Мюнхендики мәдәнийәт-сәнәт көрикидә уйғурларму номур көрсәтти

4-Март мюнхен шәһиридә өткүзүлгән һәр милләт хәлқиниң мәдәнийәт-сәнәт көрикидә уйғур өсмүрлириму сәнәт номурлирини көрситип алқишқа еришти.

Мюнхен шәһәрлик мәдәнийәт идариси һәр йили уюштуруп келиватқан шәһәрниң һәрқайси районлиридики һәр милләт хәлқиниң мәдәнийәт-сәнәт номурлирини җамаәт сорунлирида ашкара намаян қилиш паалийити бу йил 40-йилиға қәдәм басқан болуп, бу қетимқи паалийәткә мюнхенда яшаватқан уйғур фолклор тәтқиқатчиси нурниса ханим вә мюнхен шәһиридики яш өсмүрләрдин тәркиб тапқан халисә ханим йетәкчилики уйғур ансамбилиниң артислириму тәклипкә бинаән иштирак қилған.

Мюнхен шәһиридики уйғур яш өсмүрләрдин тәркиб тапқан халисә ханим йетәкчиликидики уйғур ансамбили иштин сиртқи сәнәт өмики болуп, бу өмәкниң артислири мюнхен вә етираптики шәһәрләрдә сәнәт номурлирини көрситип, уйғур сәнитини германийә җамаитигә тонутуп келиватқиниға 10 йилдин артуқ вақит болған. Нәпис уйғур усули вә музикилири йилдин-йилға көплигән германларниң қизиқишини қозғап, мюнхен шәһиридә өткүзүлүп келиватқан түрлүк шәкилләрдики сәнәт көрәклиригә тәклип қилинидиған һалға йәткән.

Уйғур өсмүрлирини классик әдәбият вә сәнәт билимлири билән тәрбийиләшкә көңүл бөлүп келиватқан уйғур фолклор тәтқиқатчиси нурниса ханимму халисә ханимниң сәнәт гурупписи билән зич һәмкарлишип, ят милләтләргә уйғур тили, мәдәнийити, сәнитини тонутуш йолида тиришчанлиқлар көрситип кәлмәктә.

4-Март күни шәһәрниң ават сода вә саяһәт мәркизи болған шундақла шәһәрлик һөкүмәтниң хизмәт бинаси җайлашқан мәрйәм мәйданида өткүзүлгән бу сәнәт көрики паалийитидә шәһәрлик мәдәнийәт идариси уйғурлар үчүн йерим саәт вақит аҗритип бәргән. Паалийәт мәйданидин зияритимизни қобул қилған уйғур фолклори тәтқиқатчиси нурниса ханим бу қетим паалийәт һәққидә мәлумат берип, уйғурлар көрсәткән номурларниң яхши баһаларға еришкәнликини әскәртти.

Уйғурларниң сәнәт номури башлиништин илгири, нурниса ханим уйғурлар һәққидә тамашибинларға қисқичә чүшәнчә берип өткән. Уйғурларниң һәр қетимлиқ сәнәт паалийәтлиридә алди билән уйғур кимлики һәққидә мәлумат бериш бир әнәнә шәклидә давамлишип кәлмәктә.

Нурниса ханимниң билдүрүшичә, бу қетимқи сәнәт паалийитидә уйғур өсмүрлири төт номур орунлиған. Сәнәткарлар кийим алмаштурғучә болған қисқа вақитлардин үнүмлүк пайдиланған нурниса ханим, бу арида германийә уйғур аяллар комитетиниң һазирға қәдәр елип барған паалийәтлиридин мәлуматлар берип, әтраптики аммиға уйғур мәсилисини йәниму илгирилигән һалда тонутушқа теришқан.

Мюнхендики уйғур ансамбили өткән бир йилда нурниса ханим билән һәмкарлишип көп қетим сәнәт номурлирини көрсәткән. Нурниса ханимниң билдүрүшичә, әгәр шәһәрлик мәдәнийәт идариси қоллиған тәқдирдә 2017-йили ичидә йәнә бир йүрүш сәнәт паалийәтлирини мәйданға елип чиқидикән.

Нурниса ханим зияритимиз хатимисидә, өзиниң баш штаби мюнхен шәһиридә болған д у қ, явропа шәрқий түркистан бирлики тәшкилати вә уйғур аяллири комитетиниң өз-ара һәмкарлишип паалийәтләр елип бериватқанлиқидин мәмнунлуқини билдүрди.

Сүрәттә: 4-март мюнхен шәһиридә өткүзүлгән һәр милләт хәлқиниң мәдәнийәт-сәнәт көрикидә уйғур өсмүрлири номур көрсәтмәктә.