Кәнт аманлиқ мудири: әмруллани савақдашлирини юқумландуруп қоймаслиқи үчүн нәзәрбәнд қиливатимиз

Мухбиримиз шөһрәт һошур
2017.08.01
Uyg-balilar-Namaz-305.jpg Сүрәттә, қәшқәрниң һейтгаһ мәсчити сиртида намаз оқуватқан уйғур балилар.
AFP Photo

Биз өткән һәптилик аңлитишимизда мисирдин қайтқан 12 яшлиқ әмрулланиң йопурғидики кәнт аһалиләр комитетида назарәт астида икәнликини хәвәр қилған идуқ.

Мухбиримизниң бу қетимқи ениқлишида әмрулланиң башланғуч мәктәпниң 6-йиллиқида оқуватқанлиқи, мәктәпкә меңиштин аввал вә мәктәптин қайтқанда кәнткә келип, өзини мәлум қиливатқанлиқи, кәнт кадирлириниң униң мәктипигә берип дәрс арилиқлирида униңға қанун түзүм тәрбийиси бериватқанлиқи ашкариланди. Бу һәқтә пикир баян қилған америкидики уйғур райони вәзийити анализчиси доктор қаһар барат әпәнди, бу хил нәзәрбәндниң әмруллаға көрситиши мумкин болған һәр хил тәсирләр үстидә тохталди.

Бу йил 2-айда мисирдин қайтқан вә нөвәттә йопурғиниң йәкшәнбә базар 3-кәнтидә нәзәрбәнд астида яшаватқан 12 яшлиқ әмрулланиң күндилик һаятиниң қандақ өтүватқанлиқини билип беқиш үчүн мәзкур кәнт аманлиқ мудиридин мәлумат соридуқ. Әмруллани күнигә аз дегәндә икки қетим йоқлима қиливатқанлиқи, оқуватқан башланғуч мәктипиниму зиярәт қилип, униң билән сөһбәт елип бериватқанлиқини баян қилған кәнт аманлиқ мудири әмрулланиң һәптә ахиридики икки күнини йәнә кәнт аһалиләр комитетида өткүзүватқанлиқи, униң бу йәрдә төвәнгә чүшкән хизмәт гурупписиниң тәрбийисини еливатқанлиқини ашкарилиди.

Аманлиқ мудири даириләрниң асаслиқ әндишисиниң әмрулланиң мисирда өгәнгәнлирини савақдашлири арисида сөзләп йүрүп, уларни “юқумландуруп” қоюш икәнликини баян қилди.

12 яшлиқ әмруллаға қаритилған бу назарәт, бу аталмиш тәрбийә униң һаятиға қандақ тәсир көрситиши мумкин? бу соалимизға америкидики мустәқил тәтқиқатчи , сиясий көзәткүчи доктор әпәнди төвәндикичә җаваб бәрди.

Қаһар барат әпәндиниң баян қилишичә, бу сиясий назарәтниң әмрулланиң буниңдин кейинки илгириләп оқуш вә хизмәт тепиш җәряниға көп тосалғуларни яритидиғанлиқи ениқ; шуниң билән бирликтә, бу назарәт әмруллани идийә вә һессият җәһәттин бир мәһәл қаймуқтуруши, әнсизчиликкә селиши мумкин. Әмма йәнә бир нуқтидин әмрулла вә униң савақдашлириниң җәмийәтни балдур чүшиниши, уларда тоғра йөнилиштики миллий вә сиясий аңниң ойғинишиға түрткә болуши мумкин. Қаһар әпәнди сөзиниң ахирида тәһдитни васитә қилған һәрқандақ бир тәрбийәниң күтүлгән нәтиҗини бәрмәйдиғанлиқини илгири сүрди.

Юқирида мисирдин қайтқан 12 яшлиқ әмрулланиң нәзәрбәнд астидики һаяти һәққидә учур вә мулаһизә аңлаттуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.