Dilshat rishit bay nahiysidiki weqege qarita bayanat élan qildi

Biz igiligen uchurlarda Uyghur diyarining aqsu wilayiti bay nahiyisining yaqqa ériq yézisi bazirida xitay saqchilirigha hujum qilish weqesi yüz bergen.

Biz bu weqeni delillesh üchün, bay nahiyisidiki yerlik xelqtin ehwal igileshke tirishtuq. Xitay da'iriliri xewerni kontrol qilghan bolghachqa, yerlik ahaliler so'allirimizgha éhtiyat bilen jawab berdi.

Aqsu sheherlik jama'et xewpsizliki idarisi bu weqege chétishliq dep qarighan 31 yashliq abliz abla, 35yashliq azadem nuri, 28 yashliq ilham abla, 42yashliq turamet ubul'ehet, 25yashliq muhemmetjan ababekri qatarliq besh Uyghur yashni jinayet gumandarliri dep tutush buyruqi élan qilghan.

Hemde ularni tutup berguchilerge 300 ming xitay puli, uchur bilen teminligüchilerge 50 mingdin 200 mingghiche xitay puli béridighanliqi toghriliq uchur tarqatqan.

Biz bu heqte köz qarishini élish üchün, dunya Uyghur qurultiyining shiwitsiyede turushluq bayanatchisi dilshat rishitni ziyaret qilduq.

Dilshat rishit bugün munasiwetlik orunlargha bergen bayanatida, xitay da'irilirining bu yil kirgendin bashlap, bu yilini “Qaqshatquch zerbebérish yili” qilip bikitip, Uyghur diyarining her qaysi sheher, nahiyiliride Uyghurlarni tutqun qilishni dawamlashturuwatqanliqini bildürdi. Rayondiki xitay saqchilirining chaghan mezgilidiki bixeterlik bahanisde, Uyghurlargha heddin artuq kuch qollan'ghanliqini, bu sewebtin Uyghurlarning chidighusiz zülumgha qarshi shiddetlik qarshiliqliri meydan'gha kéliwatqanliqini otturigha qoyghan dilshat réshit xitay da'irilirini Uyghurlargha qaratqan siyasitini özgertishke chaqirdi hemde hazirgha qeder kélip chiqiwatqan weqelerning jawabkarliqini xitay da'iriliri üstige élishi kérek dep körsetti.