ﺗﯜﺭﻛﯩﻴﻪ ﺋﺎﻓﻐﺎﻧﯩﺴﺘﺎﻧﺪﺍ ﺗﯘﺭﯗﺷﻠﯘﻕ ﺋﺎﺭﻣﯩﻴﯩﺴﯩﻨﯩﯔ ﺳﺎﻧﯩﻨﻰ ﻛﯚﭘﻪﻳﺘﯩﺪﯨﻐﺎﻧﻠﯩﻘﯩﻨﻰ ﻗﺎﺭﺍﺭ ﻗﯩﻠﺪﻯ

ﺗﯜﺭﻛﯩﻴﻪ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﺑﺎﺑﺎﺟﺎﻥ ﭘﻪﻳﺸﻪﻧﺒﻪ ﻛﯜﻧﻰ، ﺋﺎﻓﻐﺎﻧﯩﺴﺘﺎﻧﺪﺍ ﺗﯘﺭﯗﺷﻠﯘﻕ ﺋﺎﺭﻣﯩﻴﻪ ﺳﺎﻧﯩﻨﻰ ﻛﯚﭘﻪﻳﺘﯩﺸﻨﻰ ﺋﻮﻳﻠﯩﺸﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺋﯩﻠﮕﯩﺮﻯ ﺗﯜﺭﻛﯩﻴﻪ ﺗﻪﺭﻩﭖ، ﺋﺎﻓﻐﺎﻧﯩﺴﺘﺎﻧﺪﺍ ﺋﻪﺳﻜﻪﺭ ﻛﯚﭘﻪﻳﺘﯩﺸﻨﻰ ﻗﻪﺗﺌﯩﻲ ﺭﻩﺕ ﻗﯩﻠﻐﺎﻥ ﺑﻮﻟﯘﭖ، ﺑﯘ ﻗﯧﺘﯩﻢ ﺑﺎﺑﺎﺟﺎﻥ، ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻪﻫﺪﻯ ﺗﻪﺷﻜﯩﻼﺗﯩﻐﺎ ﺋﻪﺯﺍ ﺩﯙﻟﻪﺕ ﺑﻮﻟﯘﺵ ﺳﯜﭘﯩﺘﻰ ﺑﯩﻠﻪﻥ، ﺗﯜﺭﻛﯩﻴﯩﻨﯩﯔ ﭼﻮﻗﯘﻡ ﺑﯘ ﻣﻪﺳﺌﯘﻟﯩﻴﻪﺗﻨﻰ ﺋﯜﺳﺘﯩﮕﻪ ﺋﯧﻠﯩﺸﻰ ﻛﯧﺮﻩﻛﻠﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺗﯜﺭﻛﯩﻴﻪ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﺑﺎﺑﺎﺟﺎﻥ ﻳﻪﻧﻪ، ﺗﯜﺭﻛﯩﻴﯩﻨﯩﯔ ﺑﯩﺮ ﻗﺎﻧﭽﻪ ﻛﯜﻥ ﺋﯩﭽﯩﺪﻩ ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺗﯜﺭﻛﯩﻴﻪ ﺋﺎﺭﻣﯩﻴﯩﺴﻰ ﻣﻪﺳﯩﻠﯩﺴﻰ ﺋﯜﺳﺘﯩﺪﻩ ﺋﯧﻨﯩﻖ ﺑﯩﺮ ﻗﺎﺭﺍﺭ ﭼﯩﻘﯩﺮﯨﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ. ﺑﺎﺑﺎﺟﺎﻥ ﺑﯘ ﺳﯚﺯﻟﻪﺭﻧﻰ ﺋﺎﻓﻐﺎﻧﯩﺴﺘﺎﻥ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﺳﻪﺗﺘﺎﺭﻧﯩﯔ ﺗﯜﺭﻛﯩﻴﯩﺪﻩ ﺋﯧﻠﯩﭗ ﺑﺎﺭﻏﺎﻥ ﺋﯩﻜﻜﻰ ﻛﯜﻧﻠﯜﻙ ﺯﯨﻴﺎﺭﯨﺘﻰ ﺩﺍﯞﺍﻣﯩﺪﺍ ﺋﯩﭙﺎﺩﯨﻠﯩﮕﻪﻥ.

