Güzelnur xanim ilham toxtining sotidin kéyinki ehwallarni anglatti

Muxbirimiz méhriban
2014.10.16
guzelnur-ilham-toxti-sot-urumchi.jpg Güzelnur xanim éri ilham toxtining sotigha qatnishish üchün aldida. 2014-Yili 17-séntebir, ürümchi.
AFP

Ilham toxtining ayali güzelnur xanim 16-öktebir küni radi'omiz ziyaritini qobul qilip, ilham ependi heqqide chiqirilghan sot hökümi üstidin sun'ghan naraziliq erzining jawabini kütüwatqanliqini bildürdi.

Güzelnur xanim yene, a'ilisining yéqinqi ehwalini anglitip, banka hésabi we bashqa resmiyetler asasen ilham ependi namida béjirilgenliki üchün özining her xil awarichiliklerge uchrawatqanliqini bildürdi.

Xitay da'iriliri Uyghurlarning qanuniy heq-hoquqlirini telep qilghan meshhur Uyghur öktichi ziyaliysi ilham toxti ependi üstidin ötken ayda ürümchide sot échip, 23-séntebir küni ilham toxtigha muddetsiz qamaq jazasigha höküm qilghanliqini élan qilghandin kéyin, ilham ependi we uning a'ilisidikiler adwokatlar arqiliq naraziliq erzi sunidighanliqini bildürgen we ürümchi ottura xelq sotining qarari üstidin yuqiri sotqa naraziliq erzini tapshurghan idi.

Bügün etigen ilham ependining ayali güzelnur xanim radi'omiz ziyaritini qobul qilip, 4-öktebir küni naraziliq erzining yuqiri sot mehkimisige tapshurulghanliqini, da'irilerning 8-öktebir naraziliq erzini tapshuruwalghanliqi heqqide ilham toxtining adwokatlirigha xet ewetkenlikini we hazir yuqiri sotning qararini saqlawatqanliqini bildürdi

Güzelnur xanimning sözidin melum bolushiche, ilham ependining adwokati li fangping uninggha adette sot mehkimilirining naraziliq erzige 10 kün ichide jawab qayturushi kéreklikini tekitlep, belkim ilham ependi üstidin qaytidin sot échilish yaki esli hökümning saqlinip qélishi heqqidiki qararning mushu heptining axirighiche éniq bolidighanliqini bildürgen.

Biz güzelnur xanimdin, a'ilisining yéqinqi ehwalini sorighinimizda, u bizge ilham ependi soti échilishning aldi-keynidiki ehwallarni bayan qilip, ötken ayda ilham ependi üstidin ürümchide échilghan sotqa merkizi milletler uniwérsitétiningmu adem ewetkenlikini bildürüp, mektep teripidin sotqa qatnishish üchün ewetilgen ikki ayalning özige hemrah bolup ürümchige barghanliqini bildürdi.

Güzelnur xanim bayanida, sotning hökümide élan qilin'ghan atalmish “Ilham toxtining barliq mal-mülkini musadire qilish” hökümi heqqide toxtilip, a'ilisining emeliyette ilham ependining nami bilen élin'ghan béyjingdiki turalghu öyidin bashqa mal-mülkiningmu yoqluqini, éhtiyat üchün qoyup qoyulghan azghine iqtisadningmu ilham ependining banka hésabida bolghachqa, da'iriler éri ilham toxtining banka hésabatini tonglitiwetkendin kéyin, özining béyjing milletler uniwérsitétidiki kutupxanidin alidighan toxtamliq ish heqqi3000 som pul bilen ikki oghlini béqiwatqanliqini, iqtisadiy jehettin qiyniliwatqanliqini bildürdi.

Igiligen ehwallardin melum bolushiche, güzelnur xanimning nopus kimliki atush tewelikide bolghini üchün, béyjingda béjirishke tégishlik resmiyetlerning hemmisi éri ilham ependining nami bilen béjirilgen. Ilham ependi qolgha élin'ghandin kéyin, güzelnur xanim bu a'ilige munasiwetlik resmiyetlerni qayta béjirishte nurghun qiyinchiliqlargha uchrighan. Hetta bezi organlarning resmiyet béjirish jeryanida qesten qiyinchiliq tughdurushidek ehwallarmu körülgen.

Bu yil 9-ayning 17-künidin 19-künigiche ürümchide ilham ependi üstidin sot échip, 23-séntebir seyshenbe küni ilham toxtining muddetsiz qamaq jazasigha höküm qilin'ghanliqi élan qilin'ghan idi. Da'iriler teripidin ürümchide échilghan bu sot xelq'ara jem'iyet teripidin adaletsiz sot dep qattiq eyiblen'gen. Ilham toxti ependi we uning a'ilisidikilermu sotning hökümige qayil emeslikini bildürüp, 1-qétimliq sottin kéyin aptonom rayonluq yuqiri sot mehkimisige naraziliq erzi sunup, ilham toxti délosi üstidin qayta sot échishni telep qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.