B d t “Kishilik hoquq, démokratiye, qanun bilen idare qilish munbiri” de Uyghurlar mesilisi otturigha qoyuldi
2016.11.22
Bügün Uyghur wekilliri b d t “Kishilik hoquq, démokratiye, qanun bilen idare qilish munbiri” yighinida Uyghurlar mesilisini otturigha qoyghan.
D u q bash katipi dolqun eysa ependining bügün jenwedin bergen melumatigha asaslan'ghanda, 21-noyabir b d t ning jenwediki bash shtabida bashlan'ghan tunji nöwetlik “Kishilik hoquq, démokratiye, qanun bilen idare qilish munbiri” yighinining ikkinchi küni, bügün u, Uyghurlargha wakaliten söz qilish pursitige ériship, b d t ning yuqiri derijilik emeldarliri, herqaysi döletlerning b d t da turushluq bash elchiliri, xelq'ara kishilik hoquq teshkilatlirining wekilliri, qanunshunaslar, mutexessisler bolup yüzlerche kishi qatnashqan bu chong yighinda Uyghurlar mesilisini etrapliq otturigha qoyghan.
Dolqun eysa ependining bildürüshiche, chüshtin burunqi yighindin kéyin, u b d t da ikki muhim uchrishish ötküzgen. Buning biri, shiwétsiye tashqi ishlar ministirliqi teripidin kishilik hoquq mesililiri boyiche b d t gha elchi bolup teyinlen'gen anika ben dawid xanim qatarliqlar bilen bolghan söhbet, yene biri, b d t kishilik hoquq aliy komissarliqi sherqiy jenubi asiya bölümining mes'uli joti sandira xanim we uning hemrahliri bilen bolghan söhbet.
Dolqun eysa ependi shiwétsiye elchisi anika ben dawid xanim bilen bolghan söhbitide Uyghurlar mesilisi we Uyghur diyarining nöwettiki weziyiti heqqide uninggha tepsiliy melumat bergen. U yene söhbet jeryanida Uyghur diyarida nöwette yürgüzülüwatqan bir qisim gheyriy siyasetler, xitayning türlük qanun mizanliri heqqidimu toxtilip ötken.
Dolqun eysa ependi b d t emeldari joti sandira xanim bilen bolghan söhbitide, Uyghurlargha da'ir bezi muhim mesililerni söz témisi qilghan. U sözide, hazir xitay türmiside erziyet chékiwatqan bir qisim Uyghur diniy zatliri we ziyaliyliri heqqide konkrétni toxtalghan. U ilham toxti mesilisini alahide tilgha élip, b d t aliy komissari pransis al hüseyin ependining ilham toxtigha martin ennalis mukapatini öz qoli bilen teqdim qilghanliqidin Uyghurlarning köp memnun bolghanliqini bildürgen.
D u q wekillirining b d t diki pa'aliyetliri bir hepte dawamlishidighan bolup, dolqun eysa ependining bildürüshiche, ular türlük mezmunlardiki yighinlargha qatnashqandin sirt, muhimi b d t ning yuqiri derijilik emeldarliri we bir qisim gherb döletlirining b d t diki alahide elchiliri bilen söhbetler ötküzidiken.