"ﻳﻪﺭ ﺷﺎﺭﻯ ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﻟﯘﻕ ﯞﻩ ﺧﻪﻟﻘﺌﺎﺭﺍ ﻫﻪﻣﻜﺎﺭﻟﯩﻖ" ﻣﺎﯞﺯﯗﻟﯘﻕ ﺧﻪﻟﻘﺌﺎﺭﺍ ﻳﯩﻐﯩﻦ ﺋﻪﻧﻘﻪﺭﻩﺩﻩ ﺑﺎﺷﻼﻧﺪﻯ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻳﻪﺭ ﺷﺎﺭﻯ `ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﻟﯘﻕ ﯞﻩ ﺧﻪﻟﻘﺌﺎﺭﺍ ﻫﻪﻣﻜﺎﺭﻟﯩﻖ `ﻧﺎﻣﻠﯩﻖ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻨﯩﯔ ﺋﯧﭽﯩﻠﯩﺶ ﻧﯘﺗﯘﻗﯩﻨﻰ ﺗﯜﺭﻛﯩﻴﻪ ﺋﺎﺭﻣﯩﻴﯩﺴﻰ ﺑﺎﺵ ﺷﺘﺎﺑﻰ ﺑﺎﺷﻠﯩﻘﻰ ﺋﻮﺭﮔﯧﻨﯩﺮﺍﻝ ﻳﺎﺷﺎﺭ ﺑﯜﻳﯜﻛﺎﻧﯩﺖ ﻗﯩﻠﺪﻯ. RFA Photo / Erkin Tarim

ﺗﯜﺭﻛﯩﻴﻪ ﺋﺎﺭﻣﯩﻴﯩﺴﻰ ﺑﺎﺵ ﺷﺘﺎﺑﻰ ﺗﯧﺮﺭﻭﺭ ﺑﯩﻠﻪﻥ ﻛﯜﺭﻩﺵ ﻗﯩﻠﯩﺶ ﻣﻪﺭﻛﯩﺰﻯ ﺋﻮﻳﯘﺷﺘﯘﺭﻏﺎﻥ "ﻳﻪﺭ ﺷﺎﺭﻯ ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﻟﯘﻕ ﯞﻩ ﺧﻪﻟﻘﺌﺎﺭﺍ ﻫﻪﻣﻜﺎﺭﻟﯩﻖ" ﻣﺎﯞﺯﯗﻟﯘﻕ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻰ ﺋﻪﻧﻘﻪﺭﻩﺩﻩ ﺭﻩﺳﻤﯩﻲ ﺑﺎﺷﻼﻧﺪﻯ. 3-ﺋﺎﻳﻨﯩﯔ 10-11-ﻛﯜﻧﻠﯩﺮﻯ ﺑﻮﻟﯘﭖ، ﺟﻪﻣﺌﯩﻲ ﺋﯩﻜﻜﻰ ﻛﯜﻥ ﺩﺍﯞﺍﻡ ﻗﯩﻠﯩﺪﯨﻐﺎﻥ ﺑﯘ ﻳﯩﻐﯩﻨﺪﺍ، ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﻛﯜﺭﻩﺷﻨﯩﯔ ﺋﯘﺳﯘﻟﻠﯩﺮﻯ، ﺧﻪﻟﻘﺌﺎﺭﺍ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﻛﯜﺭﻩﺷﺘﯩﻜﻰ ﺋﯧﻬﺘﯩﻴﺎﺟﻼﺭ ﯞﻩ ﺩﯗﭺ ﻛﯧﻠﯩﯟﺍﺗﻘﺎﻥ ﻣﻪﺳﯩﻠﯩﻠﻪﺭ، ﺗﯧﺮﺭﻭﺭﻧﯩﯔ ﺋﯩﺠﺘﯩﻤﺎﺋﯩﻲ ﯞﻩ ﭘﺴﯩﺨﻮﻟﻮﮔﯩﻴﯩﻠﯩﻚ ﺗﻪﺭﯨﭙﻰ، ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﻛﯜﺭﻩﺷﺘﻪ ﺧﻪﻟﻘﺌﺎﺭﺍ ﺗﻪﺷﻜﯩﻼﺗﻼﺭﻧﯩﯔ ﺭﻭﻟﻰ، ﺧﻪﻟﻘﺌﺎﺭﺍ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﻛﯜﺭﻩﺷﻨﯩﯔ ﻗﺎﻧﯘﻧﻰ ﯞﻩ ﺑﺎﺷﻘﺎ ﺟﻪﻫﻪﺗﺘﯩﻜﻰ ﻫﻪﻣﻜﺎﺭﻟﯩﻖ ﺳﺎﻫﻪﻟﯩﺮﻯ ﻗﺎﺗﺎﺭﻟﯩﻖ ﺗﯧﻤﯩﻼﺭ ﻫﻪﻗﻘﯩﺪﻩ ﻣﯘﺯﺍﻛﯩﺮﻩ ﺋﯧﻠﯩﭗ ﺑﯧﺮﯨﻠﯩﺪﯨﻜﻪﻥ.

