Gollandiyediki Uyghurlar sherq medeniyitini namayan qilish pa'aliyitige qatnashti

Ixtiyariy muxbirimiz pida'iy
2015.08.24
Uyghur-Medeniyet-kultur-namayendiliri.JPG Sherq medeniyitini namayan qilish pa'aliyitige qatnashqan Uyghurlar Uyghur medeniyitini tonushturush üchün körgezmige élip kelgen buyumliri. 2015-Yili 23-awghust, gollandiye.
RFA/Pida’iy

2015‏-Yili 23‏-awghust yekshenbe gollandiyening neyméyxn shehiridiki “Baghche muziyxanisi” da, sherq medeniyitini namayan qilish pa'aliyiti ötküzüldi.

Pa'aliyetke gollandiye we gérmaniyediki jem'iyet we shexslerdin- “Iraq türkmenliri jem'iyiti”, “Noghaylar jem'iyiti” we bashqa türk medeniyet namayendichiliri qatarida Uyghurlarmu teklip bilen qatnashti.

Uyghurlargha wakaliten mezkur pa'aliyetke ishtirak qilghan yawropa sherqiy türkistan ma'arip jem'iyitining aktipliri, Uyghur kiyim-kéchekliri, qol -hüner-sen'et buyumliri, medeniyet mirasliri we ikki jumhuriyetke alaqidar tarixiy resimlirini namayan qilip, mezkur “Baghche muziyxanisi”ning sayahetchilirige Uyghurlarning tarixi we bügünige alaqidar uchur berdi.

Sherq medeniyitining namayendiliridin karwanlar kélip chüshidighan deng shekildiki qorulardin birining témigha ay-yultuzluq kök bayraq ésildi.

Igilishimizche mezkur “Baghche muziyxanisi”gollandiyening gérmaniyege chégridash he'ilig shehirige jaylashqan esli bir tebi'iy sayahet baghchisi bolup, 2007‏-yildin bashlap sherq we gherbtiki yehudiy, xristi'an we islamdin ibaret üch chong dinning kültür-medeniyet namayendilirini bir yerge jemlep, üsti ochuq muziyxana uslubini yaratqan we yilning her peslide mu'eyyen bir medeniyetning namayan qilinishini dewriy qildurush arqiliq, yawropa miqyasida sayahetchilirini özige jelp qilip kelgen sayahet nuqtisi iken.

Ottura sherq islam medeniyitining namayan qilinishi her yili 8‏-aylargha orunlashturulghan bolup, bir qanche yildin béri bu pa'aliyetke aktip qatniship kéliwatqan iraqliq türkmen abbas agha Uyghur qérindashlirining bu pa'aliyetke ishtirak qilghanliqidin xursen bolghanliqini we her yili mushu yerde tekrar körüshüsh ümidi barliqini bildürüp: “ Salamdin kéyin, aldi bilen sherqiy türkistanliq qérindashlarning bu yerge teshrip qilghanliqigha rehmitimni bildürimen. Biz buni 4 yildin béri dawam qiliwatimiz. Kéler yéli téximu yaxshi bir pa'aliyet bolidu. Biz türkmenler dégen chéghimizda peqet iraqtiki we türkmenistandiki türkmenlernila emes, belki bizning ejdadimiz taki sherqiy türkistandin tartip adri'atik déngizigha qeder sozulghan tupraqlardiki qérindashlirimiz bilen tutashtur. Sizler bizning bizler hem sizlerning bir parchingiz bolghanliqimiz üchün, buninggha oxshash pa'aliyetlirimizni birlik barawerlik ichide yaxshi élip bériwatimiz. Shuninggha ishinimenki, sizlerningmu pa'aliyetliringizning barghanséri téximu güzel shekilde tereqqiy qilghusi. Sizlerningmu türlük pa'aliyetliringizge yardemde bolushqa her qachan teyyarmiz”, dédi.

Pa'aliyet shu yer waqti etigen sa'et 9 din, kech sa'et 6 ge qeder dawam qildi. Pa'aliyet ornining ewzellikidin zoqlan'ghan bir qisim Uyghurlar yiraq-yéqindin a'ilisi bilen jem bolup kélip, Uyghur kawipi bilen pa'aliyetni janlandurdi. Sayahetchilerdin beziliri Uyghur kawaplirigha éghiz tégip, maxtidi.

Ziyaritimizni qobul qilghan yawropa sherqiy türkistan ma'arip jem'iyitining mes'ulliridin obul qasim ependi pa'aliyet heqqide uchur berdi. Ishtirak qilghuchilardin abdullah ependi pa'aliyet heqqidiki tesiratini radi'o anglighuchilirimiz bilen ortaqlashti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.