Ghoruchöl adem bomba weqesi heqqide yéngi uchurlar

Aqsu wilayiti awat nahiyiside yéqinqi ikki heptidin buyan saqchi we hökümet da'irilirining, öymu - öy kirip axturush élip bériwatqanliqi, awatta muqimliq tedbirlirining kücheytilgenliki buninggha ghoruchöl yézisida yüz bergen adem bomba weqesi seweb bolghanliqi heqqide uchurlarni anglatqan iduq, ghoruchölde ötken ayning axirliri heqiqeten bir partilitish weqesi yüz bergenliki delillen'gen bolsimu, emma weqe heqqidiki uchurlar da'iriler teripidin intayin qattiq qamal qilin'ghan bolghachqa, weqe heqqide awam arisida oxshimaydighan gep sözler tarilip yürmekte iken. Weqe heqqide ige bolghan oxshimaydighan yéngi uchurlarni muxbirimiz gülchéhre anglitidu.

Awatqa qaratqan téléfon ziyaretlirimizdin bir yash, özining bir saqchi aghinisidin anglighanlirigha asasen, on nechche kün burun awat nahiyisi ghoruchöl yéziliq saqchixanisigha, üch er, bir ayalning ténige bomba téngip hujum qilghanliqi, deslep ular saqchilargha pichaq bilen hujum qilip bir mehel tirkeshkendin kéyin üch er hujumchining saqchilargha özini étip teng partlap ölgenliki, ayal hujumchining bolsa qéchip ketkenliki. Hazirghiche saqchilarning axturush élip bériwatqanliqini éytqan idi.

Aqsu wilayiti awat nahiyisining ghoruchöl yéziliq hökümet we ghoruchöl yéziliq saqchixanigha téléfon ulandi. Emma ikkila orundiki xadimlar bizning muxbirliqimizni bilipla téléfonni üzdi:

Partlashta yaridar bolghan yaki ölgüchilerning eng yéqin doxturxanigha élip bérilish éhtimalini oylap ghoruchöl yéziliq doxturxanigha téléfon qilduq, bir Uyghur séstiraning jawabliridin weqe bolghanliqi delillen'gen bolsimu emma weqege munasiwetlik kishilerning bu doxturxanigha élip kélinmigenlikini, weqening intayin mexpiy tutuliwatqanliqini bildürdi:

Ghoruchöl yézisining bazirida olturushluq bir ayal weqe heqqide so'alimizdin jiddiyliship qisqila jawab berdi :

Biz yene ghoruchöldiki bir muqimliq xizmiti bilen shughullinidighan bir Uyghur kadir bilen alaqilashtuq,hetta umu weqening tepsili ehwalidin xewersizlikini, weqe chiqqan haman téz bésqturulup weziyetning hazir muqimliqini bildürdi, we yene partlashta saqchilar ölgenlikini inkar qildi :

Téléfon ghoruchöldiki bir pénsiyige chiqqan yéza kadirining özige ulandi, özini partiye ezasi dep tonushturghan bu ayalning bayanliridin, néme üchün ghorüchöldiki ammining partlash weqesi heqqide melumat bérishtin néme üchün bunche éhtiyat qiliwatqanliqining sewebliri yenimu gewdilendi. Bu kompartiye ezasi ayalning éytishiche, bu weqedin kéyin, da'iriler türlük chariler bilen bu heqtiki uchurlarni qamal qilmaqta, künde öylerge tuyuqsiz qoralliq kirip öy axturushni dawam qilmaqta, kochida 24 sa'et charlash élip barmaqta, omumyüzlük yighinlar échilip, xelq weqe hemde yéza weziyiti heqqide qalaymiqan sözlimeslikke agahlandurulmaqta.