ﺋﺎﻓﻐﺎﻧﯩﺴﺘﺎﻥ، ﺋﯩﺮﺍﻧﻨﻰ ﺋﻪﻳﯩﺒﻠﯩﺪﻯ

ﺷﻪﻧﺒﻪ ﻛﯜﻧﻰ ﺋﺎﻓﻐﺎﻧﯩﺴﺘﺎﻥ ﺩﺍﺋﯩﺮﯨﻠﯩﺮﻯ، ﺋﯩﺮﺍﻧﻨﻰ ﺗﺎﻟﯩﺒﺎﻧﻼﺭﻧﻰ ﻗﻮﺭﺍﻝ ﺑﯩﻠﻪﻥ ﺗﻪﻣﯩﻨﻠﻪﯞﺍﺗﯩﺪﯗ، ﺩﻩﭖ ﺋﻪﻳﯩﺒﻠﯩﺪﻯ.

ﻓﺮﺍﻧﺴﯩﻴﻪ ﺋﺎﮔﯧﻨﺘﻠﯩﻘﯩﻨﯩﯔ ﺧﻪﯞﻩﺭ ﻗﯩﻠﯩﺸﯩﭽﻪ، ﺋﺎﻓﻐﺎﻧﯩﺴﺘﺎﻥ ﺳﺎﻗﭽﻰ ﺩﺍﺋﯩﺮﯨﻠﯩﺮﻯ، ﭘﻪﻳﺸﻪﻧﺒﻪ ﻛﯜﻧﻰ ﻓﺮﺍﻩ ﺋﯚﻟﻜﯩﺴﯩﺪﻩ، ﺗﺎﻟﯩﺒﺎﻧﻼﺭﻏﺎ ﻗﺎﺭﺷﻰ ﺋﯧﻠﯩﭗ ﺑﺎﺭﻏﺎﻥ ﺑﯩﺮ ﺗﺎﺯﯨﻼﺵ ﻫﻪﺭﯨﻜﯩﺘﻰ ﺟﻪﺭﻳﺎﻧﯩﺪﺍ، ﻧﯘﺭﻏﯘﻧﻠﯩﻐﺎﻥ ﻗﻮﺭﺍﻝ-ﻳﺎﺭﺍﻕ ﻗﻮﻟﻐﺎ ﭼﯜﺷﯜﺭﮔﻪﻥ ﺑﻮﻟﯘﭖ، ﺑﯘ ﻗﻮﺭﺍﻟﻼﺭﻧﯩﯔ ﻛﯚﭖ ﻗﯩﺴﻤﻰ ﺋﯩﺮﺍﻧﺪﺍ ﻳﺎﺳﺎﻟﻐﺎﻥ ﺋﯩﻜﻪﻥ.

ﻓﺮﺍﻩ ﺋﯚﻟﻜﯩﺴﯩﻨﯩﯔ ﺑﺎﺷﻠﯩﻘﻰ ﻣﯘﻫﯩﺘﺘﯩﻦ ﺑﺎﻟﯘﭼﻨﯩﯔ ﺋﯧﻴﺘﯩﺸﯩﭽﻪ، ﻣﻪﺯﻛﯘﺭ ﻗﻮﺭﺍﻟﻼﺭ، ﻳﯧﻘﯩﻨﺪﺍ ﺋﯩﺮﺍﻥ ﺋﺎﺭﻗﯩﻠﯩﻖ ﻓﺮﺍﻩ ﺋﯚﻟﻜﯩﺴﯩﮕﻪ ﻛﯩﺮﮔﻪﻥ. ﺋﯘ ﺷﻪﻧﺒﻪ ﻛﯜﻧﻰ ﻣﯘﺧﺒﯩﺮﻻﺭﻏﺎ ﺑﻪﺭﮔﻪﻥ ﺑﺎﻳﺎﻧﺎﺗﯩﺪﺍ، "ﺑﯘ ﻗﻮﺭﺍﻟﻼﺭﻧﯩﯔ ﺋﯩﺮﺍﻥ ﻫﯚﻛﯜﻣﯩﺘﯩﺪﯨﻦ ﺧﻪﯞﻩﺭﺳﯩﺰ، ﺋﺎﻓﻐﺎﻧﯩﺴﺘﺎﻧﻐﺎ ﻛﯩﺮﯨﺸﻰ ﻣﯘﻣﻜﯩﻦ ﺋﻪﻣﻪﺱ" ﺩﻩﭖ، ﺋﯩﺮﺍﻥ ﻫﯚﻛﯜﻣﯩﺘﯩﻨﻰ ﺗﺎﻟﯩﺒﺎﻧﻼﺭﻧﻰ ﻗﻮﺭﺍﻝ ﺑﯩﻠﻪﻥ ﺗﻪﻣﯩﻨﻠﻪﯞﺍﺗﯩﺪﯗ، ﺩﻩﭖ ﺋﻪﻳﯩﺒﻠﯩﮕﻪﻥ.

ﺋﺎﻣﯧﺮﯨﻜﺎ ﯞﻩ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻮﻛﻴﺎﻥ ﺋﻪﻫﺪﻯ ﺗﻪﺷﻜﯩﻼﺗﻰ ﺧﺎﺩﯨﻤﻠﯩﺮﻯ، ﺑﯘﻧﺪﯨﻦ ﺑﯘﺭﯗﻥ ﺑﯩﺮ ﻧﻪﭼﭽﻪ ﻗﯧﺘﯩﻢ ﺋﯩﺮﺍﻥ ﻫﯚﻛﯜﻣﯩﺘﯩﻨﻰ ﺗﺎﻟﯩﺒﺎﻧﻼﺭﻏﺎ ﻳﺎﺭﺩﻩﻡ ﺑﯧﺮﯨﯟﺍﺗﯩﺪﯗ ﺩﻩﭖ ﺋﻪﻳﯩﺒﻠﯩﮕﻪﻥ. ﻟﯧﻜﯩﻦ ﻫﺎﺯﯨﺮﻏﯩﭽﻪ ﭘﺮﯦﺰﯨﺪﯦﻨﺖ ﻛﺎﺭﺯﺍﻱ ﻫﯚﻛﯜﻣﯩﺘﻰ، ﺋﯩﺮﺍﻥ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﻪﺭﻧﻰ ﺑﯘﺯﻣﺎﺳﻠﯩﻖ ﺋﯜﭼﯜﻥ، ﺑﯘ ﺋﻪﻳﯩﺒﻠﻪﺷﻠﻪﺭﻧﻰ ﺭﻩﺕ ﻗﯩﻠﯩﭗ ﻛﻪﻟﮕﻪﻥ ﺋﯩﺪﻯ. (ﺋﯚﻣﻪﺭ ﻗﺎﻧﺎﺕ)