Istanbuldiki Uyghur yesliside oqughuchilar sani hessilep ashti

Ixtiyariy muxbirimiz arslan
2017.09.21
istanbul-yesliy-uyghur-balilar.jpg Istanbulidiki Uyghur yeslisi oynawatqan Uyghur balilar. 2017-Yili 19-séntebir, türkiye.
RFA/Arslan

Istanbulda yashawatqan Uyghur muhajirlar perzentlirini milliy kimlik we dini étiqad bilen yétishtürüshke ehmiyet bérip kelmekte.

Istanbulidiki Uyghur yeslisi bu mewsum yene yéngidin 50 gödekni qarshi aldi. Shuning bilen mezkur yeslidiki oqughuchi sani 120 ge yetti. Bu yeslimu bashqa türk mekteplirige oxshashla 19-séntebir tunji künini kütüwaldi.

Yesli oqutquchisi ayishe xanimning éytishiche, bu mewsummu yeslidiki Uyghur perzentlirige “Heptiyek”, ana til, wetenni tonushturush, milliy kimlik we diniy étiqadqa alaqidar dersler orunlashturulghan.

Men yeslige barghanda oqughuchilar chong zalda oyun oynawatqan bolup, balilarning beziliri sün'iy atqa minip oynisa beziliri nöwet bilen sérilip oynawatqan iken, bir qisim balilar bir-birlirige kichik toplarni étiship oynawatqan iken. Men balilarning warang-churung qilip sekriship xushal oynashlirini körüp qattiq tesirlendim, chünki muhajirettiki hayatta xushal ötmek, oynimaq her kimge nésip bolidighan qismet emeslikini hemmimiz chüshinip yétimiz.

Sorighan so'allirimgha rawan Uyghur tilida jawab bergen kichik gödekler méni tolimu hayan'gha saldi. Bularning biri özining kelgüside doxtur bolidighanliqini közlirini nur chanighan halda bayan qilsa, yene biri özining chüchük tilda shé'ir déklamatsiye qilishi bilen méni özige bekla ram qildi.”

Yesli mudiri xurshide xanimning bildürüshiche, bu yil yeslidiki oqughuchi sani yillardikidin bir hesse köpeygen. Bularning bir qismi hökümet bashqurushidiki mektepte oquydighan bolsimu, biraq mekteptin qaytqanda bu yeslige kélip telim alidiken.

Xurshide xanimning éytishiche yene, mezkur yeslige bu yil tizimlatqan oqughuchilar sanining bir hesse köpiyishige yeslidiki milliy kimlik dersi qatarliq derslerning mukemmel sheklide ötilishi türtke bolghan.

Sherqiy türkistan ma'arip we hemkarliq jem'iyitining tor bétide bildürüshiche, zeytinburnudiki bu yesli sherqiy türkistan ma'arip we hemkarliq jem'iyitining tesis qilishi bilen 2008‏-yili qurulghan bolup, bu yesli zeytinburnuda 5 qewetlik bir binada Uyghur perzentlirini milliy we dini jehette yétishtürüsh üchün xizmet qilip kelmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.