Atushta ésil sortluq yerlik üzümler bu yil xéridarsiz qélip, déhqanlar ziyan tartqan

Atush yézilirida östürilidighan ésil sortluq yerlik üzümlerning bu yil xéridarsiz qalghanliqi we Uyghur déhqanlirining ziyan tartqanliqi heqqidiki xewerler ijtima'iy taratqularda inkas qozghimaqta.

Radiyomiz bu heqtiki xewerlerni delillesh üchün neq meydan'gha téléfon qilip, yerliktin éniq melumat élishqa tirishti.

Atushning shoruq kentidin ziyaritimizni qobul qilghan bir Uyghur déhqan bu heqte munularni bildürdi:

“Shundaq, bu yil atushning üzümliri xéridarsiz qaldi, sétilmidi, déhqanlar ziyan tartti. Méning üzümlük béghim yoq, emma etraptiki déhqanlar hem yurt - jama'etning üzumlirini satalmaywatqanliqidin xewirim bar. Ichkiridin mexsus üzüm sétiwélish üchün kélidighan sodigerlermu kelmidi.”

U bizning bu yilliq üzümning bahasi heqqidiki so'alimizgha mundaq jawab berdi:

“Bu yil baha bekla chüshüp ketti, yérim baha chüshüp ketti, buning sewebini shexsen men uqalmidim. Üzüm sodigerlirining néme sewebtin bu yil atushqa üzüm sétiwélish üchün kelmigenlikinimu bilmidim. Amalsiz qalghan déhqanlar üzümlirini soghuq saqlash iskilatlirida saqlashqa mejbur bolmaqta. Ilgiri ichkiy ökililerge we hetta pakistan qatarliq chet memliketlerge sétilidighan üzüm bu yil sétilmidi. Etraptiki wilayet, nahiyelerde, yeni qeshqer, aqsu tereplerdimu üzümning bahasi chüshüp ketkenlikini anglawatimiz. Buninggha hökümetmu ünümlük chare qilalmidi bolghay…”

Qizilsu oblastliq hökümettin atushning azaq yéza qumséghir kentige “Xizmet guruppisi” terkibide chüshken mewlan isimlik bir kadirmu ziyaritimizni qobul qildi.

U ziyaritimiz jeryanida munularni bildürdi: “Biz oblastliq hökümettin bu yil 3 - ayda azaq yézisining qumséghir kentige xizmet guruppisi bolup chüshtuq. Hazir yérim yildin ashti. Sizgimu melum, her yili talashta qalidighan atush üzümi bu yil sétilmidi, xéridarsiz qaldi. Bu ehwalda atush déhqanlirining iqtisadiy ziyan'gha uchrishi éniq. Shunga biz xizmet guruppisidikiler déhqanlar bilen sodigerler arisida qatrap yürüp ularni bahada kélishtürüshke we üzümlerni waqtida bir terep qilishqa köp tirishtuq. Halbuki, ichkiridin kélidighan chong üzüm sodigerliri kelmigechke, üzümlerni waqtida bir terep qilghili bolmidi.”

Xizmet guruppisining kadiri mewlan yene munularni ilgiri sürdi: “Anglishimizche, ichkiy ölkilerdiki qizil haraq ishlepchiqiridighan zawutlar ziyan tartqanmish. Shunga zawut xojayinliri bu yerdin zor miqdarda üzüm sétiwélishtin ensirigen bolsa kérek. Undin bashqa yene néme seweb bar, buninggha men éniq birnerse déyelmeymen. Chünki men muqimliq xizmiti qiliwatqan kadir bolghanliqim üchün bu heqte éniq birnéme désem sözümge ige bolsam bolidu!”

U bizning “Ichkiy ölkilerdiki üzüm sodigerlirining bu yil Uyghur aptonom rayonigha kelmesliki bu yerdiki siyasiy weziyet, yeni muqimsizliq amilliri bilen munasiwiti barmu - yoq?” dégen so'alimizgha öz aldigha jawab bérelmeydighanliqini éytti hemde yumshaq bahane - seweb körsitip dawamliq sözlishishni ret qildi.

Tepsilatini awaz ulinishtin anglighaysiz.