Gollandiyediki Uyghur terjimanlarning tepsilatini ashkarilash telep qilindi

Gollandiye de Uyghur köchmenlerge alaqidar ikki terjiman guman bilen ishtin toxtitilghandin kéyin, golladniyediki adwokatlar birleshmisi gollandiye dölet bixeterlik idarisidin bu ishning tepsilatini éniq élan qilishni telep qilghan.

Ötken hepte gollandiye metbu'atlirida gollandiye köchmenler ishliri idarisi ishlitip kéliwatqan ikki Uyghur terjimanning Uyghurlargha alaqidar mexpiy melumatlarni xitaygha yollap bergenliki sewebidin ishtin toxtilidighanliqi ilgiri sürülgen idi.

Gollandiye axbaratigha qarighanda, bu telepni gollandiye iltijachilar adwokatlar birleshmisidin lo'és wellé'uga wang néuwkrek xanim gollandiye dölet bixeterlik idarisi- AIDV gha yollighan.

Lo'és xanim “NOS” téléwiziyisining muxbirigha bergen inkasida: bu nahayiti xeterlik bir ehwal. Chünki iltijachilar bu yerge kelgendin kéyin 2 qétimliq söhbetke kiridu. 1‏-Söhbette pütünley özining kimliki, adrési we a'ilisi heqqide söhbet béridu. 2‏-Qétimliq söhbette, iltija qilishtiki seweb, meqsetliri heqqide toxtilidu. Eger bu uchurlar sirtqa yetküzülse, ulargha xeter yétidu. Bu nuqtida bixestelik qilghinigha qarap gollandiye éltijachilar ishliri orgini IND ning xizmitidin nahayiti ümidsizlendim. Gollandiye dölet bixeterlik idarisiAIVD ningmu bu tekshürüshni 2011‏-yili bashlighanliqi, bu ikki terjimanni közitip kelgenlikini we axiri bir qarargha kelgenlikini angliduq. Emma, tepsilatini téxi ochuq élan qilmidi. Ularning bu mesilide IND gha burunraq shepe bermigenliki bir xataliq. Men adwokatlar birleshmisige wakaliten AIDV gha xet yézip, bu ehwalning tepsilatini ochuq élan qilishni telep qildim, dédi.

Gollandiye éltijachilar ishliri orginining diréktori Jasper Kuiper ependi bu heqte, “NU” radi'osi muxbirining ziyariti qobul qilghanda: biz bek chüchüp kettuq. Chünki Uyghur terjimanlar az bolushi tüpeylidin bu ikkisi terjimanliqigha arilashqan kishiler köp bolushi mumkin. Eger ular bularning uchurlirini yetküzgen bolsa, nurghun Uyghur iltijachi awarichilikke uchraydu. A'ilisige bésim kélidu. Bu heqte qolimizda, xelq'ara insany hoquq teshkilatlirining mexsus doklatliri bar, dédi.
Undaqta, terjimanlarning terjimanliq pursitide bu xil qilimish bilen shughullinishida birer asas barmu?

Biz terjimanlarning iltijachilar orginidiki xizmet toxtamlirida belgilen'gen heqlirige alaqidar melumatlardin tepsiliy xewerdar bolush üchün, shu organda terjimanliq bilen shughullinip kéliwatqan sadiqjan seley ependini ziyaret qilduq.

Sadiqjan seley ependining bildürüshiche, xizmet toxtamida shexslerning uchurlirini ashkarilimasliq, burmilimasliq we otturida lillah turup ishleshtek mejburiyiti éniq we tepsiliy belgilen'gen iken.

Gollandiyediki axbarat wasitiliride bu ikki terjimanning kimliki hazirghiche ashkarilanmay kelgen bolsimu, bezi namsiz tor inkaslirida bu shexslerning kimliki heqqide herxil gumanlar otturigha qoyulmaqta.

Tordiki bu xil inkaslarni ispatliq matériyal süpitide ishlitishke bolmaydighanliqi üchün, bizmu gumandarlarning kimliki mesiliside gollandiye bixeterlik organliri resmiy yosundiki bayanatlirini saqlashni muwapiq körduq.

Halbuki, bezi perezlerge asasen aldinqi küni ilgiri gollandiye de iltijachilargha terjimanliq qilghan bir Uyghurni téléfon ziyariti qilghinimizda, mezkur terjiman ziyaritimizni ret qilghan bolsimu, özlirining tekshürüsh obyéktidiki shexsler ikenlikini inkar qilmighan idi.

Nöwette, gollandiye de yashawatqan Uyghurlar bu xil jasusluq qilmishlirigha qarita qattiq ghezeplenmekte. Gollandiye diki mewjut jem'iyetlermu öz ara bir arigha kélip, bu heqte éniq meydanini bildürüsh üchün teyyarliniwatqanliqi texmin qilinmaqta.