Pichan lükchündiki saqchixanigha ot qoyup hujum qilish weqeside az dégende 45 kishi ölgen

Bügün muxbirimizning pichan lükchünde yüz bergen saqchixanigha ot qoyup hujum qilish weqesi heqqide yerlik da'iriler we ahalilerdin igiligen uchurliridin melum bolushiche, weqede hökümet tereptin az dégende 35 kishi, hujumchilardin 11 kishi ölgen.

Tünügün ölüm murasimliri üchün  35 képen sétiwélin'ghanliqini ashkarilighan bir mehelle imamining bildürüshiche, tünügün hökümet tereptin ölgenlerning hemmisi yerlikide qoyulup bolghan. Emma hujumchilardin ölgenlerning jesiti téxi bir terep qilinmighan. Yene ashkarilinishiche, hujumchilardin aman qalghanlarni qoghlap tutush üchün  tünügün chüsh mezgilide xitayning ikki tik uchar ayropilani lükchünde charlash élip barghan. Töwende muxbirimiz shöhret hoshurdin bu heqte tepsiliy melumat anglaysiler:

******
Muxbir: bu pichan bazarliq saqchixanimu?
Xadim: shundaq, bazarliq saqchixana.
Muxbir: emise manga jidawyüenni chaqirip béqing.
Xadim: jidawyu'en hüsen sadiq, téléfoni......

*******
Muxbir: jidawyüen hüsen sadiqmu?
Saqchi: shundaq, men shu?
Muxbir: muqimliq tedbirliri qandaqraq éliniwatidu?
Saqchi: shu, öy we yol tekshürewatimiz, nöwette turuwatimiz.
Muxbir: weqede qanche kishi ölgen boldi?
Saqchi: bu ishlarni héchqandaq ademge démenglar dégen, shunga nahiyilik qomandanliq shtapidin sorang.

*******

Muxbir: wey bu lükchünmu?

Ahale: shundaq, bu lükchün.
Muxbir: lükchündiki weqe heqqide némilerni anglidinglar?
Ahale: pichandiki uruq ‏- tughqanlar téléfon qiptiken, siler tereptin doxturxanigha yaridarlarni ekiliwatidu, amanmu siler dep,  biz tinch-aman déyishtuq.
Muxbir: tuqqanliringlar néme dep anglaptu, néme dédi?
Ahal e: 40 nechche adem ölüptu dep anglaptu.
Muxbir: ölgen bu 40 nechche adem oqta ölgenlermiken, ottimu yaki pichaqtimu?
Ahale: hemmisi oxshaydu.
Muxbir: weziyet qandaq hazir lükchünde?
Ahale: charlash-tekshürüsh élip bériliwatidu, öydin talagha chiqalmiduq.
Muxbir: némilerni kördingiz charlash ishliridin?
Ahale: chüshler bilen gürüldep awaz chiqip ketti, sirtqa chiqip qarisam, tik uchar ayropilan iken. Bundaq pes uchqanni körmigentim؛ derex boyilam uchti.
Muxbir: undaqta, aman qalghan gumandarlarni qoghlap tutush üchün heriket qilghan tik uchar oxshimamdu?
Ahale: shundaq chéghi, ayropilanni say terepke chüshti déyishti, say bizdin yiraq bolghachqa, u yerde néme ish bolghinini uqmiduq.

********
Muxbir: bügün weqede ölgenlerni yerlikide qoyghan  imam siz bolamsiz?
Imam: he, men shu?
Muxbir: siz qanche kishining depne murasimige qatnashtingiz?
Imam: bizni birqanche yerge bölüwetti, men üchige bardim.
Muxbir: weqede jem'iy qanche kishi ölüptu?
Imam: qanche kishi ölgenlikini uqturmidi, képenning sanigha qarighanda 35 .
Muxbir: tünügün 35 kishining depne murasimi boldimu?
Imam: shundaq.
Muxbir: hemmisi silerning mehellidinmu?
Imam: yaq, kariz, muqam, döletbagh qatarliq.....
Muxbir: ölgenlerning ichide xenzular qanche iken?
Imam: 7 ‏-8 i bar oxshaydu.
Muxbir : ölgüchiler kimler iken?
Imam: yighinda uqturulushiche, köpinchisi saqchi - minbing.
Muxbir: weqening jeryanini qandaq dep uqturdi?
Imam: awwal saqchixanigha ot qoyuptu, andin yéziliq hökümetke.
Muxbir: siz depne murasimigha qatnashqan saqchi qandaq öltürülüptu?
Imam: qoyni öltürgendekla öltüriwétiptu, boynidin késip.
Muxbir: boghuzliniptu-de emise?
Imam : shundaq, boghuzliniptu.
Muxbir: gumandarlarning ölüm murasimigha bardingizmu?
Imam: yaq, u wahabiylar bilen bizning chatiqimiz yoq, ularning jesiti saqchining qolida.
Muxbir: undaqta siz dégen 35 képen peqet hökümet tereptin ölgenler üchünla teyyarlan'ghan , shundaqmu?
Imam: shundaq.
Muxbir: képenlerni siz nede kördingiz, kimler bilen kördingiz?
Imam: yéziliq birliksep xadimining öyide, wilayetlik saqchi we aptonom rayondin kelgen bashliqlarmu bar.

Hörmetlik radi'o anglighuchilar, yuqiriqi melumatlardin qarighanda, weqede hökümet tereptin az dégen 35 kishi, pida'iylardin 11 kishi ölgen. Pichandiki weziyet yenila jiddiy halette turmaqta.