"uyghuryar fondi" 2018-yilliq oqush yardem puli iltimasini qobul qilishqa bashlidi

Ixtiyariy muxbirimiz erkin tarim
2017-12-14
Élxet
Pikir
Hembehr
Print
  • Print
  • Hembehr
  • Pikir
  • Élxet
"uyghuryar fondi" uyghur oqughuchilarning yéngi mewsumluq oqush yardem puli iltimasini qobul qilish toghrisidiki élani.
uyghuryar.org

Türkiyediki aliy mekteplerde 2017-yilliq birinchi mewsumluq dersler axirliship, 2018-yilliq oqush yiligha qedem bésish aldida turghan bügünki künde "uyghuryar fondi" uyghur oqughuchilarning yéngi mewsumluq oqush yardem puli iltimasini qobul qilishqa bashlidi.

Mezkur oqush mukapat puligha türkiyede toluq kurs, magistirliq we doktorluqta oquwatqanlar uyghur oqughuchilar iltimas qilsa bolidighan bolup, tizimlitish waqti 2017-yili 30-dékabir künidin 2018-yili 10-féwralghiche dawamlishidiken.

Biz bu heqte tepsiliy melumat igilesh üchün "uyghuryar fondi" ning istanbuldiki wekili batur qaraxanli ependi, mezkur fondning maliyesige mes'ul kishiliridin memet éli ependi we ötken yili oqush mukapat puligha érishken oqughuchilar bilen söhbet élip barduq.

Batur qaraxanli ependi oqush yardem puligha iltimas qilghuchilarning www. Uyghuryar. Org tor bétidiki iltimas qilish jedwilini estayidil oqughandin sirt, yene buninggha munasiwetlik bir yürüsh matériyallarni teyyarlishi kéreklikini bayan qildi.

Batur qaraxanli ependi oqush yardem sommisining toluq kurs oqughuchiliri üchün ayda 700 lira, magistirliq oquwatqan oqughuchilar üchün ayda 800 lira, doktorluq oquwatqan oqughuchilar üchün ayda 1200 lira bérilidighanliqini bayan qildi.

"uyghuryar fondi" ning maliye ishlirigha mes'ul boluwatqan memet éli ependi bu heqtiki ziyaritimizni qobul qilip, türkiyege oqushqa kélip weten bilen alaqisi üzülüp qalghan, iqtisadiy jehettin qiyinchiliqqa uchrawatqan köp sandiki uyghur oqughuchi barliqini, ötken yili az bir qismigha oqush mukapati béreligenlikini, bu qétim mukapat bérilidighanlarning sanini köpeytishni pilanlawatqanliqini bildürdi.

Memet éli ependi "uyghuryar fondi" ni qurghan kishilerning iqtisadiy ehwali yaxshi, meripetperwer uyghur ziyaliyliri ikenlikini, i'ane qilin'ghan pullarni yardemge eng mohtaj, yaxshi oquwatqan uyghur oqughuchilargha yetküzüp béridighanliqini tekitlidi.

Hazir türkiyening melum bir uniwérsitétida magéstirliqta oquwatqan bir uyghur oqughuchi özining "uyghuryar fondi" ning oqush mukapat puli bilen oquwatqanliqini, hazir köp sandiki uyghur oqughuchilarning iqtisadiy jehettin éghir qiyinchiliqta ikenlikini, shunga pütün dunyadiki uyghurlarning yardem qilishini ümid qilidighanliqini bayan qildi.

"uyghuryar fondi" 2016-yili 10-ayda meripetperwer 7 neper uyghur teripidin qurulghan bolup, hazirghiche iqtisadiy jehettin qiynilip qalghan köp sandiki uyghur oqughuchilargha yardem qilip kelmekte. Mezkur fond yene misirdin türkiyege kélishni istigen 62 oqughuchigha ayropilan béliti élip bergen. Ular yene uyghur oqughuchilargha bolghan yardemni sistémilashturush üchün bu yil 10-ayda mexsus oqush mukapat puli tesis qilghan idi.

Toluq bet