Uyghuryar fondi uyghur oqughuchilargha oqush yardem puli tesis qildi

Ixtiyariy muxbirimiz erkin tarim
2017-10-09
Élxet
Pikir
Hembehr
Print
  • Print
  • Hembehr
  • Pikir
  • Élxet
"uyghuryar fondi" torbétining bashbéti.
Photo: RFA

2017-Yili 5-ayning axirliridin bashlap türkiyede aliy mektepte oquwatqan uyghur oqughuchilarning a'ilisi bilen bolghan alaqisi üzülüp qaldi. Buning bilen ularning türkiyediki oqushi we kündilik hayati nurghun qiyinchiliqlargha duch kélishke bashlidi. Uning üstige, misirdin türkiyege kelgen oqughuchilarni qoshqanda nöwette köp sandiki uyghur oqughuchilar éghir iqtisadiy qiyinchiliq astida turmush köchürmekte. "uyghuryar fondi" bu ehwalni nezerde tutup, türkiyede toluq kurs, magistir we doktor aspirantliqida oquwatqan uyghur oqughuchilargha oqush mukapat puli bérishni qarar qildi.

"uyghuryar fondi" ning qurghuchiliridin biri bolghan adil semet ependi oqush mukapat puli bérishning shertliri heqqide toxtilip mundaq dédi: "yéngidin aliy mekteplerge kirgenlerdin ularning toluq ottura mekteptiki ders netijiliri bilen chetellik oqughuchilardin telep qilinidighan imtihan netijisi sürüshte qilinidu. Aliy mektepke kirip bolghan qérindashlardin aldinqi mewsumgha munasiwetlik ders netijisi telep qilinidu. Bu heqte tepsiliy melumat igileshni xalighan oqughuchilar fondimizning www.uyghuryar.org Namliq torini ziyaret qilsa bolidu."

Adil semet ependi, oqush mukapat pulining türkiyening herqaysi uniwérsitétlirida oquwatqan toluq kurs, magistir we doktor oqughuchilirigha bérilidighanliqini bayan qilip mundaq dédi: "oqush yardem sommisi 720 türk lirasidin 1200 türk lirasi etrapida bolidu. Yilda 8 ay béridu."

"uyghuryar fondi" ning istanbuldiki wekili, uyghur ziyaliysi batur qaraxanli ependi 2017-yili 5-aydin bashlap türkiyede oquwatqan uyghurlarning a'ilisi bilen alaqisining üzülüp qalghanliqini, uning üstige misirdinmu köp sanda uyghur oqughuchining türkiyege kelgenlikini, bu oqughuchilarning oqushini dawamlashturushi üchün "uyghuryar fondi" ning bu oqush mukapatini tesis qilghanliqini shundaqla dunyaning her qaysi jayliridiki uyghurlarning mezkur fondqa yardem ewetishi kéreklikini bayan qildi.

Batur qaraxanli ependi, "uyghuryar fondi" ni qurghan kishilerning iqtisadiy ehwali yaxshi, meripetperwer uyghur ziyaliyliri ikenlikini, i'ane qilin'ghan pullarni yardemge eng mohtaj uyghurlargha yetküzüp béridighanliqini tekitlidi.

Hazir türkiyening melum bir til mektipide oquwatqan, ismini ashkarilashni xalimighan bir uyghur oqughuchi özining "uyghuryar fondi" ning oqush mukapat puli bilen oquwatqanliqini, türkiyede oqughuchilargha ishlesh pursiti bolmighachqa köp sandiki oqughuchilarning iqtisadiy jehettin éghir qiyinchiliqta ikenlikini, shunga pütün dunyadiki uyghurlarning yardem qilishini ümid qilidighanliqini bayan qildi.

"uyghuryar fondi" ning yardimige érishken edirne uniwérsitétining tarix kespide doktorluq ilmiy unwani üchün oquwatqan ömerjan jamal ependi bu yil 6-ayghiche "uyghur akadémiyesi" ning oqush mukapatini alghanliqini, 6-aydin tartip "uyghuryar fondi" ning iqtisadiy yardimi bilen oqushini dawamlashturuwatqanliqini bayan qildi.

"uyghuryar fondi" ning yardimi bilen misirdin türkiyege kelgen, ismini ashkarilashni xalimaydighan bir uyghur oqughuchi misirdin kélidighan oqughuchilarning köpinchisige "uyghuryar fondi" ning ayropilan béliti élip bergenlikini bayan qildi.

"uyghuryar fondi" 2016-yili 10-ayda meripetperwer 7 neper uyghur teripidin qurulghan bolup, hazirghiche iqtisadiy jehettin qiynilip qalghan köp sandiki uyghur oqughuchilargha yardem qilip kelmekte. Mezkur fond yene misirdin türkiyege kélishni istigen 62 oqughuchigha ayropilan béliti élip bergen. Ular yene uyghur oqughuchilargha bolghan yardemni sistémilashturush üchün mexsus oqush mukapat puli tesis qilghan.

Toluq bet