Оғлини һарақтин тосқан бовай дохтурханидин тутуп кетилгән

Мухбиримиз шөһрәт һошур
2017.11.02
herbiy-saqchi-uyghur-boway.jpg Уйғур бовайниң коча чарлаватқан хитай қораллиқ әскәрлириниң йенидин өтүп кетиватқан көрүнүши. 2009-Йили 9-июл, үрүмчи.
AP

Йеңисарниң әгүс йезисида оғлини һарақтин тосуп әйиблигәнлики үчүн “диний әсәбийлик” билән әйиблинип кесиветилгән 67 яшлиқ бовай турсун мәмәт, саламәтликидә мәсилә көрүлүп дохтурханида давалиниватқан мәзгилидә тутқун қилинған. У сақчиханиға елип кетилип 3 күнгә қәдәр өйигә қайтип кәлмигәндин кейин, пәрзәнтлири униң дорисини елип сақчиханиға барған. Сақчилар бовайниң нәдиликини аилә әзалиридин йошуруш билән бир вақитта, бовайниң дорисиниму қобул қилмиған. Мәлум болушичә, бу аилидин 1 дада, үч оғул вә икки күйоғул болуп җәмий 6 киши қамақта икән.

Йеңисарниң әгүс йезисида 67 яшлиқ турсун мәмәтниң 13 йил бурун оғлини һарақтин тосуп әйиблигәнлики үчүн 10 йиллиқ кесиветилгәнлик вәқәсини йәниму тәпсилий ениқлаш үчүн наһийә вә йезидики алақидар орунларға қайта-қайтилап телефон қилдуқ. Телефонимизни қобул қилған йәрлик әмәлдар вә сақчиларниң һечбири вәқәниң растлиқини инкар қилмиди.

Мәзкур кесим һәққидә радиомизға кәлгән мәктупта, турсун мәмәтниң ағриқчан бир киши икәнлики, тутқун қилинған мәзгилидә дохтурханида давалиниватқанлиқи әскәртилгән. Биз бу учурниң тоғрилиқини дәлилләш үчүн алақидар идарә-органларға телефон қилдуқ. Хадимлар турсун мәмәтниң тутулуш сәвәби вә җәряни һәққидә еғиз ачмиди. Биз ахири бу әһвални йәнила турсун мәмәтниң аилә-тавабиатидин соридуқ. Турсун мәмәтниң җориси, радийомизға кәлгән мәктупта дейилгәнләрниң тоғрилиқини дәлиллиди.

Радийомизға кәлгән мәктупта турсун мәмәт үстидин сот ечилмиғанлиқи, пәқәт аилисигә сотниң һөкүм қәғизи оқуп берилгәнлики тилға елинған. Мәктупта йәнә турсун мәмәтниң тутқундин бир күн бурун қәшқәр керәмбағ дохтурханисида өзини тәкшүрткәнлики вә рентигенгә чүшкәнлики йезилған. Мәктупта турсун мәмәтниң ағриқиниң немилики тилға елинмиған. Униң җорисиму бу һәқтә тохтилишни халимиди. У пәқәт турсун мәмәт бовайниң ичиватқан дориси барлиқини тилға алди.

Мәлум болушичә, йеңисарда давам қиливатқан кәң-көләмлик тутқун сәвәбидин турсун мәмәт бовай өзини сақчи издигән һаман, гәрчә һечқандақ җинайити йоқлуқи өзигә аян болсиму, тутулуш вә кесилиш нөвитиниң өзигә кәлгәнликини тәхмин қилған. Сақчи хадимлири турсун мәмәтниң тутулуш сәвәби билән бирликтә тутуп турулуватқан орниниму йошурған; пәрзәнтлири елип кәлгән дорини қобул қилмиған. Җорисиниң баян қилинишичә, даириләр турсун мәмәтни аилә-тавабиати билән йеқинда екранда көрүштүргән.

Түнүгүнки ениқлишимизда турсун мәмәт бовай аилисидин өзи вә үч оғли билән 4 киши кесилгәнлики дейилгән иди. Бүгүнки ениқлишимизда мәзкур аилидики икки күйоғулниңму нөвәттә қамақта икәнлики ашкариланди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.