Saybagh weqeside étip öltürülgenlerning bir jemet, ichide 6 nepiri ayal ikenliki ashkarilandi
2013.12.18
Xitay 15-dékabir küni qeshqer konasheher saybagh yézisida yüz bergen qanliq weqede, 16 kishining ölgenliki, arisida ikki nepirining saqchi xadimi, qalghanlirining bolsa térrorchi ikenlikini élan qilghan, emma kimliklirini tepsiliy ashkarilimighan idi.
Muxbirimizning saybaghdiki saqchi we hökümet organliridin ehwal igileshliri dawamida weqede saqchilar teripidin étip öltürülgenlerning 4 aka-uka qérindash, bir singil we bir baja we ularning joriliri bolup bir jemet kishiler ikenliki, ölgenlerdin alte nepirining bolsa ayal ikenliki ashkarilandi. Bu uchurlar weqe yüz bergen saybagh yéziliq partkomda 17-dékabir küni échilghan weqe heqqidiki xizmet orunlashturush yighinidin élindi.
Weqe yüz bergen saybagh yézisidiki saqchixana
Xadim: saybagh saqchixanisi!
Muxbir: gülchimende yüz bergen weqede ölgenlerni bir a'ile kishiliri dep angliduq, shu a'ilidin qanche kishi ölgen boldi.
Xadim: bu ishlargha biz jawab bérelmeymiz, nahiyidiki qomandanliq shtabigha téléfon qiling.
Konasheher nahiyilik saqchi idarisining jiddiy weqelerge qomandanliq qilish shtabi
Muxbir: bu konasheher nahiyilik saqchi idarisimu?
Xadim: shundaq néme ish barti?
Muxbir: saybaghning gülchimen yézisidiki weqede bir a'ilidin qanche kishi ölgen gep?
Xadim: bu heqte biz bir nerse déyelmeymiz!
Muxbir: bolmisa weqedin xewiringlar barmu, qolunglarda bu heqte doklat barmu?
Xadim: men sizge ishxanining, katibat bölümining téléfonini dep bérey, shulardin sorap béqing.
Konasheher nahiyilik j x idarisi qomandanliq shtabining katibat bölümi
Muxbir: bu konasheher nahiyilik j x idarisimu?
Xadim: he.
Muxbir: qandaq ehwalingiz, yaxshimu?
Xadim: chüshenmidim (xadim xitayche jawab béridu, di'alog shundin kéyin xitayche dawamlishidu.)
Muxbir: idaringizning axbarat bayanatchisini chaqirip qoysingiz?
Xadim: sen shöhret hoshurmu?
Muxbir: shundaq men shu.
Xadim: emise sorima bu ishni maquma?
Muxbir: néme üchün?
Xadim....
Xadim téléfonni qoyuwétidu we qayta-qayta urulsimu téléfonni qobul qilmaydu.
Axirqi qedemde biz saybagh yéziliq partkomgha téléfon qilip weqe heqqide melumat soriduq. Nöwetchi xadim, bu weqe heqqide peqet teshwiqat bölümi mes'uliningla jawab bérish hoquqigha ige ikenlikini uqturidu we mes'ul xadim gu'en xu'eyshya bilen körüshüshimizni tewsiye qilidu. Bérilgen téléfon nomurigha téléfon qilghinimizda, téléfon yighin meydanigha ulinidu we yéziliq partkom sékrétarining weqe heqqidiki doklati we xizmet orunlashturushi bir terjimanning éghizi arqiliq töwendikiche anglinidu:
Sékrétar: .... Ular 7-aydin bashlap térrorluq, zorawanliqqa a'it teshwiqat matériyallirini körgen,... 8-Ayda zorawanliq qorallirini yasap sinaq qilishqan.... 12-Ayning 15-küni yézimizdin mey sojang bilen nahiyidin gobaw dadüyning dadüyjangi mey wéyyüen 7 neper saqchini élip yézimizning 13-kent 1-mehellisidiki islam isma'ilning a'ilisige bulaqsudiki weqege munasiwetlik bir ishni éniqlap barghinida, mey wéyyüen ishiktin kirishigila bir térrorchi étilip kélip uni pichaq tiqip öltüridu (éniqlashlirimiz dawamida mey sojang dégining saybagh saqchixana bashliqi memet sidiq, mey wéyyüen dégining konasheher nahiyilik dölet amanliq etriti bashliqi, xelq qurultiyi hey'iti memet tursun ikenliki ashkarilinidu-muxbirdin)..... Arqidin öy ichidin birnechchisi étilip chiqip özliri yasighan bomba bilen kochidiki saqchi aptomobilini partlitidu.... Ular yene ishik aldiliridin 150 métir néridiki meshiq meydanida mey sojangnimu öltüridu.... Nahiyidin saqchilar yétip kelgende ular yene chékinmestin saqchilargha étilip kélidu, saqchilar teslim bolushqa we düm yétishqa buyruydu, ular dawamliq halda özliri yasighan bombilar bilen saqchilargha qarap étilip kélidu, andin saqchilar hemmisini étip tashlaydu... Urush axirlashqandin kéyin biz neq meydan'gha yétip barduq, ehwal nahayiti échinishliq, mey sojangning béshi bir yerde, bedini bir yerde halette, aktip ikki xizmetchimizdin ayrilip qalduq... Weqedin kéyin 8 bomba qatarliq qorallar yighiwélindi, yighiwélin'ghan qorallar arisida töt töshükidin teng oq chiqidighan éghir qoralmu bar.... Buningdin kéyin ropashliqlarni, saqalliqlarni qattiq tekshürünglar, bu qétimqi weqede ölgenlerning hemmisi saqalliq we hemmisi ropashliq.... Ölgenlerning altisi ayal, 10 i er.... Bundin kéyin chet yaqidiki öylerni, yéngi öylerni qattiq tekshürünglar؛ bolupmu uruq-tughqanlar topliship olturuwalghan a'ililerni qattiq tekshürünglar, bu qétimqisi islam isma'il a'ilisidiki 4 aka-uka qérindash, bir singil, bir baja we joriliri bolup bir jemetning térighan ishi. Eslide bular buningdin chong ish qilmaqchi, yéziliq saqchidinmu, nahiyidinmu tekshürüshke kéliwergendin kéyin, he, pash bop qaptuq, jazalinip kétimiz dep térighan ishi.... Weqedin kéyin 21 bala bizge qaldi, biz bügün qaraymiz, ete nahiyige yötkiwétimiz؛ eslide 27 bala bu, arilirida 3 nepirining apisi mushu yerde bolghachqa saqchixanigha apirip soraq qilindi....
Yighindin ashkarilan'ghan yuqiriqi melumatlarning bir qismi xitay axbaratida bayan qilin'ghan bolsimu, emma weqede ölgenler arisida ayallarningmu barliqi we 21 balining yétim qalghanliqi bayan qilinmighan. Yighindiki doklatta ayallarningmu ölgenliki pash qilin'ghan bolsimu, emma qarshilashquchilar arisida ayallarning bar-yoqluqi tilgha élinmighan. Bu 6 neper ayalning er qérindash we joriliri bilen birlikte kochida étip tashlan'ghan we yaki olturghan öyide étip tashlan'ghanliqidin ibaret bu nazuk nuqta xitayning mezkur yighin'gha qatnashqan öz xadimliridinmu sir tutulghan.