Qazaqistandiki ataqliq kompozitor azad burhanof: Uyghurlar on ikki muqamgha hazirmu qiziqmaqta

Almatadiki nawa ansambili on ikki muqam teshwiqatini dawamlashturup kelmekte.

Melumki, Uyghurlarning klassik muzika sen'itining ölmes mirasi, Uyghur xelqining milliy ghururi on ikki muqam  2005-yili insaniyetning medeniy mirasi süpitide bilim, pen we medeniyet mesililiri boyiche birleshken döletler teshkilati -unescho tizimigha kirgüzülgen idi.

Uzun tarixqa ige bu yadikarliq, bolupmu yerken Uyghur xanliqi dewride dölet ghemxorluqi astigha élinip, deslepki qétim retlendi. Uning kéyinki waqitlarda yenimu rawajlinip, ammiwi rewishte pütkül Uyghur diyarigha hem Uyghurlar zich olturaqlashqan ottura asiyagha tarqilishida muqamchilar, talantliq naxshichilar hem sazendiler köp küch chiqardi. Bolupmu, mettayir hasanof, nurmuhemmet nasirof, sultanmurat rezemof, ghopur qadirhajiyéf we qadir razi muhemmetoflar bu jehette deslepkilerdin bolghan muqamchilardur.

On ikki muqam ottura asiyada, bolupmu ötkenki esirning 70-we 80-yilliri tashkenttiki özbékistan radi'o anglitish we téléwiziye dölet komitéti terkibidiki Uyghur naxsha-ussul ansambili hem almatadiki jumhuriyetlik Uyghur muzikiliq komédiye tiyatiri yénidiki “Nawa” ansambili teripidin keng da'iride teshwiq qilindi. Qazaqistandiki ataqliq kompozitor azad burhanofning melumatlirigha qarighanda, hazir ottura asiya boyiche peqet “Nawa” ansambilining kespiy muqamchiliri, shundaqla jay-jaylardiki köpligen heweskar sen'et ömekliri bu en'enini yenimu dawamlashturup kelmekte.

Radi'omiz ziyaritini qobul qilghan muqamshunas alim batur ershidinof we kompozitor azad burhanof bu heqte öz qarashlirini otturigha qoydi.