Ilham toxti ürümchidiki türmide ikki qétim achliq élan qilghan

Muxbirimiz qutlan
2014.06.26
ilham-toxti-tohti-kamera.jpg Sürette, ilham toxti léksiye sözlewatqan sinipqa kaméra ornitip qoyulghanliqi körsitilgen. 2010-Yili 12-iyun, béyjing.
AFP

Ilham toxti tutqun qilin'ghandin kéyinki 6 aygha yéqin waqit ichide ikki qétim achliq élan qilghanliqi we beden éghirliqining 16 kilogram chüshüp ketkenliki melum.

Adwokat li fangping bilen wang yü bügün, yeni 26-iyun ürümchi sheherlik j x idarisining tutup turush merkizide ilham toxti bilen tunji qétim yüzturane körushkendin kéyin bu xewerni ündidarda yollighan.

Ilham toxti bu yil 15-yanwarda béyjingdiki öyidin tutup kétilgendin kéyin taki hazirghiche uning adwokat yaki a'ilisidikiler bilen yüz körüshüshige yol qoyulmighan. Aldinqi hepte taratqularda ilham toxtining mexpiy sotlan'ghanliqi we éghir jazagha höküm qilin'ghanliqi heqqidiki xewerler tarqalghandin kéyin, xitay da'iriliri bügün adwokat li fangpingning ilham toxti bilen yüz körüshüshige tunji qétim yol qoyghan.

Adwokat li fangping bilen wang yüning ashkarilishigha qarighanda, ilham toxti tutqun qilin'ghan deslepki 20 nechche künde putidiki ishkel éliwétilmigen.

Melum bolushiche, ilham toxti ürümchidiki tutup turush ornida ilgiri-kéyin ikki qétim achliq élan qilghan. Birinchi qétimliq achliq élan qilish 16-yanwardin 26-yanwarghiche dawamlashqan. Ilham toxti ürümchidiki tutup turush ornigha élip bérilghandin kéyin özige bérilgen tamaqta choshqa méyining puriqini hés qilghan. U tamaq yéyishni ret qilip,özige musulmanche tamaq bérishni telep qilghan. Uning telipi ret qilin'ghandin kéyin u achliq élan qilip qarshiliq körsetken.

Bu heqte pikir bayan qilghan amérika Uyghur birleshmisining mu'awin re'isi ilshat hesen ependi xitay da'irilirining ezeldin Uyghur yaki tibetlerning milliy örp-adet we ghururigha hörmet qilip baqmighanliqini tekitlidi.

Ilham toxtining ikkinchi qétimliq achliq élan qilishi tutup turush ornidiki xitay saqchilarning qesten mejburlishi bilen bashlan'ghan. Adwokat teminligen uchurdin melum bolushiche, “1-Mart kunming weqesi” yüz bergen künidin bashlap türme da'iriliri uninggha su we tamaq bérishni toxtatqan. U aldinqi künliri saqlap qoyghan bir istakan su bilen birqanche kün'giche berdashliq bergen.

Adwokat li fangping bilen wang yüning bildürüshiche, köp qétim dawamlashqan achliq élan qilish we nachar shara'it tüpeyli ilham toxtining jismaniy quwwiti ajizlap, 16 kilogram oruqlap ketken. Halbuki, u rohiy jehettin özini sundurmighan bolup, hélihem özining gunahsiz ikenlikide ching turghan. Ilshat hesen ependi ilham toxtining tutqundiki shunche zor bésimgha qarimay rohini sundurmighanliqining özini bir ghelibe dep hésablaydighanliqini bildürdi.

Ilham toxti tutqun qilinip yérim yilgha yéqin waqit ötkende ashkara bolghan bu xewer pütün dunya miqyasidiki taratqularning diqqitini chekken. Amérika awazi, b b s we birleshme agéntliq qatarliq dangliq taratqular bu heqte yenimu ilgirilep uchur élishqa urun'ghan bolsimu, lékin da'iriler sözlishishni ret qilghan.

Bügün radi'omiz ürümchide turuwatqan ilham toxtining adwokati li fangping bilen biwasite alaqilishishke köp qétim tirishqan bolsimu, lékin uning téléfoni ulanmidi.

Ilshat hesen ependi axirida, qelbide weten we millet ghururi bolghan her bir Uyghurni, bolupmu muhajirettiki Uyghur jama'etchilikini tutqundiki ilham toxtining ehwaligha yéqindin diqqet qilishqa chaqirdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.