Wiskansin uniwérsitétida échilghan türkiy tilliri yazliq programmisida Uyghur tili öginidighanlar köpeygen

Muxbirimiz qutlan
2015.07.29
amerika-uyghur-oqughuchilar-wisconsin-1.jpg Amérikining wiskansin uniwérsitétide échilghan orta asiya türkiy tilliri yazliq programmisida Uyghurche öginiwatqan amérikiliq oqughuchilar
RFA/Qutlan


Uyghur mesilisining dunyawiylishishi shundaqla amérika taratqulirida Uyghurlar heqqidiki xewer we melumatlarning köpiyishige egiship, Uyghur tili öginidighan amérikiliqlarmu köpiyishke bashlighan.

Melum bolushiche, amérikining wiskansin uniwérsitétide tesis qilin'ghan ottura asiya türkiy tilliri programmisi jem'iy 5 yilliq programma bolup, bu 3-qétimliqi iken.


Bu yil mezkur programma terkipide Uyghur tili öginishke tizimlatqan amérikiliq oqughuchilar bashqa türkiy tillirigha qarighanda köp sanni teshkil qilghan.

Biz bu munasiwet bilen mezkur programmida Uyghur tili öginiwatqan we özige “Arslan” dégen Uyghurche isim qollan'ghan amérikiliq aliy mektep oqughuchisini ziyaret qilduq. U özining orégon uniwérsitétidin kelgenlikini, Uyghur tilini dawamliq öginish arzusi barliqini bildürdi.

Amérikining téksas shtatidin kélip Uyghurche öginiwatqan we özige “Seper” dep Uyghurche isim qoyghan yene bir 14 yashliq toluqsiz ottura mektep oqughuchisimu Uyghur tilida ziyaritimizni qobul qildi. U özining Uyghurlar yurtigha barghanliqini, ürumchi, qeshqer, turpan, aqsu qatarliq jaylarda ziyarette bolghanliqini shundaqla kelgüsidimu Uyghurlar wetinige bérish arzusi barliqini, Uyghur tilining güzel bir til ikenlikini bildürdi.

Arqidin mezkur yazliq programmida Uyghur tilidin ders bériwatqan doktor qurban turan ependi ziyaritimizni qobul qildi.

Uning bildürüshiche, bu wiskansin uniwérsitétida teshkillen'gen 3 - qétimliq türkiy tilliri boyiche yazliq til öginish programmisi iken. Bu yil Uyghur, qazaq we özbek tillirida kurs teshkillen'gen bolup, Uyghur tili öginishke tizimlatqan oqughuchilar eng köp sanni teshkil qilidiken. Uning üstige, oqughuchilarning Uyghur tili öginish qizghinliqi nahayiti yoqiri bolup, Uyghur tili bilen bir waqitta yene Uyghur medeniyiti, tarixi, edebiyat - sen'iti we diniy adetlirigimu qiziqishi küchlükken.

Axirida biz, wiskansin uniwérsitétida üch yildin buyan orta asiya turkiy tilliri boyiche yazliq til öginish programmisni teshkilligen proféssor ulay shamil oghlini ziyaret qilduq.

U ziyaritimiz jeryanida, her yili Uyghur tili öginishke tizimlitidighan amérikiliq oqughuchilarning köpiyiwatqanliqini, ularning ichide kelgüside Uyghur tetqiqati bilen shoghullanmaqchi bolghanlar, amérika hökümet organlirida we yaki axbarat orunlirida ishleydighanlarningmu barliqini ilgiri sürdi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.