ﺑﯘ ﻳﯩﻐﯩﻨﻐﺎ ﺗﯜﺭﻛﯩﻴﻪ ﺟﯘﻣﻬﯘﺭﯨﻴﯩﺘﻰ ﺩﯙﻟﻪﺕ ﺭﻩﻫﺒﻪﺭﻟﯩﺮﻯ، ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﯞﻩﻛﯩﻠﻠﯩﺮﻯ، ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻪﻫﺪﻯ ﺗﻪﺷﻜﯩﻼﺗﻰ ﻣﻪﺳﺌﯘﻟﻠﯩﺮﻯ، ﺋﻮﺗﺘﯘﺭﺍ ﺋﺎﺳﻴﺎ ﺗﯜﺭﻛﯩﻲ ﺟﯘﻣﻬﯘﺭﯨﻴﻪﺗﻠﯩﺮﻯ ﯞﻩ ﮔﺮﯗﺯﯨﻴﻪ ﻗﺎﺗﺎﺭﻟﯩﻖ ﺩﯙﻟﻪﺗﻠﻪﺭﻧﯩﯔ ﺋﺎﺭﻣﯩﻴﻪ ﺑﺎﺵ ﺷﺘﺎﺑﻰ ﺑﺎﺷﻠﯩﻘﻠﯩﺮﻯ، ﺧﯩﺘﺎﻱ ﻣﯩﻠﻠﯩﻲ ﻣﯘﺩﺍﭘﯩﺌﻪ ﺋﯘﻧﯩﯟﯦﺮﺳﯩﺘﯧﺘﻰ ﺋﯩﺴﺘﺮﺍﺗﯧﮕﯩﻴﻪ ﺗﻪﺗﻘﯩﻘﺎﺕ ﻣﻪﺭﻛﯩﺰﻯ ﺑﺎﺷﻠﯩﻘﻰ ﻳﺎﯓ ﻳﻰ، ﺋﺎﻣﯧﺮﯨﻜﺎ ﻗﻮﺷﻤﺎ ﺷﺘﺎﺗﻠﯩﺮﻯ ﭘﻮﺗﻮﻣﺎﻙ ﺳﯩﻴﺎﺳﻪﺕ ﺗﻪﺗﻘﯩﻘﺎﺗﻠﯩﺮﻯ ﺋﯩﻨﺴﺘﯩﺘﯘﺗﻰ ﻣﯘﺩﯨﺮﻯ ﭘﺮﻭﻑ. ﺩﺭ. ﻳﻮﻧﺎﻫ ﺋﺎﻟﯧﻜﺴﺎﻧﺪﯨﺮ ، ﭘﺎﻛﯩﺴﺘﺎﻥ، ﻳﺎﭘﻮﻧﯩﻴﻪ، ﺭﯗﺳﯩﻴﻪ ﯞﻩ ﻳﺎﯞﺭﯗﭘﺎ ﺩﯙﻟﻪﺗﻠﯩﺮﯨﮕﻪ ﺋﻮﺧﺸﺎﺵ 80 ﺩﯙﻟﻪﺗﺘﯩﻦ 690 ﺗﯧﺮﺭﻭﺭ ﻣﯘﺗﻪﺧﻪﺳﺴﯩﺲ ﻗﺎﺗﻨﺎﺷﻤﺎﻗﺘﺎ. ﺑﯘ ﻛﯩﺸﯩﻠﻪﺭ ﺋﯩﻜﻜﻰ ﻛﯜﻥ ﺟﻪﺭﻳﺎﻧﯩﺪﺍ ﻳﯘﻗﯩﺮﯨﺪﯨﻜﻰ ﺗﯧﻤﯩﻼﺭﺩﺍ ﻣﯘﺯﺍﻛﯩﺮﯨﻠﻪﺭ ﺋﯧﻠﯩﭗ ﺑﺎﺭﯨﺪﯨﻜﻪﻥ.

