Chaghan mezgilide Uyghur diyaridiki qattiq bixeterlik tedbirliri naraziliq qozghidi

Muxbirimiz méhriban
2017.01.27
ghulja-bronewik-herbiy.jpg Xitay eskerliri bronéwikliri bilen ghulja sheher ichige kiriwatqan körünüsh. 2017-Yili 26-yanwar.
Social Media

Xitayning her yilliq chaghan mezgilide Uyghur diyarida qattiq bixeterlik tedbirliri yolgha qoyulup kéliwatqan bolup, bu yilliq chaghan mezgilide bu xil bixeterlik tedbirliri téximu kücheytilgen. Undin bashqa rayondiki Uyghur qatarliq xitay bolmighan millettin bolghan saqchi we bashqa hökümet kardirliri, ishchi, xizmetchilirining xitay hökümiti belgiligen dem élishtin mehrum qilinip, idarilerde 24 sa'etlik nöwetchilikke orunlashturulushi Uyghur qatarliq yerliq xelqlerning naraziliqini téximu kücheytken.

Xitay hökümiti 2017-yili 1-ayning 27-künidin 2-ayning 2-künigiche pütün xitay boyiche hökümet organlirida ishleydighan xizmetchilering bir heptilik dep élishqa qoyup bérilidighanliqini, shexsi shirket, zawutlarningmu xizmetchilirini dep élishqa qoyup bérishi kéreklikini élan qilip, xitay xelqining chaghanliq dem élish künlirini öz-ara héytlash, sayahet qilish, tughqan yoqlash qatarliq xoshal keypiyatta xatirjem ötküzüwatqanliqi heqqidiki xewer teshwiqatlarni küpeytti.

Radiyomiz igiligen ehwallardin Uyghur diyarida bu yilliq chaghan mezgilide da'iriler hökümet teshwiqatlirida milletler ittipaqliqini, rayonda Uyghur, xitay qoshmaq tughqandarchiliq munasiwiti shekillen'genlikini medhiyileydighan xewerlerni köpeytken.

Xitayning shinjang géziti, xelq tori, shinxu'a agéntliqi qatarliqlarning 27-yanwardiki sanida, chaghan mezgilide aptonum rayonluq hökümet organliridiki rehberlerdin tartip, nahiyilerdiki hökümet organlirida ishleydighan adettiki kadirlarghiche bolghan barliq hökümet kadirlirining bu yilliq chaghan mezgilide qoshmaq tughqandarchiliq munasiwiti ornatqan her millet ammisidin hal sorash, ulargha méhribanliq yetküzüsh pa'aliyetliri élip barghanliqi, bayramliq köngül échish medeniyet-sen'et pa'aliyetliri orunlashturulghanliqi üchün Uyghur diyarida chaghanliq bayram keypiyati yaritilghanliqi toghrisidiki xewerler köplep bésildi.

Emma radiyomiz igiligen ehwallardin melum bolushiche, Uyghur rayon da'iriliri chaghan mezgilidiki bixeterlikke kapaletlik qilish namida, sheher kochilirida 24 sa'et kocha charlaydighan saqchi aptomobillirini köpeytish, hetta ghulja qatarliq sheherlerde tanka, broniwéklarni ishlitip, Uyghurlargha heywe körsitish, hökümet organlirida ishleydighan Uyghur qatarliq xitay bolmighan millet kadirlirini chaghan mezgilide nöwetchilikke orunlashturush, hetta qanun sahesidiki idare-organlarda normal xizmet tüzümini yolgha qoyush qatarliq wastilerni qollinip, chaghan mezgilide xitaylardin bashqa millet xizmetchi xadimlirini ishileshke mejbur qilghan.

Ili diyaridin ziyaritimizni qobul qilghan bir Uyghur, rayondiki weziyetni teswirlep, xitaylar étildaq étip chaghanni tebriklewatqan, radiyo, téliwizorlarda milliy inaqliq, qoshmaq tughqandarchiliq medhiyiliniwtqan bolsimu, emma ghulja shehiride saqchi aptomobilliri, broniwéklarning 24 sa'et charlash élip bériwatqanliqini, özi turushluq nahiyidiki hökümet orunlirida ishleydighan Uyghur qatarliq xizmetchilerning chaghan mezgilide kéchilik nöwetchilikte turup, kündüzi yenila normal xizmet tertipi boyiche ishleshke orunlashturulghanliqini bildürdi.

Ürümchidiki melum saqchi ponkitigha téléfon qilghinimizda, téléfonimizni kéchilik nöwetchilikte turuwatqan Uyghur saqchi aldi.

Téléfonni uyquluq halda alghan bu saqchi xadimi chaghan mezgilide Uyghur saqchilarning 24 satetlik nöwetchilikke orunlashturulghanliqini bildürüp, özining qattiq charchighanliqi üchün, eger melum qilidighan jiddiy ehwal bolmisa, normal xizmet waqtida téléfon qilishini éytip téléfonni qoyuwetti.

Da'irilerning Uyghur diyarida yolgha qoyuwatqan bu xil qattiq bixeterlik tedbirliri, we Uyghurlarning öz zéminida 2-derijilik puqra mu'amilisige uchrishi, hetta basturulushi yillardin buyan chet'ellerdiki Uyghur teshkilatliri, kishilik hoquq organliri we ghere démokratik dölet hökümetliri teripidin qattiq tenqidlinip kéliwatqan mesililerning biri.

Bügün radiyomiz ziyaritini qobul qilghan Uyghur pa'aliyetchiliridin dunya Uyghur qurultiyining bayanatchisi dilshat rishit ependi we dunya Uyghur qurultiyining teshwiqat ishlirigha mes'ul mu'awin re'isi perhat muhemmidi ependiler da'irilerning Uyghur diyaridiki siyasitini tenqidlep, bu ehwallarning xitay hökümitining rayonda yürgüzüwatqan mustemlike xaraktérini alghan milliy basturush siyasitining ashkara ipadisi ikenlikini bildürdi.

Dunya Uyghur qurultiyining mu'awin re'isi perhat muhemmidi ependi xitay hökümet da'iriliri teshwiqatida milletler ittipaqliqi we inaqliqni teshebbus qilip, Uyghur diyarida yolgha qoyulghan qoshmaq tughqan bolush, inaq keypiyat yaritish teshebbusining türtkiside rayonda her millet xelqi bir a'ile kishiliridek inaq weziyet shekillen'genlikini medhiyelewatqan bolsimu, emma xitayda dölet boyiche bayram qilip belgilen'gen chaghan qatarliq bayramlarda Uyghurlargha qarita qattiq bixeterlik tedbirlirini yolgha qoyup, saqchi aptomobilliri tanka, broniwéklar arqiliq Uyghurlargha heywe körsitishi, Uyghur qatarliq yerlik hökümet xadimlirigha xitaylardin perqliq halda téximu éghir xizmet yüklirini artishi qatarliqlarning Uyghurlarning öz zéminidiki hoquqsiz weziyitining we 2-derijilik puqra mu'amilige uchrawatqanliqining ispati déyishke bolidighanliqini tekitlidi.

Dunya Uyghur qurultiyining bayanatchisi dilshat rishit ependi bolsa, da'irilerning bu xil qattiq bixeterlik tedbirliri we basturush siyasiti arqiliq Uyghur diyarida özi arzu qilghan muqimliq we menggülük eminlikke érishelmeydighanliqini agahlandurup, bu xil basturush siyasitining emeliyette Uyghurlarning naraziliqini kücheytip, téximu köp we shiddetlik qarshiliq heriketlirige seweb bolidighanliqini agahlandurdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.