ﺗﯜﺭﻛﯩﻴﯩﻨﯩﯔ ﺗﻪﺧﻤﯩﻨﻪﻥ 1200 ﻛﯩﺸﯩﻠﯩﻚ ﻫﻪﺭﺑﯩﻲ ﻗﯩﺴﻤﻰ ﺋﺎﻓﻐﺎﻧﯩﺴﺘﺎﻧﻨﯩﯔ ﻛﺎﺑﯘﻝ ﺷﻪﻫﯩﺮﯨﮕﻪ ﺟﺎﻳﻼﺷﻘﺎﻥ، ﺗﯜﺭﻛﯩﻴﻪ ﺑﯘﺭﯗﻥ، ﺗﺎﻟﯩﺒﺎﻧﻼﺭﻧﯩﯔ ﻗﺎﺭﺷﯩﻠﯩﻖ ﻛﯚﺭﺳﯩﺘﯩﺶ ﻫﻪﺭﯨﻜﻪﺗﻠﯩﺮﻯ ﺋﻪﯓ ﺋﻪﯞﺝ ﺋﺎﻟﻐﺎﻥ ﺋﺎﻓﻐﺎﻧﯩﺴﺘﺎﻧﻨﯩﯔ ﺟﻪﻧﯘﺑﯩﺪﺍ ﺋﻪﺳﻜﻪﺭ ﺗﯘﺭﻏﯘﺯﯗﺷﻨﻰ ﺋﯩﺰﭼﯩﻞ ﺗﯜﺭﺩﻩ ﺭﻩﺕ ﻗﯩﻠﯩﭗ ﻛﻪﻟﮕﻪﻥ.

ﻛﺎﻧﺎﺩﺍ، ﺋﺎﻣﯧﺮﯨﻜﺎ ﯞﻩ ﺋﻪﻧﮕﯩﻠﯩﻴﻪ ﻗﯩﺴﯩﻤﻠﯩﺮﻯ ﺋﺎﻓﻐﺎﻧﯩﺴﺘﺎﻧﺪﯨﻜﻰ ﺋﺎﺳﺎﺳﻠﯩﻖ ﺋﯘﺭﯗﺵ ﯞﻩﺯﯨﭙﯩﺴﯩﻨﻰ ﺋﯜﺳﺘﯩﮕﻪ ﺋﺎﻟﻐﺎﻥ ﺑﻮﻟﯘﭖ، ﻛﺎﻧﺎﺩﺍ ﺋﻪﮔﻪﺭ ﺷﯩﻤﺎﻟﯩﻲ ﺋﺎﺗﻼﻧﺘﯩﻚ ﺋﻪﻫﺪﻯ ﺗﻪﺷﻜﯩﻼﺗﻰ ﻗﻮﺷﯘﻧﯩﻨﻰ ﻛﯚﭘﻪﻳﺘﻤﯩﺴﻪ، ﺋﯚﺯ ﺋﺎﺭﻣﯩﻴﯩﺴﯩﻨﻰ ﭼﯧﻜﯩﻨﺪﯛﺭﯨﺪﯨﻐﺎﻧﻠﯩﻘﯩﻨﻰ ﺋﺎﮔﺎﻫﻼﻧﺪﯗﺭﺩﻯ. ﺷﯘﯕﺎ ﺋﺎﻣﯧﺮﯨﻜﺎ ﺗﻪﺧﻤﯩﻨﻪﻥ 3 ﻣﯩﯔ 200 ﻧﻪﭘﻪﺭ ﺩﯦﯖﯩﺰ ﺋﺎﺭﻣﯩﻴﯩﺴﻰ ﯞﻩ ﻗﯘﺭﯗﻗﻠﯘﻕ ﺋﺎﺭﻣﯩﻴﻪ ﻗﯩﺴﯩﻤﻠﯩﺮﯨﻨﻰ ﺋﺎﻓﻐﺎﻧﯩﺴﺘﺎﻧﻐﺎ ﺋﻮﺭﯗﻧﻼﺷﺘﯘﺭﻏﺎﻥ ﺋﯩﺪﻯ. (ﺋﻪﻗﯩﺪﻩ)