Türkiye wetendashliqidiki 21 yashliq Uyghur yigit abdullajan xitay türmiside qaza qilghan

Muxbirimiz qutlan
2014.10.10
abdullajan-turkiye-wetendash-turme-olush.jpg Gwangshining pingshyang türmiside sirliq halda qaza qilghan, türkiye wetendishi 21 yashliq Uyghur yigit abdullajan abdulmennan.
Süretni abdullajanning dadisi abdulmennan teminligen


Igilishimizche, 9 - öktebir seher gwangshining pingshyang türmisidiki saqchilar 9 aydin buyan mezkur türmige qamalghan 21 yashliq Uyghur yigit abdullajanning ölgenlikini a'ilisidikilerge xewer qilghan.

Abdullajanning türkiyede olturushluq dadisi abdulmennan radi'omiz ziyaritini qobul qilip, éghir hesret ichide oghlining ölümi heqqide toxtaldi.

Uning bildürüshiche, emdila 21 yashqa kirgen abdullajan 18 yildin buyan yüz körüshmigen dadisi bilen jem bolush üchün bu yilning béshida seperge atlan'ghan.

Abdulmennan buningdin 18 yil burun yurti yekendin ayrilip, muhajirette yashighan. Uning oghli abdullajan shu chaghda aran 3 yashta bolup, bowa - momisining terbiyeside qalghan.

Ötken yilining axirida abdulmennan yekende qalghan oghli abdullajanning türk wetendashliq resmiyetlirini püttürüp ewetip bergen. Abdullajan mushu resmiyetler boyiche béyjingdiki türk elchixanisidin qanonluq türkiye pasportigha érishken. Halbuki, xitay da'iriliri abdullajanni türk pasporti bilen chégradin chiqishqa yol qoymighan. Amalsiz qalghan bu a'ile oghlining qachaq yol bilen bu yilning béshida wéytnamgha bérishini, u yerdin türkiyege kélishini orunlashturghan.

Abdullajan axiri dadisi abdulmennan bilen bu yil 1 - ayda wéytnamda uchrashqan. Türkiyediki bashqa 3 neper Uyghur muhajirmu mushu yol bilen balilirini ekilish üchün wéytnamgha bille kelgen.

27 - Yaniwar küni ular xanoy xelq'ara ayrodromidin türkiyege uchidighan chaghda wéytnam saqchiliri abdullajanni we uning bilen bille seperge atlan'ghan we qanunluq türk pasporti kötürgen qalghan 3 neper Uyghur yashni biraqla tutqun qilghan.

Xitay saqchiliri 9-öktebir abdullajanning gwangshidiki pingshyang türmiside ölgenlikini a'ilisige xewer qilghan
Xitay saqchiliri 9-öktebir abdullajanning gwangshidiki pingshyang türmiside ölgenlikini a'ilisige xewer qilghan

Wéytnam saqchiliri shu waqitta ularning türkiye wetendishi ikenlikidin gumanlinip, somkilirini aqturghan. Oylimighan yerdin abdullajanning 3 neper seperdishining somkiliridin xitay kimliki chiqip qalghan. Buning bilen wéytnam saqchiliri 4 neper türkiye pasporti kötürgen Uyghur yashni tutqun qilghan.

Ikki kündin kéyin ular wéytnamdin xitaygha qayturulghan we gwangshining pingshyang türmisige solan'ghan. Shuningdin buyan a'ilisidikiler ularning xewirini alalmighan.

Aridin 9 aygha yéqin waqit ötkende, yeni tönügün xitay saqchiliri yash abdullajanning türmide ölgenlikini a'ilisige uqturghan.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.