ﻳﻪﺭ ﺷﺎﺭﻯ `ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﻟﯘﻕ ﯞﻩ ﺧﻪﻟﻘﺌﺎﺭﺍ ﻫﻪﻣﻜﺎﺭﻟﯩﻖ` ﻧﺎﻣﻠﯩﻖ ﺋﯩﻠﻤﯩﻲ ﻣﯘﻫﺎﻛﯩﻤﻪ ﻳﯩﻐﯩﻨﻨﯩﯔ ﺋﯧﭽﯩﻠﯩﺶ ﻧﯘﺗﯘﻗﯩﻨﻰ ﺗﯜﺭﻛﯩﻴﻪ ﺋﺎﺭﻣﯩﻴﯩﺴﻰ ﺑﺎﺵ ﺷﺘﺎﺑﻰ ﺑﺎﺷﻠﯩﻘﻰ ﺋﻮﺭﮔﯧﻨﯩﺮﺍﻝ ﻳﺎﺷﺎﺭ ﺑﯜﻳﯜﻛﺎﻧﯩﺖ ﻗﯩﻠﺪﻯ. ﺋﯘ ﺳﯚﺯﯨﺪﻩ ﺗﯧﺮﺭﻭﺭﻧﯩﯔ ﻣﻪﻗﺴﻪﺕ ﺋﻪﻣﻪﺱ، ﺑﯩﺮ ﻣﻪﻗﺴﻪﺗﻨﯩﯔ ﯞﺍﺳﯩﺘﯩﺴﻰ ﺋﯩﻜﻪﻧﻠﯩﻜﯩﻨﻰ، ﻳﻪﺭ ﺷﺎﺭﻯ ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﻧﻰ ﺩﯗﻧﻴﺎﺩﯨﻜﻰ ﺗﻪﯕﭙﯘﯕﺴﯩﺰ ﻧﻮﭘﯘﺱ ﻛﯚﭘﯩﻴﯩﺸﯩﻨﯩﯔ ﻛﻪﻟﺘﯜﺭﯛﭖ ﭼﯩﻘﯩﺮﯨﯟﺍﺗﻘﺎﻧﻠﯩﻘﯩﻨﻰ، ﺩﯗﻧﻴﺎﺩﺍ ﺑﯩﺮ ﻣﯩﻠﻴﺎﺭﺩ 100 ﻣﯩﻠﻴﻮﻥ ﻛﯩﺸﯩﻨﯩﯔ ﻳﻮﻗﺴﯘﻟﻠﯘﻕ ﺋﯩﭽﯩﺪﻩ ﻳﺎﺷﺎﯞﺍﺗﻘﺎﻧﻠﯩﻘﯩﻨﻰ، ﺗﯧﺮﺭﻭﺭ ﺗﻪﺷﻜﯩﻼﺗﻠﯩﺮﯨﻨﯩﯔ ﺑﻮﻟﺴﺎ ﺑﯘﻧﯩﯖﺪﯨﻦ ﭘﺎﻳﺪﯨﻠﯩﻨﯩﭗ ﺗﯧﺮﺭﻭﺭﭼﻰ ﺗﯧﭙﯩﯟﺍﺗﻘﺎﻧﻠﯩﻘﯩﻨﻰ ﺩﯦﺪﻯ.

