Heptilik xewerler (11-öktebirdin 17-öktebirgiche)

Muxbirimiz jüme
2014.10.17
erkin-asiya-radiosi.jpg Erkin asiya radi'osi Uyghur bölümi heptilik xewerliri
Photo: RFA

Dunya Uyghur qurultiyi we wakaletsiz milletler teshkilati 27 Uyghurgha ölüm jazasi bérilgenlikini qattiq tenqid qildi

Dunya Uyghur qurultiyi we wakaletsiz milletler teshkilati 27 Uyghurgha ölüm jazasi bérilgenlikini qattiq tenqid qildi.

Qeshqer wilayetlik ottura sot düshenbe küni 27 neper Uyghurni “28-Iyul élishqu weqesi” ge chétip ölüm jazasigha buyrughan idi.

Dunya Uyghur qurultiyi 14-öktebirdiki bayanatida mundaq körsetti: biz xitay hökümitidin Uyghurlargha qaritilghan naheq ölüm jazaliri we rayondiki basturush siyasitini derhal toxtitishni telep qilimiz.

Gollandiyeni merkez qilghan wakaletsiz millet we xelqlerning teshkilati qeshqer wilayetlik ottura sotning qararini “Kishilik hoquq we insan qedir qimmitige qilin'ghan zor buzghunchiliq” dep körsetti.

Xitay hökümiti “28-Iyul élishqu weqesi” de 59 neper atalmish “Térrorchi” ni étiwetkenlikini élan qilghan idi.

Gumada hökümet xadimlirigha hujum qilish weqesi yüz bérip, 8 adem ölgen

10-Öktebir xotenning guma nahiye baziri we etraptiki rayonlarda xitayning hökümet xadimlirigha hujum qilish weqesi yüz bérip, ikki neper hujumchini öz ichige alghan 8 adem ölgen, 3 adem yarilan'ghan.

Ölgenler arisida 3 neper saqchi we 3 neper hökümet xadimi bolup, hökümet xadimliri arisida dölet jasusluq organlirigha ishleydighanlarmu bar iken.

Melum bolushiche, ikki gumandarning esli ismi memet toxtiniyaz we hesen memet iken.

Mezkur hujumchilar 12-öktebir etigen sa'et 6 de saghan tekshürüsh ponkitida saqchilardin ikkini yarilandurghan we qorshawda qilip neq meydanda étiwétilgen.

Parizhda xitaygha qarshi namayish ötküzülgen

11-Séntebir firansiyening paytexti parizhda xitaygha qarshi keng kölemlik namayish ötküzülgen. Namayishni bash shtabi italiyediki asiyagha erkinlik teshkilatining firansiye shöbisi uyushturghan, firansiye Uyghur jem'iyiti küchlük awaz qoshqan.

Namayishqa firansuzlar, italiyelikler, Uyghurlar, tibetler, mongghullar we xongkongluqlar bolup 600 ge yéqin adem qatnashqan.

Güzelnur xanim ilham toxti sun'ghan naraziliq erzining jawabini kütüwatqanliqini bildürdi

Radi'omiz ziyaritini qobul qilghan ilham toxtining ayali güzelnur xanim ilham toxti sun'ghan naraziliq erzining jawabini kütüwatqanliqini bildürdi.

Uning bildürüshiche, naraziliq erzi 4-öktebir yuqiri sot mehkimisige tapshurulghan, da'iriler 8-öktebir naraziliq erzini tapshuruwalghanliqi heqqide ilham toxtining adwokatlirigha xet ewetken.

Adwokatlar ilham toxti üstidin qaytidin sot échish-achmasliq qararining mushu heptining axirighiche éniq bolidighanliqini bildürgen.

Uyghurlarning qanuniy heq-hoquqlirini telep qilghan meshhur Uyghur ziyaliysi ilham toxti 23-séntebir muddetsiz qamaq jazasigha höküm qilin'ghan.

“Gu'antanamodiki Uyghurlar: bimenilik tutqunliri” xelq'araliq filim féstiwalida tesir qozghidi

10-Öktebir, gu'antanamogha qamalghan Uyghurlar teswirlen'gen höjjetlik filim kanadaning montéri'al shehiride ötküzülgen xelq'araliq filim féstiwalida tesir qozghidi.

Filimni kanadaliq rézhissor patrishyo hénriku'éz ishligen bolup, filimge “Gu'antanamodiki Uyghurlar: bimenilik tutqunliri” dep nam bérilgen.

Mezkur filimda eyni dewrde Uyghurlar duch kelgen xelq'ara weziyet we 22 neper Uyghurning shu xil weziyetning qurbanigha aylan'ghanliqi bimenilik, dep qarilip shu xil mentiqsizliq filimge mawzu qilip tallan'ghan.

Patrishyo hénriku'éz filim heqqide toxtilip mundaq dédi: guntanamogha qamalghan 22 Uyghurning hékayisi peqet ularningla shexsiy hékayisi bolmastin, belki pütkül Uyghur millitining hékayisi idi, shunga men bu filimni ishleshke qiziqtim.

Gu'antanamo türmisige jem'iy 22 neper Uyghur qamalghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.