Anilar “Ana til longqisi” tarqatti

Jenubiy awstraliyediki Uyghur ana til mektipi oqughuchiliri we oqutquchilirigha “Tengritagh xanim qizlar guruppisi” ana til longqisi we teqdirname teqdim qildi. 2017-Yili 9-dékabir.

Jenubiy awstraliyediki Uyghur ana til mektipi oqughuchiliri we oqutquchilirigha “Tengritagh xanim qizlar guruppisi” ana til longqisi we teqdirname teqdim qildi. 2017-Yili 9-dékabir.

2017-Yili 9-dékabir jenubiy awstraliyediki Uyghur ana til mektipi oqughuchiliri we oqutquchilirigha “Tengritagh xanim qizlar guruppisi” ana til longqisi we teqdirname teqdim qildi.

Awstraliyening jenubidiki adéleyd shehirige jaylashqan Uyghur ana til mektipi bügün Uyghurche kiyin'gen balilarning shat külkiliri, Uyghur pushuruqlirining xushbuy hidi, renggareng etles köngleklerni kéyishken Uyghur qiz-ayallarning gülgün smasi bilen bayram tüsige kirgen idi. Sehnining yan teripige tizilghan ana til longqisi we teqdirnamilerge balilar heweslinip qarishatti.

Sehnige balilarning söyümlük dosti, bu yilliq ana til mekteplerdiki oqutquchilarni bahalashta mukapatqa érishken gülnur tursun sehnige chiqip, balilar we ata-anilarning bu güzel sorun'gha jem bolghanliqigha rehmet éytti hemde pa'aliyetni teshkilleshke küch chiqargha we iqtisadiy yardem bergen “Tengritagh xanim-qizlar guruppisi” gha minnetdarliq bildürdi. Pa'aliyet yuqiri yilliqtiki oqughuchilar orunlighan dölet marshi bilen bashlandi. Sorundiki hemmeylen orunliridin turushup ong qolini köksige qoyup birlikte marishqa egeshti.

Pa'aliyette oqughuchilar naxsha, usul, déklamatsiye, chaqchaq, xor qatarliq nomurlarni orunlidi. Axirida pa'aliyetke qatnashqan balilargha “Tengritagh xanim qizlar guruppisi” ana til longqisi teqdim qildi. Ana til mektipidin her bir baligha teqdirname bérildi.

Oqutquchilarghimu xatire buyumi hediye qilinip ata-anilarning teshekküri bildürüldi.

Pa'aliyetni teshkilleshke qatnashqan “Tengritagh xanim qizlar guruppisi” din yultuz tiyipjan xanim Uyghur balilarning jushqun naxsha-usulliri, qiziqarliq letipiliri we jarangliq déklamatsiyeliridin alghan hayajanlirini bayan qildi.

Mektep mudiri zulpiye shemsidin xanim bu pa'aliyette nomur körsetken balilardin, bolupmu awstraliyede tughulghan Uyghur balilar rawan yadilap bergen chüchük hikaye we shi'érlardin bekmu tesirlen'genlikini bayan qildi.

Bu pa'aliyetke sahibxaniliq qilghan “Tengritagh xanim qizlar guruppisi” hazir yüzdin artuq ezagha ige bolup, Uyghur balilarning ana til, din we tenterbiye pa'aliyetlirini iqtisad bilen teminlep kéliwatqan iken. Bu guruppining aktipliridin yultuz tiyipjan xanim mezkur goruppining ömlüki, qizghinliqi we pidakarliqliri heqqide öz qarashlirini bayan qildi.

Awstraliye her qaysi milletlerning ana tilini saqlap qélishqa ehmiyet bérip kelgen bolup, dölet mekteplerni iqtisad bilen teminligendin bashqa türlük körekler, paratlar we bahalashlar arqiliq yerlik milletlerning medeniyetlirini saqlap qélishqa righbet bérip kelmekte iken.

Igilishimizche hazir awstraliyening sidniy, mélborin we adéleyd qatarliq üch shehiride Uyghur ana til mektipi bar bolup munewwer oqutquchilar we pidakar ata-anilar Uyghur perzentlerning ana tilini qoghdap qélishqa küch chiqarmaqta iken.