ﺋﯘ ﺳﯚﺯﯨﺪﻩ ﻫﯧﭽﻘﺎﻧﺪﺍﻕ ﺑﯩﺮ ﺩﯙﻟﻪﺗﻨﯩﯔ ﺑﺎﺷﻘﺎ ﺩﯙﻟﻪﺗﻠﻪﺭ ﺑﯩﻠﻪﻥ ﻫﻪﻣﻜﺎﺭﻻﺷﻤﺎﻱ ﺗﯘﺭﯗﭖ ﺗﯧﺮﺭﻭﺭﻧﻰ ﻳﻮﻕ ﻗﯩﻼﻟﻤﺎﻳﺪﯨﻐﺎﻧﻠﯩﻘﯩﻨﻰ، ﺋﻪﻣﻤﺎ ﺩﯗﻧﻴﺎﻧﯩﯔ ﻫﻪﺭﻗﺎﻳﺴﻰ ﺩﯙﻟﻪﺗﻠﯩﺮﻯ ﺗﯧﺮﺭﻭﺭ ﺩﯦﮕﻪﻥ ﻧﯧﻤﻪ ﺩﯦﮕﻪﻥ ﺳﻮﺋﺎﻟﻐﺎ ﺋﻮﺭﺗﺎﻕ ﺟﺎﯞﺍﺏ ﺗﯧﭙﯩﭗ ﭼﯩﻘﯩﺸﻰ ﻛﯧﺮﻩﻛﻠﯩﻜﯩﻨﻰ ﺋﯧﻴﺘﯩﭗ ﻣﯘﻧﺪﺍﻕ ﺩﯦﺪﻯ: "ﻫﯧﭽﻘﺎﻧﺪﺍﻕ ﺑﯩﺮ ﺩﯙﻟﻪﺗﻨﯩﯔ ﺑﺎﺷﻘﺎ ﺩﯙﻟﻪﺗﻠﻪﺭ ﺑﯩﻠﻪﻥ ﻫﻪﻣﻜﺎﺭﻻﺷﻤﺎﻱ ﺗﯘﺭﯗﭖ، ﺩﯗﻧﻴﺎﻧﯩﯔ ﻫﻪﺭﻗﺎﻳﺴﻰ ﺟﺎﻳﻠﯩﺮﯨﺪﺍ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺗﯧﺮﺭﻭﺭ ﺗﻪﺷﻜﯩﻼﺗﻠﯩﺮﯨﻐﺎ ﻗﺎﺭﺷﻰ ﻳﺎﻟﻐﯘﺯ ﻣﯘﺟﺎﺩﯨﻠﻪ ﺋﯧﻠﯩﭗ ﺑﯧﺮﯨﺸﯩﻨﯩﯔ ﻣﯘﻣﻜﯩﻦ ﺋﻪﻣﻪﺳﻠﯩﻜﻰ ﻫﻪﻣﻤﯩﻤﯩﺰﮔﻪ ﻣﻪﻟﯘﻡ. ﺷﯘﯕﺎ ﺩﯗﻧﻴﺎ ﺩﯙﻟﻪﺗﻠﯩﺮﻯ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﻛﯜﺭﻩﺷﺘﻪ ﻫﻪﻣﻜﺎﺭﻟﯩﻘﯩﻨﻰ ﻛﯜﭼﻪﻳﺘﯩﺸﯩﻤﯩﺰ ﻛﯧﺮﻩﻙ. ﺋﻪﻣﻤﺎ ﺷﯘﻧﯩﻤﯘ ﺋﻪﺳﻜﻪﺭﺗﯩﭗ ﻗﻮﻳﺎﻳﻜﻰ، ﺗﯧﺮﺭﻭﺭ ﺩﯦﮕﻪﻥ ﻧﯧﻤﻪ؟ ﺩﯦﮕﻪﻥ ﺳﯘﺋﺎﻟﻐﺎ ﺧﻪﻟﻘﺌﺎﺭﺍﺩﺍ ﺗﯧﺨﻰ ﺋﻮﺭﺗﺎﻕ ﺑﯩﺮ ﺟﺎﯞﺍﺏ ﺑﯧﺮﯨﻠﻤﯩﺪﻯ، ﺟﺎﯞﺍﺑﻰ ﺋﯧﻨﯩﻖ ﺑﻮﻟﻤﯩﻐﺎﻥ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﻗﺎﻧﺪﺍﻗﻤﯘ ﻣﯘﯞﻩﭘﭙﻪﻗﯩﻴﻪﺗﻠﯩﻚ ﻛﯜﺭﻩﺵ ﺋﯧﻠﯩﭗ ﺑﺎﺭﻏﯩﻠﻰ ﺑﻮﻟﯩﺪﯗ؟"

