bügün bu heqte bayanat élan qildi. Bu bayanatni qandaq chüshinishimiz kérek? bundin kéyin Uyghur teshkilatliri némilerni qilishi kérek? bundaq dawamlashsa yéngi qurulidighan türk hökümitining Uyghur siyasiti qandaq bolar dégen'ge oxshash so'allarni doktor erkin ekremdin soriduq. U, türk hökümitining türk jama'etchilikining bésimi bilen bundaq bir bayanat élan qilghanliqini éytti. Yéngi qurulidighan birleshme hökümette, eger tashqi ishlar ministirliqi aq partiyege tewe bolsa, Uyghurlargha yardem qilish dawam qilidighanliqini bayan qildi.

D u q mu'awin re'isi séyit tümtürk ependi bolsa türkiye tashqi ishlar ministirliqining bu bayanatidin xursen bolghanliqini, emma buning yéterlik emeslikini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.