Ilham toxtigha “Türk dunyasi erkinlik mukapati” bérilidighanliqi uning a'ilisidikilerni hayajanlandurdi

Uyghurlarning qanuniy heq - hoquqlirini telep qilghini üchün, xitay hökümiti teripidin “Bölgünchilik” bilen eyiblinip, türmige solan'ghan ilham toxtigha “Türk dunyasi erkinlik mukapati” bérilidighanliqi heqqidiki xewer uning a'ilisidikilerni hayajan'gha saldi. Bu ilham ependining bu yil 3 - ayda amérika qelemkeshler jem'iyiti teripidin bérilgen“Barbara goldmish erkin yézish mukapati”din kéyin ikkinchi qétim xelq'ara mukapatqa érishishi. Ilham toxtining amérikida oquwatqan qizi jewher we béyjingdiki ayali güzelnur ziyaritimizni qobul qilip, bu xewerni anglighandin kéyinki hayajanliq keypiyatini ipadilidi.

2014 - Yili b d t medeniyet, ilim - pen we ma'arip teshkilati teripidin “Isma'il gaspirali yili” élan qilinish munasiwiti bilen, türk dunyasi zhurnalistlar jem'iyiti teripidin tesis qilin'ghan “Isma'il gaspirali xelq'araliq insan heqliri we zhurnalistlar mukapati”ning meshhur Uyghur ziyaliysi ilham toxtigha bérilgenlik xewiri uning a'ilisidikilerni hayajan'gha saldi.

Ilham toxtining ayali güzelnur béyjingda xitay hökümitining teqip qilishi astida turuwatqini üchün, uning amérikida oquwatqan qizi jewher türkiyige bérip dadisi üchün bérilgen mukapatni tapshuruwélishqa teklip qilindi. Emma ilham toxtining qizi jewher we ayali güzelnurlar türlük sewebler tüpeylidin türkiyige bérip murasimgha qatnishish imkaniyiti bolmighini üchün, radi'omiz arqiliq 300 milyon türk dunyasigha özlirining minnetdarliqini bildürdi.

Béyjingda tughulup kichikidin xitay tilida ma'arip terbiyisi alghan jewher rawan én'giliz tili we Uyghur tillirida öz minnetdarliqini ipadilesh bilen bille, dadisi ilham toxtining Uyghurlar üchün adalet we barawerlik telep qilghanliqini, uning gunahsiz ikenlikini tekitlep, xitay hökümitining öz xataliqini tonup, dadisi ilham toxtini shertsiz qoyup bérishi kéreklikini tekitlidi.

Melum bolushiche 1 - noyabir tarqitilidighan “Türk dunyasi erkinlik mukapati” ni yene, shimali siprus türk jumhuriyiti dölet bashliqi derwish eroghlu, qirim tatarlirining lidiri mustafa jemil qirimli'oghlu, ezerbeyjan parlamént ezasi pashayéwa xanim we türkiyide tonulghan 7 yashliq Uyghur balisi mujahit qeshqer qatarliqlarghimu bérish qarar qilin'ghan.

Ilham ependining ayali güzelnur bu xewerning özini qattiq hayajanlandurghanliqini bildürüp, “Bu yil 3 - ayda amérika qelemkeshler jem'iyiti ilhamgha “Barbara goldmish erkin yézish mukapati” ni bergen chaghdimu a'ilimiz üchün bayram bolghan idi. Ilham türmide put - qoligha kishen sélinip qattiq azap tartiwatqan bu künlerde uning dunya xelqi teripidin qedirlinishi méni cheksiz hayajan'gha saldi” dédi.

Güzelnur xanim sözini dawamlashturup, xitay hökümiti ilham toxtini atalmish “Bölgünchilik we térrorluqqa qutratquluq qilish” bilen eyiblep türmige solighan, a'ilisini qattiq teqip astigha alghan bu éghir bu künlerde, ilham ependining xelq'arada qedirlinishi we mukapatqa érishishi adalet we heqqaniyetning yenila üstün turidighanliqining ispati ikenlikini tekitlidi.

Hörmetlik radi'o anglighuchi dostlar 1 - noyabir küni türkiyining bartin wilayitide mukapat bérish murasimi ötküzülidu.Radi'omizning türkiyidiki muxbirliri kéyinki nöwetlik xewerliride 1 - noyabirdiki murasimning emiliy ehwali heqqide dawamliq melumat béridu.