ﺗﯜﺭﻛﯩﻴﻪ ﺋﺎﺭﻣﯩﻴﯩﺴﻰ ﺑﺎﺵ ﺷﺘﺎﺏ ﺑﺎﺷﻠﯩﻘﻰ ﺋﻮﺭﮔﯧﻨﯩﺮﺍﻝ ﻳﺎﺷﺎﺭ ﺑﯜﻳﯜﻛﺎﻧﯩﺖ ﺋﻪﭘﻪﻧﺪﻯ` ﻳﻪﺭ ﺷﺎﺭﻯ ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﻟﯘﻕ ﯞﻩ ﺧﻪﻟﻘﺌﺎﺭﺍ ﻫﻪﻣﻜﺎﺭﻟﯩﻖ `ﻣﺎﯞﺯﯗﻟﯘﻕ ﻳﯩﻐﯩﻨﺪﺍ ﻗﯩﻠﻐﺎﻥ ﺋﯧﭽﯩﻠﯩﺶ ﻧﯘﺗﯩﻘﯩﺪﺍ ﺗﯜﺭﻛﯩﻴﯩﻨﯩﯔ ﺗﯧﺮﺭﻭﺭﻏﺎ ﺑﻮﻟﻐﺎﻥ ﻛﯚﺯ ﻗﺎﺭﯨﺸﻰ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﯦﺪﻯ: "ﺗﯧﺮﺭﻭﺭﻧﯩﯔ ﻫﻪﺭ ﻗﺎﻧﺪﯨﻘﯩﻐﺎ ﻗﺎﺭﺷﻰ ﺋﯩﻜﻪﻧﻠﯩﻜﯩﻨﻰ ﺋﯧﻨﯩﻖ ﺋﯩﭙﺎﺩﯨﻠﻪﭖ ﻛﻪﻟﮕﻪﻥ ﺗﯜﺭﻛﯩﻴﻪ، ﺭﺍﻳﻮﻥ ﯞﻩ ﺩﯗﻧﻴﺎ ﺧﺎﺭﺍﻛﺘﯧﺮﻟﯩﻚ ﯞﻩﺯﯨﭙﯩﻠﻪﺭﻧﻰ ﺋﯚﺯ ﺋﯜﺳﺘﯩﮕﻪ ﺋﯧﻠﯩﭗ ﺋﺎﺩﺍ ﻗﯩﻠﯩﭗ ﻛﯧﻠﯩﯟﺍﺗﻘﺎﻥ ﺑﯩﺮ ﺩﯙﻟﻪﺕ. ﺷﯘﻧﺪﺍﻕ ﺑﻮﻟﺴﯩﻤﯘ ، ﺑﻪﺯﻯ ﺩﯙﻟﻪﺗﻠﻪﺭ ﺑﯩﺰﻧﯩﯔ ﭖ ﻙ ﻙ ﺗﯧﺮﺭﻭﺭ ﺗﻪﺷﻜﯩﻼﺗﯩﻐﺎ ﻗﺎﺭﺷﻰ ﻣﯘﺟﺎﺩﯨﻠﯩﻤﯩﺰﻧﻰ ﺩﯦﮕﻪﻧﺪﻩﻙ ﻗﻮﻟﻼﭖ ﻗﯘﯞﯞﻩﺗﻠﯩﻤﻪﻱ ﻛﻪﻟﺪﻯ، ﺑﯩﺰ ﺑﯘﻧﯩﯖﻐﺎ ﻗﺎﺗﺘﯩﻖ ﺋﻪﭘﺴﯘﺳﻠﯩﻨﯩﻤﯩﺰ. ﺑﯩﺰ ﻳﻪﺭ ﺷﺎﺭﻯ ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﭼﯩﻠﯩﻘﻘﺎ ﻗﺎﺭﺷﻰ ﻛﯜﺭﻩﺷﺘﻪ ﺋﺎﻛﺘﯩﭗ ﻫﻪﻣﻜﺎﺭﻻﺷﻘﺎﻧﺪﯨﻼ ﻣﯘﯞﻩﭘﭙﻪﻗﯩﻴﻪﺗﻠﯩﻚ ﺑﻮﻻﻻﻳﻤﯩﺰ."

