Almutida Uyghur baliliri üchün chiqirilghan “Ghunche” zhurnilining 5 yilliqi xatirilendi

“Ghunche” zhurnilining 5 yilliq xatire murasimidin bir körünüsh. 2017-Yil 2-noyabir, almata, qazaqistan.

2-Noyabirda almutadiki “Aqyol” réstoranida “Ghunche” balilar zhurnilining 5 yilliqini tebriklesh murasimi bolup ötti. Uninggha ziyaliylar, jem'iyetler, bilim we tetqiqat institutliri, ammiwi axbarat wasitiliri wekilliri, almuta shehiri we almuta wilayitining panfilof, Uyghur, emgekchiqazaq we talghir nahiyeliridiki Uyghur mekteplirining mu'ellimliri we oqughuchiliri qatnashti. Murasim yash sen'etkarlar teripidin ijra qilin'ghan milliy naxsha-ussullar bilen bashlandi.

Yighinni uyushturghuchilar “Ghunche” zhurnilining tesis qilinish tarixi we uning besh yil mabeynide emelge ashurghan ish-pilanliri, meqset-wezipiliri heqqide tepsiliy melumat berdi. 

Deslep sözge chiqqan qazaqistan yazghuchilar ittipaqi yénidiki Uyghur edebiyati kéngishining bashliqi exmetjan hashiri “Ghunche” zhurnilining ottura asiyada Uyghur tilida chiqidighan birdin-bir balilar neshr epkari ikenliki we uning kélechikining zor ikenlikini alahide tekitlidi. U, öz sözide pütkül murasim qatnashquchilirini mezkur zhurnalgha mushteri bolushqa chaqirdi. 

Almuta wilayiti “Örléu” mu'ellimlerning kespini mukemmelleshtürüsh institutining bölüm bashliqi aristanbék sariyéf zhurnalning yash ewladlarni terbiyileshtiki roligha yuqiri baha bérip, bu murasimgha semimiy niyet we tilekliri bilen kelgenlikini ilgiri sürdi. U shundaqla zhurnal sehipiliride Uyghur xelqi ichidin chiqqan eng talantliq yazghuchilar ijadiyitidin balilarni méhribanliqqa, insanperwerlikke, wetenperwerlikke dewet qilidighan yuqiri süpetlik eserler bérilgen teqdirde Uyghur xelqining menggü yoqalmaydighanliqini, chünki uning tomurining intayin chongqur ikenlikini bildürdi. 

Radi'omiz ziyaritini qobul qilghan “Tinchliq dunyasi” xelq'ara qazaq ijadiy birleshmisining prézidénti, akadémik abén nurmanof her xil milletler, shu jümlidin Uyghurlarning medeniy ishlirini qollap-quwwetlesh, bolupmu yash ewladlarni righbetlendürüshning birleshmining asasiy meqsiti ikenlikini otturigha qoyup, mundaq dédi: “Biz ‛ghunche‚ zhurnilining besh yilliq bayrimini tebriklesh üchün ishlirimizni tashlap, mushu murasimgha qatniship olturimiz. Biz zhurnalning ijra'iy mudiri dilarem jelilowagha sholoxof namidiki médalni tapshurduq, chünki bu singlimiz özining zérekliki, talanti we sewirliki bilen chong ish qiliwatidu. Biz pütkül insanlar aldida bu zhurnalni ülge qilishtinmu tartinmaymiz. Chünki, bu zhurnalning terbiyiside talay yazghuchi we sha'irlar, alimlar, erbablar yétilip chiqidighinigha ishinimen. Men zhurnalgha yenimu chong utuqlarni tileymen.”

Sha'ir abliz hézimning pikriche, qazaqistan jumhuriyitining musteqil bolushidin kéyin öz pikrini erkin izhar qilish pursiti peyda bolghan idi. U mundaq dédi: “Balilar edebiyati bar edebiyatning kélechiki bolidu. Her qandaq edebiyat kelgüsining bar-yoqluqi ene shu balilar edebiyatigha baghliq bolidu. ‛ghunche‚ ning pursitidin biz paydilinishimiz kérek. Uning istiqbali parlaq bolidu. ‛ghunche‚ zhurnilini biz achqan iduq. Uning porek bolushi, porekliktin échilishigha biz her jehettin tirishchanliq körsitishimiz kérek.”

Murasimda sözligüchiler “Ghunche” zhurnilining milliy edebiyatni, medeniyetni, örp-adetlerni terghib qilishtiki, bolupmu Uyghur-qazaq dostluq alaqilirini kücheytishtiki roligha toxtilip, zhurnal oqurmenlirining téz köpiyishini tilidi. Ular shundaqla zhurnalning qazaqistan hökümiti ilgiri sürüwatqan xelqler dostluqi, milletler ara razimenlik, birlik idiyilirini terghib qilishtiki rolinimu alahide tekitlidi.

“Ghunche” zhurnilining bash muherriri, yazghuchi awut mesimofning qarishiche, zhurnal chiqirish teshebbuskari dilarem jelilowa bolup, u ataqliq ziyaliy a'ilisidin kélip chiqqan. A. Mesimof zhurnalni chiqish tarixigha toxtaldi.

A. Mesimofning éytishiche, oqughuchilarning ijadiyiti zhurnal mezmunining, zhanirlirining, mawzulirining belgilinishige yol achti. U qazaq oqughuchilirining mezkur zhurnal arqiliq Uyghur edebiyatigha bolghan qiziqishining ösüshini alahide tekitlep, bu yerde ikki xelq dostluqining namayan boluwatqanliqini körsetti. 

Murasimda “Ghunche” zhurniligha meniwi we maddiy yardem körsetkenler bahaliq sowghilar bilen teqdirlendi. Uningda shundaqla zhurnal élan qilghan ijadiyet musabiqisining ghaliblirimu teshekkürnamiler we sowghilar bilen mukapatlandi. Ularning arisida almuta wilayitining Uyghurlar zich olturaqlashqan köpligen yéziliridiki milliy mekteplerning oqughuchiliri boldi.