Istanbulda “Teklimakan Uyghur kitabxanisi” échildi

Türkiyede Uyghur nopusining köpiyishige, Uyghur tetqiqatining küchiyishige egiship kitabqa bolghan telepmu ösmekte.

Uyghurlarning bu telipini qandurush üchün “Teklimakan Uyghur neshriyati” kitabxana achti. Ötken hepte istanbulning zeytinburni rayonidiki eysa yüsüp aliptékin kochisida échilghan kitabxanigha teklimakan Uyghur neshriyati neshr qilghan kitablardin sirt, türkiyede we dunyaning herqaysi jaylirida neshr qilin'ghan Uyghurche, türkche in'glizche we erebche kitablarmu sétishqa sunulghan.

Biz kitabxanigha bérip kitabxanining xojayini we mezkur kitabxanigha kitab sétiwélish üchün kelgen Uyghurlargha mikrofonimizni uzattuq.

20 Yildin béri neshriyatchiliq ishliri bilen shughulliniwatqan abdujélil turan ependi kéyinki yillarda türkiyede, bolupmu istanbulda Uyghur nopusining köpiyishige egiship Uyghurche kitablargha bolghan telepningmu öskenlikini, Uyghurlarning shundaqla Uyghurlarni tetqiq qilghuchilarning telipini qandurush üchün bu kitabxanini achqanliqini bayan qildi.

Kéyinki yillarda chet'elde kitab yézip neshr qilduruwatqan Uyghurlarning sanimu köpeymekte. Buning bilen birlikte Uyghur diyarida köpligen kitab xitay hökümiti teripidin cheklenmekte. Abdujélil turan ependi teklimakan Uyghur kitabxanisida özliri neshr qildurghan kitablardin sirt “Wetende cheklen'gen kitablarni” mu qayta neshr qilip tarqitiwatqanliqini bayan qildi.

Abdujélil turan ependi “Teklimakan Uyghur kitabxanisi” da Uyghurlar we sherqiy türkistan toghrisida yézilghan türkche, in'glizche we erebche kitablarni sétiwatqanliqini éytti.

Undaqta Uyghur oqurmenler qandaq kitablargha köprek qiziqidu? abdujélil turan ependi Uyghurlarning köprek din we tarix heqqidiki kitablarni qiziqip éliwatqanliqini tekitlidi.

“Teklimakan Uyghur kitabxanisi” ning échilghanliqini tebriklesh üchün kelgen istanbuldiki Uyghur akadémiyesining re'isi ablimit qaraxan ependigimu mikrofonimizni sunduq. U, türkiyede Uyghurlarning neshriyatchiliq pa'aliyitini tunji bashlighan kishining abdujélil turan ikenlikini, uning kitab xezinisini mezkur kitabxana arqiliq Uyghurlargha achqanliqini bayan qildi.

Ablimit qaraxan ependi dunyaning bashqa jaylirida tapqili bolmaydighan nadir kitablarni “Teklimakan Uyghur kitabxanisi”din tapqili bolidighanliqini bayan qildi.

Uyghur ziyaliyliri “Teklimakan Uyghur kitabxanisi”din némilerni kütidu? doktor perhat tengritaghli ependi türkiyede bezi Uyghurche kitablarni türkchige, türkche kitablarni Uyghurchigha terjime qilip neshr qilip tarqitishning zörür ikenlikini tekitlidi.

Türkiyede neshriyatchiliq bilen shughulliniwatqan abdu'éziz ependi türkiyening istanbul shehiri dunyaning herqaysi jaylirida yashawatqan Uyghurlar eng köp ziyaret qilidighan jaylardin biri ikenlikini, istanbulgha kelgen Uyghurlarning bu kitabxanilarni ziyaret qilip kitab élip kétiwatqanliqini bayan qildi.

2014-Yilidin hazirghiche istanbulning zeytinburni rayonida “Sultan satuq bughraxan kitabxanisi”, “Qutatghu bilik kitabxanisi” we “Teklimakan Uyghur kitabxanisi” namida 3 kitabxana échildi.