ﻫﺎﺟﻪﺗﺘﻪﭘﻪ ﺋﯘﻧﯩﯟﯦﺮﺳﯩﺘﯧﺘﻰ ﺗﺎﺭﯨﺦ ﺋﻮﻗﯘﺗﻘﯘﭼﯩﺴﻰ، ﺋﯩﺴﺘﺮﺍﺗﯧﮕﯩﻴﻪ ﻣﯘﺗﻪﺧﻪﺳﺴﯩﺴﻰ ﺩﻭﻛﺘﻮﺭ ﺋﻪﺭﻛﯩﻦ ﺋﻪﻛﺮﻩﻡ ﺋﻪﭘﻪﻧﺪﻯ، ﺑﯜﮔﯜﻧﻜﻰ ﺷﺎﺭﺍﺋﯩﺘﺘﺎ ﺗﯧﺮﺭﻭﺭ ﺩﯦﮕﻪﻥ ﻧﯧﻤﻪ؟ ﺩﯦﮕﻪﻥ ﺳﯘﺋﺎﻟﻐﺎ ﺋﻮﺭﺗﺎﻕ ﺋﯩﺰﺍﻫﺎﺕ ﺑﯧﺮﯨﺸﻨﯩﯔ ﻗﯧﻴﯩﻦ ﺋﯩﻜﻪﻧﻠﯩﻜﯩﻨﻰ ، ﭼﯜﻧﻜﻰ ﺑﻪﺯﻯ ﺩﯙﻟﻪﺗﻠﻪﺭ ﺗﯧﺮﺭﻭﺭﭼﻰ ﺩﯦﮕﻪﻥ ﻛﯩﺸﯩﻨﯩﯔ، ﺑﻪﺯﻯ ﻣﯩﻠﻠﻪﺗﻠﻪﺭ ﺋﯜﭼﯜﻥ ﻗﻪﻫﺮﯨﻤﺎﻥ ﺋﯩﻜﻪﻧﻠﯩﻜﯩﻨﻰ ﺋﯧﻴﺘﺘﻰ. ﺋﻪﺭﻛﯩﻦ ﺋﻪﻛﺮﻩﻡ ﺋﻪﭘﻪﻧﺪﻯ ﻳﻪﻧﻪ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭﻻﺭﻧﻰ ﺗﯧﺮﺭﻭﺭﭼﻰ ﺩﻩﭖ ﻛﯚﺭﺳﯩﺘﯩﯟﺍﺗﻘﺎﻧﻠﯩﻘﯩﻨﻰ، ﺋﻪﻣﻤﺎ ﺋﯘﻳﻐﯘﺭ ﻣﻪﺳﯩﻠﯩﺴﯩﻨﯩﯔ ﺑﯩﺮ ﻣﯩﻠﻠﯩﻲ ﺩﺍﯞﺍ ﺋﯩﻜﻪﻧﻠﯩﻜﯩﻨﻰ، ﺗﯧﺮﺭﻭﺭ ﺋﯘﻗﯘﻣﻰ ﺋﻮﺗﺘﯘﺭﯨﻐﺎ ﭼﯩﻘﻤﺎﺳﺘﯩﻦ ﺑﯘﺭﯗﻥ ﺑﯘ ﺩﺍﯞﺍﻧﯩﯔ ﻣﻪﯞﺟﯘﺕ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﻪﭖ ﺋﯚﺗﺘﻰ.

ﺋﯩﻜﻜﻰ ﻛﯜﻥ ﺩﺍﯞﺍﻡ ﻗﯩﻠﯩﺪﯨﻐﺎﻥ ﺑﯘ ﻳﯩﻐﯩﻨﺪﺍ 80 ﺩﯙﻟﻪﺗﺘﯩﻦ ﻛﻪﻟﮕﻪﻥ 690 ﺋﻪﺗﺮﺍﭘﯩﺪﺍ ﺗﯧﺮﺭﻭﺭ ﻣﯘﺗﻪﺧﻪﺳﺴﯩﺴﻰ ﻳﻪﺭ ﺷﺎﺭﻯ ﺧﺎﺭﺍﻛﺘﯧﺮﻟﯩﻚ ﺗﯧﺮﺭﻭﺭﻟﯘﻕ ﯞﻩ ﺧﻪﻟﻘﺌﺎﺭﺍ ﻫﻪﻣﻜﺎﺭﻟﯩﻖ ﻫﻪﻗﻘﯩﺪﻩ ﺗﻪﻳﻴﺎﺭﻟﯩﻐﺎﻥ ﺋﯩﻠﻤﯩﻲ ﻣﺎﻗﺎﻟﯩﻠﯩﺮﯨﻨﻰ ﺋﻮﻗﯘﭖ، ﺑﯘ ﻫﻪﻗﺘﻪ ﻣﯘﺯﺍﻛﯩﺮﯨﻠﻪﺭ ﺋﯧﻠﯩﭗ ﺑﺎﺭﯨﺪﯨﻜﻪﻥ. (ﺋﻪﺭﻛﯩﻦ ﺗﺎﺭﯨﻢ)