Yürek késilide öldi déyilgen bezi saqchi“Qehriman” larning oqta ölgenliki perez qilinmaqta

Xitay terep yürek késilide öldi, dep élan qilghan atalmish “Saqchi qehrimanliri” heqqidiki muxbirimizning éniqlashliri dawamida asasiy qatlamdiki saqchi we ahalilerning bu qehrimanlarning kimliki we ish - izliridin xewersiz ikenliki ashkarilan'ghan idi. Bu ehwal heqqide pikir bayan qilghan siyasiy közetküchi, doktor qahar barat ependi, munche köp kishining yürek késilide ölüshining gumanliq ikenlikini otturigha qoydi. Sabiq saqchi xadimi yolwas ependimu, mezkur saqchilarning buyruqni ijra qilmighanliqi üchün étiwétilgenliki yaki xata étip tashlan'ghan ehwalda qehriman dep élan qilinip, weziyetning perdazliniwatqanliq éhtimalliqini ilgiri sürdi.

Doktor qahar barat ependining qarishiche, 33 “Qehriman” din 17 nepirining yürek késili qozghilip ölüshi binormal bir ehwal. Bu ishta choqum bir dölet siri, dölet mexpiyetliki mewjut, yeni xitay dölet organliri ötküzgen bir jinayet perdazliniwatqan bolushi mumkin.

Bizning tünügünki we aldinqi künki programmimizdin melum bolghan, Uyghur rayonidiki ahaliler we saqchi xadimlirining, mezkur “Qehriman” larning kimliki we ish - izliridin xewersizliki, doktor qahar barat ependining yuqiriqi pikrining toghriliqini delillimekte. Shunga biz qahar ependige qayta téléfon qilip, mumkinchiliki bolghan ölüm sewebliri heqqide texminlirini soriduq.

Qahar ependining déginidek, xitay terepning weqelerde ölgen öz xadimlirining ölüm sewebi heqqide yalghan melumat bérishi burunmu yüz bergen.

2014 - Yili 7 - ayda “Yeken élishqu weqesi” de yéza bashliqi ghulam toxti bilen sékrétar abdughéni turdi saqchilarning oqida ölgen bolsimu, da'iriler ularni “Térrorchilar öltürdi” dep xewer qilghan, u ikkisigimu “Qehriman” dep nam bérip matem murasimi ötküzgen. Emma weqedin kéyinki éniqlashlirimiz dawamida ularning isyanchilar bilen birlikte qoshup étiwétilgenliki ularning ayalliri teripidin ashkarilan'ghan.

28 - Iyul yeken weqeside ölgen döngbazar yéziliq partkom intizam tekshürüsh sékrétari abdughéni turdining ayali: “Yoldishimning bedinidin 4 pay oqning izini kördüm, kiygen gangsiridiki töshüktimu köyük izi bar, hökümet bularni térrorchilar öltürdi dégen, ularning qorali bolmisa qandaq yoldishimni ular öltürgen bolidu, ölgen xenzularning héchqaysisi oqta ölmeptu, oqta ölgenlerning hemmisini saqchilar atqan gep.”

Yéza bashliqi ghulam toxtining ayali: “Yoldishim saqchilargha ‛bizni atmanglar, biz özünglarning adimi‚ dep saqchilargha labada yalwuruptu, shundaq tursimu 50 métir ariliqtin perqlendürmey qoshup étiwétiptu.....”

Burun Uyghur rayonida saqchi xadimi bolup ishligen, kéyin wezipisidin istépa bergen, nöwette chet'elde yashawatqan yolwas ependi, özi körgen - bilgenlirige asasen, yoshuruluwatqan ölüm sewebliri heqqide öz perezlirini otturigha qoydi.

Yuqirida xitay terep yürek késilide öldi dep élan qilghan 17 neper saqchi xadimining bezilirining oqta ölgenlik yaki bashqa usulda yoqitiwétilgenlik éhtimalliqi heqqide siyasiy közetküchilerning perezlirini anglidinglar.