Ғайип аниси қурбангүл ханим: биз тартиватқан азаплар, кунмиң вәқәси қурбанлириниңкидин еғир

Мухбиримиз шөһрәт һошур
2014-03-07
Елхәт
Пикир
Һәмбәһр
Принт
  • Принт
  • Һәмбәһр
  • Пикир
  • Елхәт

5-Июл вәқәсидә оғли(оттурида) ғайиб болған, сақчиларниң назарити астида тиҗарәт қиливатқан баққал һелаҗи (солдин биринчиси). 2012-Йили, үрүмчи.
5-Июл вәқәсидә оғли(оттурида) ғайиб болған, сақчиларниң назарити астида тиҗарәт қиливатқан баққал һелаҗи (солдин биринчиси). 2012-Йили, үрүмчи.
RFA


1 - Март кунмиң вәқәси бәзи сиясий мулаһизичиләрниң, уйғурларниң өтмүши вә бүгүни һәққидә қәләм тәвритишгә түрткә болған болса, бу йәнә хитай һакимийитиниң еғир зиянкәшликигә учриған бир қисим аилиләрни өзлириниң бундин бурун бешидин өткән ечинишлиқ кәчмишилирини әслишигә түрткә болди.

Ғайип алимҗан һелаҗиниң аниси қурбангүл ханим, өзлириниң бешиға кәлгән паҗиәниң кунмиңда өлтүрүлгәнләрниң аилә - тавабатиниңкидинму ечинишлиқ икәнликини тилға елип «биз балилиримизниң җәситигиму игә болалмидуқ, өлгәнлики һәққидә учурғиму еришәлмидуқ, учурини сориғанлиқимиз үчүн өйимиздин қоғландуқ» деди. Қурбангүл ханим йәнә хитай сақчилириниң униң өйигә бесип кирип нарәсидә балилириниң алдида пишанисигә қорал тәңлигәнликини вә буниңдин қорқуп кәткән 4 яшлиқ балисиниң бир йилғичә есиға келәлмигәнликини әскәртти.

Һөрмәтлик радио аңлиғучилар, кунмиңда вәқә йүз бәргәндин кейин биз, хитай һөкүмитигә йиллардин бери йиғлап - ялвуруп дәрдини аңлиталмайватқан вә мушу йиғлап - ялвурғини үчүн дүшкәлләнгән, ишханилардин һәйдиветилгән, тутуп солап қоюлған әрздар аниларни зиярәт қилдуқ вә уларниң вәқә һәққидики тәсиратини соридуқ. Әрздар нурунгүл тохти «мени булар бәк бозәк қилған, баламни хитай елип қачса, мени түрмигә апирип солап қойған, кунмиңдики вәқәни аңлап бирси дәрдимни елип бәргәндәк хош болдум» деди. У йәнә бу хошаллиқиниң башқа иш үчүн әмәс, пәқәт һөкүмәтниң уйғурлар җуңгудин рази дегән тәшвиқатиниң пакит арқилиқ инкар болғанлиқидин икәнликини әскәртти. 16 яШлиқ ғайип алимҗан һелаҗиниң аниси қурбангүл ханим, өзиниң бәш йилдин буян тартқан азаплирини әсләп өткәндин кейин, бүгүнгичә техи ахбаратқа ашкарилимиған 4 яшлиқ оғли учриған зиянкәшлик һәққидиму тохтилип өтти. Баян қилинишичә ғайип оғли тутуп кетилгән күни 4 нәпәр қара кийимлик сақчи һелаҗи аилисигә қораллиқ бастуруп кирип, аилидики ата - аниниң һәр иккисиниң пишанисигә қорал тәңләп туруп өйдә ахтуруш елип барған. Өй игилири сақчиларниң ахтуруш елип беришиға һечқандақ наразилиқ билдүрмигән, һәтта еғизму ачмай сүкүт қилип турған әһвалда елип берилған. Техиму муһими сақчиларниң бу қорқунчлуқ һәрикити 4 вә 12 яшлиқ икки нарәсидиниң көз алдида давам қилған. Шуңа сақчиларниң шу күнки қорқунчлуқ қияпәт вә қорқунчлуқ авазидин йүрики езилгән 4 яшлиқ бала бир айғичә җөйлүп ухлиялмиған, бир йилғичә кочида сақчиларни көрсә қорқуп яймичиларниң тахтисиниң астиға яки әхләт сандуқлириниң арқисиға мөкүвалған.

Қурбангүл ханим сөзиниң ахирида, өзи бейҗиңдин тартип - сөрилип тутуп келингинидә, бейҗиңлиқларниң тамаша көрүп турғанлиқини әслиди. У бу нуқтида уйғур хәлқи учраватқан зулумға хитай хәлқиниң тамашибин болуп қарап турмаслиқи керәкликини, хитай һөкүмитиниң зорванлиқиға уйғур хәлқи билән бир сәптә туруп қарши туруши керәкликини, ундақ болмиғанда, бир дөләт ичидә йүз бериватқан адаләтсизликниң бу дөләттики һәммә пуқрани тәң зиянға учритидиғанлиқини әскәртип өтти.

Пикирләр (0)
  • Принт
  • Һәмбәһр
  • Елхәт
Толуқ бәт